Вы тут

Як бяспечна і з карысцю правесці канікулы ў лагеры?


У час летняй аздараўленчай кампаніі 2021 года ў дзіцячых аздараўленчых лагерах рознага тыпу адпачне больш за 62 тысячы сталічных школьнікаў. Пра гэта падчас прэс-канферэнцыі расказала начальнік аддзела выхаваўчай і ідэалагічнай работы камітэта па адукацыі Мінгарвыканкама Ганна РЫСЯВЕЦ.


Фота: pixabay.com

Найперш — аздараўленне

— Большасць дзяцей правядзе лета менавіта ў загарадных аздараўленчых лагерах. Гэта дазволіць ім умацаваць здароўе, а таксама актыўна і змястоўна правесці лета. З 1 чэрвеня на базе сталічных устаноў адукацыі адкрыюцца лагеры з дзённым знаходжаннем. Яны будуць працаваць усе тры летнія месяцы. Першая змена будзе доўжыцца з 1 да 24 чэрвеня, другая — з 28 чэрвеня да 21 ліпеня і трэцяя — з 26 ліпеня да 19 жніўня.

Таксама будуць дзейнічаць 83 лагеры працы і адпачынку (80 — у дзённым фармаце і тры — за горадам): у іх распачне сваю працоўную дзейнасць больш як 1100 хлопцаў і дзяўчат. Акрамя таго, разам са службамі занятасці горада плануецца працаўладкаваць падчас летніх канікулаў больш за 4 тысячы сталічных школьнікаў. Традыцыйна будуць працаваць і профільныя лагеры. Так, на базе дзіцячага аздараўленчага лагера «Аптыміст», размешчанага ў Астрашыцкім Гарадку, падлеткаў прыме лагер «Патрыёт». Хлопцы змогуць загартаваць характар і акунуцца ў вайсковыя будні разам з вайскоўцамі в/ч 3310.

— Лета ў школьнікаў будзе насычана спартыўнымі, забаўляльнымі, пазнавальнымі мерапрыемствамі. Хлопцы і дзяўчаты таксама ўключацца ў рэспубліканскія акцыі, у прыватнасці, у традыцыйны праект па прапагандзе здаровага спосабу жыцця і адмовы ад шкодных звычак «Ваш выбар!», — адзначыла Ганна Рысявец.

Сумесна з БДПУ не першы год у Мінску рэалізоўваецца праект «Дзеці сталіцы». У яго рамках студэнтамі-валанцёрамі будзе арганізавана занятасць дзяцей на базе сямі навучальных устаноў у пяці раёнах сталіцы. Студэнты займаюцца арганізацыяй свабоднага часу дзяцей і падлеткаў, якія не маюць магчымасці аздаравіцца летам у загарадных лагерах або наведваць школьны лагер. Валанцёры самастойна прыцягваюць дзяцей у праект: у мікрараёнах і на прышкольных пляцоўках расказваюць пра яго дзецям і іх бацькам, запрашаюць далучыцца. Дарэчы, адбор студэнтаў у праект адбываецца на конкурснай аснове.

Прычыны трагічных наступстваў

Міністэрства ўнутраных спраў правядзе летам творчыя і прафілактычныя мерапрыемствы для дзяцей і бацькоў, сярод іх будуць велаэстафеты, віктарыны і алімпіяды.

«Асаблівую ўвагу мы аддаём правядзенню прафілактычных мерапрыемстваў з бацькамі, — паведаміў старшы інспектар па асаблівых даручэннях аддзела па арганізацыі работы інспекцый па справах непаўналетніх МУС Васіль ДЗЕМІДОВІЧ. — Міліцыянеры наведаюць працоўныя калектывы, растлумачаць дарослым прычыны і наступствы ДТЗ з удзелам дзяцей, нагадаюць аб правілах бяспечнай перавозкі непаўналетніх, адказнасці за парушэнні правілаў дарожнага руху, а таксама неабходнасці асабістага прыкладу правільных і бяспечных паводзін на дарогах».

Паводле яго слоў, самыя распаўсюджаныя парушэнні, якія здзяйсняюць дзеці і падлеткі, — гэта пераход праезнай часткі ва неўстаноўленых месцах або на забараняльны сігнал святлафора, раптоўны выхад на праезную частку, гульня ў непасрэднай блізкасці ад дарогі. «Акрамя таго, далёка не ўсе юныя ўладальнікі ровараў спешваюцца пры пераходзе дарогі. Сур'ёзнай праблемай застаецца выкарыстанне гаджэтаў на хаду: навушнікаў, пагружэнне ў экран мабільнага тэлефона пры пераходзе праезнай часткі, а нярэдка і пры руху на ровары ці самакаце. У такіх умовах падлеткі не могуць адэкватна ацаніць дарожную абстаноўку, што нярэдка цягне трагічныя наступствы», — дадаў старшы інспектар.

ДАІ, у сваю чаргу, правядзе прафілактычныя акцыі для дзяцей і бацькоў, а таксама рэйдавыя мерапрыемствы па спыненні парушэнняў правілаў дарожнага руху. Асаблівую ўвагу ўдзеляць выкананню кіроўцамі хуткаснага рэжыму, правілаў праезду пешаходнага перахода і бяспечнай перавозкі дзяцей. ДАІ заклікае быць як мага больш уважлівымі пры руху паблізу дзіцячых устаноў, праездзе праз нерэгуляваныя пешаходныя пераходы, паблізу прыпынкаў грамадскага транспарту і асабліва на дваровай тэрыторыі.

«Не варта забываць пра бяспеку на чыгуначным транспарце. Толькі ў гэтым годзе зарэгістраваны тры выпадкі траўміравання дзяцей на чыгунцы. Прыкладна тыдзень таму дзесяцігадовая дзяўчынка здымала на мабільны тэлефон відэа і не ўбачыла электрацягнік, які набліжаўся, у выніку чаго атрымала траўмы, несумяшчальныя з жыццём», — паведаміў Васіль Дземідовіч.

Дзе не месца для гульняў?

Летам у дзяцей з'яўляецца больш вольнага часу, яны часцей знаходзяцца на вуліцы і нярэдка застаюцца без нагляду дарослых. «Усё гэта прыводзіць да росту траўматызму і колькасці трагічных здарэнняў. Таму мы звяртаемся да бацькоў: кантралюйце дзяцей, не пакідайце без нагляду, асабліва малых. Падлеткам нагадвайце аб правілах паводзін на вадзе, небяспецы купання, нырання. Сёлета ўжо адзначана некалькі фактаў, калі дзеці танулі», — дадаў старшы інспектар.

«Падлеткам уласцівае імкненне бавіць час у незвычайных і небяспечных месцах, адсюль нярэдкія здарэнні на закінутых, безгаспадарных будынках. Менавіта адсутнасць кантролю з боку дарослых прыцягвае шукальнікаў прыгод у такія месцы. Трэба папярэджваць іх, што будоўля, закінуты будынак — не месца для гульняў, бо тыя могуць у любы момант абрынуцца і траўміраваць», — падкрэсліў Васіль Дземідовіч.

Старшы інспектар звярнуў увагу таксама на наступную акалічнасць: з надыходам вясенне-летняга перыяду штогод рэгіструюцца няшчасныя выпадкі, звязаныя з падзеннем дзяцей з вокнаў. «Малы ўспрымае маскітную сетку як перашкоду, свабодна абапіраецца на яе і ў выніку адбываецца няшчасны выпадак. Таму не грэбуйце сродкамі засцярогі на вокнах — іх трэба абсталяваць адмысловымі блакавальнымі прыладамі. Адкрываючы вокны на праветрыванне, неабходна пераканацца, што дзіця знаходзіцца пад наглядам. Увогуле лепш не паказваць, як адчыняюцца вокны, а таксама не ставіць побач з імі мэблю, каб не спрашчаць малому задачу апынуцца на падаконніку», — звярнуў увагу старшы інспектар.

Дапамога побач!

Прэс-сакратар Міністэрства па надзвычайных сітуацыях Віталь НАВІЦКІ паведаміў, што з пачатку года падраздзяленні МНС выратавалі 21 дзіця, у тым ліку пяць — на пажарах. Астатнія сітуацыі звязаныя з захрасаннем рук і ног у радыятарах ацяплення, пральных машынах, фантанах, а таксама выпадкамі, калі дзеці залазяць на дрэвы, а потым не могуць адтуль спусціцца.

— Адказнасць у падобных выпадках ляжыць, зразумела, на дарослых. Менавіта таму цяпер самы лепшы час пагаварыць з дзецьмі пра бяспеку, — падкрэсліў Віталь Навіцкі. — Калі, напрыклад, вы вырашылі адправіць дзіця да бабулі ў вёску, то трэба нагадаць пра небяспеку адпачынку на вадзе, знаходжання ў лесе. Пакажыце дзіцяці мабільную праграму «МНС Беларусі: дапамога побач» з тэстамі, а таксама мультсерыял «Чароўная кніга».

Па словах прэс-сакратара, работнікі МНС ужо наведалі ўсе аздараўленчыя лагеры да пачатку іх работы. «Пад нашым асаблівым кантролем — спраўнасць сістэм пажарнай аўтаматыкі і аснашчанасць першаснымі сродкамі пажаратушэння, а таксама навучанне персаналу дзеянням у выпадку ўзнікнення той ці іншай надзвычайнай сітуацыі. Усе навучаныя і ведаюць, што рабіць і як дзейнічаць, каб такія сітуацыі не адбываліся», — запэўніў ён.

Новыя крыніцы небяспекі

Намеснік дырэктара па арганізацыйна-метадычнай рабоце РНПЦ траўматалогіі і артапедыі Кірыл КРЫВАРОТ паведаміў, што ўсяго за 2020 год па краіне былі зарэгістраваны 145 704 першасныя звароты дзяцей і падлеткаў ва ўзросце да 17 гадоў уключна з траўмамі рознай лакалізацыі.

«Самы траўмянебяспечны ўзрост — 10-13 гадоў (44 948 траўмаў), на другім месцы ўзроставая група ад 5 да 9 гадоў (37 152 траўмы) і на трэцім — 15-17 гадоў (25 471 траўма). Сярод траўмаў пераважаюць бытавыя (54,4 %), на другім месцы — вулічныя (34,6 %), на трэцім — спартыўныя (5,7 %), далей — школьныя (2,2 %), транспартныя (0,4 %) і іншыя. На першым месцы па частаце — траўмы канечнасцяў (74,7 %): удары, вывіхі, расцяжэнні і пераломы, на другім — пашкоджанні галавы і шыі
(12,3 %)», — паведаміў спецыяліст.

Кірыл Крыварот заўважыў, што апошнім часам з'явіліся і ўчасціліся новыя віды траўмаў, атрыманыя пры скачках на батуце, катанні на цюбінгах і іншых сродках індывідуальнай мабільнасці (веласіпедах, роліках, скейтбордах, электрасамакатах, электраскутарах, манаколах). Так, за 2020 год пацярпелі ад скачкоў на батуце 499 чалавек. Падчас катання на цюбінгах і санках былі атрыманы 414 траўмаў, на ровары — 2 083, роліках і скейтбордах — 820, электрасамакатах і электраскутарах — 360. І 39 дзяцей былі траўміраваны падчас катання на манаколе.

Надзея НІКАЛАЕВА.


Будзь у курсе!

Плануецца, што гэтым летам дзяцей на аздараўленне ў Беларусі будуць прымаць 5,6 тысячы лагераў, з іх 1,4 тысячы кругласутачных. Усяго плануецца арганізаваны адпачынак 342 тысяч навучэнцаў, з якіх 197,6 тысячы будуць праходзіць аздараўленне ў лагерах з дзённым знаходжаннем і 144,4 тысячы — з кругласутачным.

Загаловак у газеце: Профільныя, працоўныя, школьныя і загарадныя

Выбар рэдакцыі

Эканоміка

«Прадам утульную кватэру, а куплю яшчэ лепшую». А пра падаткі вы не забыліся?

«Прадам утульную кватэру, а куплю яшчэ лепшую». А пра падаткі вы не забыліся?

Адна мая добрая знаёмая вырашыла палепшыць свае жыллёвыя ўмовы — прадаць сваю двухпакаёвую кватэру і купіць трохпакаёвую.

Калейдаскоп

Усходні гараскоп на наступны тыдзень

Усходні гараскоп на наступны тыдзень

БЛІЗНЯТЫ. Калі ёсць цікавыя ідэі, то менавіта цяпер яны будуць запатрабаваныя і нарэшце ажыццёвяцца. Тыдзень прынясе знаёмствы з новымі людзьмі, спатканні, вандроўкі і шмат яркіх уражанняў. Асабістае жыццё рэзка зменіцца, прычым менавіта так, як вы марылі. Вы больш не будзеце самотныя, сітуацыя вырашыцца на вашу карысць.

Грамадства

Ці варта засцерагацца ад вяртання анамальнай спякоты? Дзмітрый Рабаў расказаў пра надвор’е на астатнюю частку лета

Ці варта засцерагацца ад вяртання анамальнай спякоты? Дзмітрый Рабаў расказаў пра надвор’е на астатнюю частку лета

«Верхавіна лета» прайшла, і ўжо мала хто памятае, што першая дэкада чэрвеня была халаднаватай і з замаразкамі.

Грамадства

Усё што трэба ведаць пра пляжны сезон

Усё што трэба ведаць пра пляжны сезон

У апошнія тыдні на краіну абрынулася небывалая спякота...