Жыхары аграгарадка Лясны расказалі пра свае праблемы на прыёме ў Наталлі Качанавай

Члены Прэзідыума Савета Рэспублікі правялі ўчора адзіны дзень прыёму грамадзян у Мінскім раёне: аг. Лясны, Сеніца, Заслаўе, г. п. Мачулішчы. Такую форму работы са зваротамі людзей прымянілі ўпершыню, каб паглядзець на праблемы па-іншаму, атрымаць аператыўную і актуальную інфармацыю. Карэспандэнт «Звязды» пабывала на прыёме старшыні Савета Рэспублікі Наталлі КАЧАНАВАЙ у Бараўлянскім сельвыканкаме (аг. Лясны).

Чыя вежа ў Валяр'янаве?

Мінскі раён — гэта прысталічча з вялікай шчыльнасцю пражывання, мноствам людзей і сваімі асаблівымі праблемамі. Падчас прыёму, на які запісалася каля 30 чалавек, высветлілася, што найбольш вострыя пытанні датычацца праблем з водазабеспячэннем, добраўпарадкаваннем і абслугоўваннем жылля.

Перадаць на баланс водаканала Мінскага раёна воданапорную вежу, водаправодныя сеткі і свідравіну ўжо больш за год хочуць жыхары 170 домаўладанняў вёскі Валяр'янава. Яны сцвярджаюць, што цяпер камунікацыі знаходзяцца ў руках камерсантаў, і адмаўляюцца плаціць грошы за ваду, бо не ведаюць, у чыю кішэню яны «пацякуць». Праблему высвятляюць у тым ліку праз суд і АБЭЗ (аддзел па барацьбе з эканамічнымі злачынствамі), аднак усе скаргі «блакіруюцца на ўзроўні раённага выканкама», упэўнена Кацярына Іванаўна, якая прыйшла на прыём:

— Фактычна цяпер сеткі безгаспадарчыя, хоць на паперы належаць кааператыву індывідуальных забудоўшчыкаў (КІЗ) «Лугавы», у якога няма старшыні. На вежу няма праваўстаноўных дакументаў. Мы хочам перайсці на баланс дзяржавы, каб мець дакладныя тарыфы, абслугоўванне і санітарны кантроль вады.

Уладзімір ЮРГЕВІЧ, старшыня Мінскага райвыканкама, у адказ заўважыў, што сеткі належаць КІЗ «Лугавы»:

— У нас ёсць рашэнне 2019 года аб водавыкарыстанні свідравіны, якая ўваходзіць у склад інжынерных камунікацый, так што сеткі небезгаспадарчыя... Няхай збіраецца сход, які і вырашыць, ці перадаваць камунікацыі водаканалу.

— Водныя камунікацыі, якія маюць такі ўплыў на жыццё людзей, не павінны знаходзіцца невядома ў чыіх руках, — пагадзілася з заяўніцай Наталля Качанава і запэўніла, што вырашаць гэтае пытанне будуць на ўзроўні краіны з удзелам ЖКГ і МУС.

Нітратная вада і затапленні ў Каралёвым Стане

Праблема з чыстай пітной вадой з лютага пануе ў дамах жыхароў вуліц Школьная, Зарэчная, Магістральная, Маскоўская ў вёсцы Каралёў Стан, расказала заяўніца Ірына
Георгіеўна:

— У вадзе павышаны ўзровень нітратаў, ужываць яе нельга. Дагэтуль жыхарам і ў школы, і ў дзіцячыя сады прывозяць цыстэрны з вадой. Спачатку раённы водаканал уласнымі сіламі спрабаваў чысціць сеткі. Пасля высветлілася, што трэба набываць абсталяванне для фільтрацыі вады. А нядаўна сказалі, што пастаўшчыкі не могуць прывезці патрэбныя рэагенты.

Кіраўнік сталічнага райвыканкама патлумачыў, што комплекс па водаачыстцы вады ад нітратаў ужо збіраецца, неабходныя рэагенты будуць, і да 15 ліпеня пітная вада ізноў з'явіцца ў жыхароў. Наталля Качанава скараціла тэрмін гатоўнасці работ па комплексе да 1 ліпеня.

Адсутнасць асфальту на вуліцы Школьная ў пэўных месцах — яшчэ адна праблема, якую ўзняла Ірына Георгіеўна.

— Мы дадзім даручэнне даследаваць, наколькі сітуацыя праблематычная, магчыма, на 2022 год гэту вуліцу трэба будзе ўключыць у план работ, — паабяцала старшыня Савета Рэспублікі.

Жыхарка Мінскага раёна Тамара Уладзіміраўна папрасіла адрамантаваць страху на доме, бо вада залівае шчыток на лесвічнай пляцоўцы, і жыхары перыядычна застаюцца без святла. Два-тры разы на год выклікаюць аварыйную службу.

— У 2018-м у вашым доме рабілі бягучы рамонт страхі. У найбліжэйшы час вырашым пытанне з ліўневай каналізацыяй, якая праходзіць праз дом. Стыкі сцен, страху і трэшчыны па фасадзе адрамантуем да 1 верасня, — паабяцаў старшыня райвыканкама.

— У людзей павінна быць суха, а ад дажджу ці ад каналізацыі іх залівае — няважна, — выказалася Наталля Качанава. — Найперш трэба зрабіць страху, каб не траціць лішнія сродкі на метад спроб і памылак. Бяда ў тым, што часта бягучыя рамонты робяцца для «адчапнога». Гэта часовыя работы, а трэба выявіць прычыну заліцця страхі, каб пасля ўстараняць гэта.

Якасць вады, паветра, харчавання — першасныя задачы і жыццёва важныя пытанні, якія мясцовым уладам трэба аператыўна вырашаць, бо ад гэтага залежыць здароўе нашых грамадзян. Многія пытанні, з якімі звярнуліся людзі, ужо вырашаюцца, рэзюмавала старшыня Савета Рэспублікі і паабяцала, што такія формы работы са зваротамі грамадзян будуць практыкаваць і ў іншых рэгіёнах краіны.

Ірына СІДАРОК