Вы тут

У Сусветны дзень донара кроў здалі чыноўнікі і кіраўнікі грамадскіх арганізацый


Учора, у Сусветны дзень донара, здалі кроў міністр аховы здароўя Дзмітрый Піневіч, генеральны сакратар Беларускага Чырвонага Крыжа Вольга Мычко, намеснік міністра працы і сацыяльнай абароны Іван Лаўрыновіч, кіраўнік краінавага офіса Сусветнай арганізацыі аховы здароўя ў Беларусі Масуд Дара. Выязны пункт арганізавала Беларускае таварыства Чырвонага Крыжа на базе свайго вучэбнага цэнтра сумесна з РНПЦ трансфузіялогіі і медыцынскіх тэхналогій.


Мі­ністр ахо­вы зда­роўя Дзміт­рый Пі­не­віч (злева) у час здачы крыві.

Дзмітрый Піневіч у размове з журналістамі падзяліўся, што кроў здае ўжо шмат гадоў, з 17-гадовага ўзросту, калі паступіў у Ленінградскую ваенна-медыцынскую акадэмію. Цяпер працягвае традыцыю ў якасці міністра аховы здароўя.

— Донарства з'яўляецца элементам фарміравання адказнасці кожнага з нас за тых, каму патрэбна кроў. Прыкладна 100 тысяч донараў штогод здаюць кроў, з яе рыхтуецца каля 240 тон разных кампанентаў. Вельмі важна, што кроў цяпер менш запатрабавана ў экстраннай дапамозе, бо выкарыстоўваюцца новыя тэхналогіі, у тым ліку ў правядзенні планавых і экстранных аперацый, адпаведна, менш кровастрат. Таму донарская кроў больш ідзе на перапрацоўку. І гэтыя кампаненты планава выкарыстоўваюцца ў медыцынскай дапамозе дзецям і дарослым. Таму кожны, хто здае кроў, уносіць часцінку сваёй дапамогі тут і цяпер дзецям і дарослым, якія маюць у гэтым патрэбу, — адзначыў Дзмітрый Піневіч.

Ён падкрэсліў, што, нягледзячы на падрыхтаваны адпаведны законапраект, татальнага бязвыплатнага донарства ў Беларусі не будзе. Пры шэрагу паказанняў здача крыві і плазмы застанецца платнай. Бязвыплатнае донарства пры гэтым таксама не бясплатнае. Усе донары атрымліваюць кампенсацыі на харчаванне, аднаўленне і за патрачаны рабочы дзень.

— Бязвыплатнае донарства — гэта індыкатар фарміравання грамадства, яго спеласці і гатоўнасці да садзейнічання і аказання дапамогі, — адзначыў Дзмітрый Піневіч.

Генеральны сакратар Беларускага Чырвонага Крыжа Вольга Мычко таксама традыцыйна сярод тых, хто штогод бязвыплатна здае кроў.

— Паводле закона, падтрымка бязвыплатнага донарства з'яўляецца адной з важных задач Беларускага таварыства Чырвонага Крыжа. Сённяшняя акцыя — гэта падвядзенне вынікаў той работы, якая праводзіцца на працягу ўсяго года, — адзначыла Вольга Мычко.

Толькі за два тыдні чэрвеня больш за 600 валанцёраў і работнікаў Чырвонага Крыжа сталі донарамі, учора — яшчэ 380 чалавек. Агулам амаль тысяча валанцёраў гэтай арганізацыі паўдзельнічала ў акцыі бязвыплатнага донарства.

— Напэўна, многія бачылі фільм «Плаці наперад». Хочацца спадзявацца, што нікому з нас донарская кроў не спатрэбіцца, але гэта тая гісторыя, калі, зрабіўшы запас, заплаціўшы наперад, мы дапамагаем іншым, — рэзюмавала Вольга Мычко.

Дырэктар РНПЦ трансфузіялогіі і медыцынскіх тэхналогій Фёдар Карпенка адзначыў, што донарская кроў патрабуецца кожны дзень.

— Штодзённа ў краіне адбываецца каля 2—2,5 тысячы пераліванняў. І гэта магчыма толькі дзякуючы донарам, якія платна ці бязвыплатна, але трацяць свой час, рэсурсы і энергію, каб дапамагчы іншаму.

На выязным пункце ўчора было нарыхтавана каля 30 літраў розных кампанентаў крыві, што дазволіць аказаць дапамогу 70 чалавекам. Донарская кроў і яе кампаненты запатрабаваны пры планавых аперацыях, аператыўнай родадапамозе, трансплантацыях органаў і тканак, пры вялікіх аперацыях у кардыялогіі, кардыяхірургіі, анкалогіі, дзіцячай анкагематалогіі.

Алена КРАВЕЦ

Загаловак у газеце: Дапамога тут і цяпер

Выбар рэдакцыі

Калейдаскоп

«Ураджайны» тэст

«Ураджайны» тэст

Надыходзіць жнівень — самы ўраджайны, працоўны, смачны час. І наш чарговы тэст менавіта пра ўраджай і ўсё, што з ім звязана.

Грамадства

Лета выходзіць на фінішную прамую! Чаго чакаць ад надвор'я ў жніўні? Прагноз ад Дзмітрыя Рабава

Лета выходзіць на фінішную прамую! Чаго чакаць ад надвор'я ў жніўні? Прагноз ад Дзмітрыя Рабава

У жніўні цяпла будзе ўдосталь, але без дажджу і маланкі не абыдзецца.

Калейдаскоп

Усходні гараскоп на наступны тыдзень

Усходні гараскоп на наступны тыдзень

КАЗЯРОГ. На гэтым тыдні будзе карыснае ўменне аналізаваць сітуацыю і паводзіны людзей і рабіць правільныя высновы. Паспрабуйце быць гранічна сумленнымі з самімі сабой, зніміце ружовыя акуляры. Цяпер пажадана не эпаціраваць навакольных экстравагантнасцю і рэзкімі развагамі. 

Грамадства

Адзін дзень у Вязынцы: вандруем разам са «Звяздой» па Беларусі

Адзін дзень у Вязынцы: вандруем разам са «Звяздой» па Беларусі

У летні час так хочацца на мора, ці, хоць бы ў падарожжа...