Вы тут

Кліматычныя рэкорды будуць пабіты і ў чэрвені? Што, плюс 34 не мяжа?


Яшчэ далёка не сярэдзіна лета, а сонца ўжо вырашыла нас расплавіць. У нашу краіну, як заўсёды, раптам, занесла суперспякотнае надвор'е. Неймавернае цяпло распаўсюдзіцца па тэрыторыі Беларусі не толькі ў выхадныя, спякота будзе нарастаць і на наступным тыдні, паведамляюць спецыялісты Рэспубліканскага цэнтра па гідраметэаралогіі, кантролі радыеактыўнага забруджвання і маніторынгу навакольнага асяроддзя Мінпрыроды.


А ўсё таму, што антыцыклон Зое прынёс на тэрыторыю нашай краіны цёплае, сонечнае надвор'е. Ён прастаіць у нас да канца тыдня, таму дажджоў не чакаецца наогул, а спякота будзе толькі нарастаць. У сувязі з гэтым эксперты раяць успомніць асноўныя правілы паводзін у спякоту: не выходзіць без асаблівай патрэбы на вуліцу падчас максімальнай сонечнай актыўнасці, а калі ўсё ж выйшлі, не забывайце пра галаўны ўбор і абавязкова вазьміце бутэлечку з вадой. На вуліцы лепш трымацца ў цені і перыядычна заходзіць у грамадскія памяшканні з кандыцыянерамі.

Сёння, як, зрэшты, і ў суботу, нядзелю і панядзелак, ападкаў не чакаецца. Неба будзе абсалютна чыстым. Вецер прагназуецца заходні, паўднёва-заходні ўмераны. Максімальная тэмпература паветра ў пятніцу складзе 25—31 цяпла. Так, цяпла, а далей будзе час спёкі.

Умераны паўночна-заходні вецер прагназуецца і ў суботу. Пачне павышацца тэмпература паветра ўжо ўначы, калі чакаецца ад плюс 11 градусаў да 16 цяпла. Удзень стане прыпякаць як у ліпені — ад плюс 27 да плюс 32 градусаў.

У нядзелю і панядзелак грамадзяне нашай краіны, асабліва гараджане, будуць праходзіць выпрабаванне супердушным надвор'ем. Дажджоў не будзе, а вецер прагназуецца паўднёва-ўсходні ўмераны. Тэмпература паветра ўначы складзе ўжо 13—18 градусаў вышэй за нуль, удзень — ад плюс 28 градусаў да 33 цяпла. Падобна, на гэтым абсалютныя сонечныя дні ў нас скончацца, але спякота не знікне.

У аўторак будзе пераважна без ападкаў, але ўдзень у асобных раёнах па заходняй частцы краіны пройдуць кароткачасовыя дажджы і навальніцы. Тэмпература паветра ўначы складзе 13—20 цяпла, удзень — усё тыя ж плюс 28—33 градусы. Выключна ў асобных раёнах краіны пройдуць кароткачасовыя дажджы і ў сераду. Уначы ў гэты дзень тыдня ў нас будзе надзвычай цёпла, калі тэмпература паветра не апусціцца ніжэй 15—22 цяпла. Удзень нам таксама будзе не салодка: максімальная тэмпература паветра ад плюс 28 градусаў да 34 цяпла.

Спецыялісты Белгідрамета паведамляюць, што тэмпература вады ў рэках і вадаёмах нашай краіны складае плюс 18—23 градусы. Сіноптыкі рэкамендуюць быць уважлівымі і асцярожнымі падчас адпачынку каля вадаёмаў. Акрамя таго, у сувязі з цёплым і сухім надвор'ем павялічваецца і клас пажаранебяспекі. Таму, адпраўляючыся ў лес, не варта выкідваць у траву недакуркі і падпаленыя запалкі.

Сяргей КУРКАЧ

Прэв’ю — pixabay.com 

Выбар рэдакцыі

Культура

Янка Купала: з ХХ стагоддзя ў ХХІ. Часопіс «Роднае слова» прэзентаваў сваю версію сучаснага купалазнаўства

Янка Купала: з ХХ стагоддзя ў ХХІ. Часопіс «Роднае слова» прэзентаваў сваю версію сучаснага купалазнаўства

У Дзяржаўным літаратурным музеі Янкі Купалы 5 кастрычніка адбылася прэзентацыя «Янка Купала: з ХХ стагоддзя ў ХХІ», прысвечаная ліпеньскаму

Грамадства

Беспілотны і электрычны транспарт: што прапануюць беларускія вучоныя

Беспілотны і электрычны транспарт: што прапануюць беларускія вучоныя

Аб'яднаны інстытут машынабудавання Нацыянальнай акадэміі навук Беларусі сёлета святкуе 65-годдзе.