Вы тут

Качанава сустрэлася са студэнтамі медыцынскіх ВНУ


Старшыня Савета Рэспублікі Наталля Качанава сустрэлася са студэнтамі медыцынскіх ВНУ напярэдадні Дня медыцынскіх работнікаў, перадае БелТА.


Фота: БелТА

«На нашай сустрэчы прысутнічаюць маладыя людзі з усіх медыцынскіх ВНУ краіны, якія атрымліваюць цудоўную прафесію. І наогул, мне здаецца, што гэта нават не прафесія і не спецыяльнасць — гэта прызванне, лад жыцця. Паколькі, па-першае, трэба бязмерна любіць людзей. Па-другое, трэба разумець, што, выбраўшы прафесію ўрача, ты вызначыў яе галоўнай у жыцці. Калі ты як урач любіш людзей, то лічы, што твая прафесія адбылася. Я заўсёды кажу — можна вылечыць часам і словам. Калі ўрач павёў сябе разважліва, натхніў пацыента, то гэта вялікі залог поспеху ў яго лячэнні. Акрамя таго, урач павінен вучыцца на працягу ўсяго жыцця», — сказала Наталля Качанава.

Спікер адзначыла, што здароўе грамадзян у нашай краіне заўсёды ў прыярытэце. «І, вядома, дзякуючы нашым урачам у нас сёння створана такая добрая сістэма аховы здароўя. Умацоўваецца матэрыяльна-тэхнічная база. Выбудавана дакладная структура, пачынаючы ад сельскіх ФАПаў і заканчваючы рэспубліканскімі навукова-практычнымі цэнтрамі, якіх у нас 17 у краіне. Беларусь захавала інфекцыйныя бальніцы, санэпідслужбы, якіх у некаторых краінах проста няма, — гэта яшчэ адзін доказ таго, што мы на правільным шляху, — расказала яна. — У Беларусі ў сістэму аховы здароўя накіроўваюцца значныя сродкі. У нас сацыяльна арыентаваная дзяржава і такая палітыка краінай праводзілася заўсёды, дзе галоўнае — гэта чалавек, клопат аб ім. І тыя падыходы, якія ёсць пры фарміраванні дзяржаўных праграм, чатыры нацыянальныя праграмы дэмаграфічнай бяспекі, што былі прыняты, — гэта дае свае вынікі, павялічваецца працягласць жыцця».

Наталля Качанава павіншавала студэнтаў з надыходзячым прафесійным святам. «На працягу ўсяго гэтага тыдня мы сустракаемся з медыцынскімі работнікамі, якія працуюць у сістэме аховы здароўя краіны. Дзякуем ім за работу, таму што для любога чалавека яго здароўе, родных і блізкіх — гэта самае важнае. Хацелася б пажадаць, каб ваш выбар супаў з тым, чым вы будзеце займацца на працягу ўсяго свайго жыцця. Таму што гэта вельмі важна — зрабіць усвядомлены выбар будучай прафесіі, — падкрэсліла яна. — Я хачу пажадаць вам шчасця, здароўя, любові, каб усе вашы мары спраўдзіліся, вы знайшлі сябе ў гэтай прафесіі і рэалізаваліся, выконваючы тую функцыю, якая будзе ўскладзена на вас. А гэта захаванне жыцця і здароўя нашых грамадзян. Урачы суправаджаюць нас на працягу ўсяго жыцця. Вы даяце жыццё. Таму ўдачы і поспехаў вам у гэтай рабоце. І яшчэ я вельмі хацела б вам пажадаць, каб вы рэалізавалі сябе ў сваёй краіне. І каб вы зрабілі ўсё для таго, каб наша краіна была такой жа прыгожай, светлай, чыстай, спакойнай, паспяховай. І гэта шмат у чым залежыць ад вас, таму што вы тыя, хто ідзе за намі».

Сённяшняе мерапрыемства ініцыявана Пастаяннай камісіяй па ахове здароўя, спорце і турызме Маладзёжнага парламента пры Нацыянальным сходзе. Традыцыйна сустрэча прайшла ў фармаце адкрытага дыялогу.

«Гэта вельмі важнае мерапрыемства, паколькі мы прадаўжаем яшчэ весці барацьбу з каранавіруснай інфекцыяй і студэнты-медыкі ў тым ліку вельмі актыўна ўключыліся ў барацьбу з гэтым сур’ёзным выклікам для ўсяго свету. У студэнтаў была магчымасць задаць хвалюючыя іх пытанні наконт арганізацыі работы ўстаноў аховы здароўя ў перыяд пандэміі, размеркавання, рэзідэнтуры, прафарыентацыі. Я лічу, што такі кантакт са спікерам Савета Рэспублікі — магчымасць атрымаць дакладныя і канструктыўныя адказы на ўсе хвалюючыя пытанні», — сказаў старшыня Пастаяннай камісіі Уладзіслаў Волчак.

Студэнтка 4-га курса Гомельскага дзяржаўнага медыцынскага ўніверсітэта Дар’я Флейтух з дзяцінства марыла стаць доктарам. «Я свядома вырашыла, што мне трэба ісці ў медыцыну. Заўсёды хацелася дапамагаць людзям. Я буду неанатолагам, — падзялілася дзяўчына. — Сёння нам вельмі прыемна тут знаходзіцца. Спадзяюся, што гэта не апошняя сустрэча. Бо гэта новыя магчымасці для раскрыцця свайго патэнцыялу. Напрыклад, у нас у ВНУ адкрылася пярвічная арганізацыя Беларускага саюза жанчын. Я падтрымліваю маладзёжнае жаночае супольніцтва, мы агучваем свае ідэі, прапановы. І парламент — гэта выдатная магчымасць праявіць сябе, паказаць вынікі сваёй работы».

Студэнт 4-га курса стаматалагічнага факультэта Беларускага дзяржаўнага медыцынскага ўніверсітэта Яўген Маханькоў прадаўжае медыцынскую дынастыю. «Яшчэ з ранняга дзяцінства галоўным прыкладам для мяне была мама. Яна працуе ўрачом-неўролагам, загадчыца неўралагічнага аддзялення ў дзіцячай бальніцы. Паступіць у медыцынскі ўніверсітэт было мэтай усяго майго школьнага жыцця. І я спраўдзіў сваю мару і не шкадую аб зробленым выбары», — дадаў ён.

Выбар рэдакцыі

Грамадства

«Сацыяльная зніжка» — каму і на што? Як купіць прадукты танней на 10 %

«Сацыяльная зніжка» — каму і на што? Як купіць прадукты танней на 10 %

На зніжку могуць разлічваць пенсіянеры, шматдзетныя сем’і.

Палітыка

Андрэй Савіных: Якасць абраных стратэгій не правяраецца ў ідэальных сітуацыях

Андрэй Савіных: Якасць абраных стратэгій не правяраецца ў ідэальных сітуацыях

Беларускі парадак дня нікому не дае расслабіцца, час не дазваляе.

Грамадства

Экстраная дапамога. Як працуе Цэнтр аператыўнага кіравання МНС

Экстраная дапамога. Як працуе Цэнтр аператыўнага кіравання МНС

Дзяжурныя службы — вушы і вочы Міністэрства па надзвычайных сітуацыях. 

Палітыка

Пасол Беларусі ў КНР: З 1992-га тавараабарот з Кітаем вырас больш як у 130 разоў

Пасол Беларусі ў КНР: З 1992-га тавараабарот з Кітаем вырас больш як у 130 разоў

Наперадзе юбілей беларуска-кітайскіх адносін — 30 гадоў.