Сотні населеных пунктаў Магілёўскай і Віцебскай вобласці заставаліся без электрычнасці

Магілёў і 717 населеных пунктаў вобласці засталіся без электразабеспячэння ў выніку аварыі на Лукомльскай ГРЭС.

Пра гэта паведамілі ў Магілёўскім абласным упраўленіі МНС.

Адключэнні адбыліся ўчора ў 21.41. Без святла акрамя Магілёва ў вобласці засталіся населеныя пункты Бялыніцкага (181), Круглянскага (140), Шклоўскага (200), Горацкага (34) і Магілёўскага (162) раёнаў.

— У 21:41 выратавальнікам паступіла паведамленне аб узгаранні ў другой секцыі трансфарматарнай падстанцыі ТН-330 на Лукомскай ГРЭС, — паведамілі ва ўпраўленні. — За час адключэння ратавальнікамі здзейснена 34 выезды на аказанне дапамогі насельніцтву, у тым ліку па дэблакіроўцы людзей з кабінаў ліфтаў і падачы электрычнасці на апараты ШВЛ. У 22:39 пажар ліквідаваны, ніхто не пацярпеў.

Энергетыкі Віцебскай і Магілёўскай абласцей аператыўна ліквідавалі наступствы аварыі.

Для аператыўнага вырашэння пытанняў і ліквідацыі ўзгарання працуе сітуацыйны штаб Камісіі па надзвычайных сітуацыях пры Віцебскім аблвыканкаме.

Нэлі ЗІГУЛЯ

Энергазабеспячэнне на Віцебшчыне адноўлена поўнасцю

У сераду пад ноч многія жыхары двух прыгранічных з Расіяй Віцебскай і Магілёўскай абласцей Беларусі адчулі праблемы з-за адключэння электразабеспячэння. Яны пачаліся каля дзесяці гадзін вечара.

Як удакладніла «Звяздзе» афіцыйны прадстаўнік Віцебскага абласнога ўпраўлення МНС Соф’я Глінская, у Віцебскай вобласці было адключана ад электразабеспячэння 966 населеных пунктаў, 115 фермаў, 14 бальніц...

Без энергіі заставаліся Орша і Аршанскі, Талачынскі, Дубровенскі, Сенненскі раёны. На працягу гадзіны электразабеспячэнне было адноўлена.

Высветлілася, што надзвычайнае здарэнне раённых маштабаў адбылося з-за ўзгарання абсталявання на Лукомльскай ДРЭС.

У 21:41 выратавальнікам паступіла паведамленне аб узгаранні ў другой секцыі трансфарматарнай падстанцыі. Туды неадкладна былі накіраваныя падраздзяленні МНС. Для аператыўнага вырашэння пытанняў, звязаных з адключэннем электразабеспячэння, працаваў сітуацыйны штаб Камісіі па надзвычайных сітуацыях пры Віцебскім аблвыканкаме.

У 22:39 пажар ліквідаваны падраздзяленнямі МНС, ніхто не пацярпеў.

Тое, што падача электрычнай энергіі ў Віцебскую і Магілёўскай вобласці адноўлена поўнасцю, канстатавалі і ў РУП «Віцебскэнерга».

У сувязі з тым, што спякота не сыходзіць, аварыйныя брыгады прадпрыемства працягваюць працаваць ва ўзмоцненым рэжыме. Аператыўныя аварыйна-аднаўленчыя брыгады ўзмацнілі. Наладзілі больш цеснае ўзаемадзеянне з Міністэрствам па надзвычайных сітуацыях і сумежнікамі. Інжынерна-тэхнічным персаналам ўзмоцнены кантроль за бесперабойнай падачай электраэнергіі, а таксама ў адпаведнасці з распрацаванымі графікамі — за ўзроўнем масла ў масланапоўненым абсталяванні. Дадаткова аглядаецца энергаабсталяванне і найбольш нагружаныя лініі электраперадачы.

Высокая тэмпература пагражае ўзнікненнем лясных пажараў, якія могуць прывесці да абрыву правадоў на лініях электраперадачы падаючымі дрэвамі, нагадалі ў энергетычнай службе вобласці. Таму трэба быць асцярожнымі ў раёне ліній электраперадачы.

Прымаюцца неабходныя дзеянні для папярэджання надзвычайных сітуацый.

Аляксандр ПУКШАНСКІ