Куды адправіцца веласіпедыстам? Маршруты ўздоўж Аўгустоўскага канала

У Гродзенскім раёне пракладзена каля дзесяці веламаршрутаў, агульная працягласць якіх складае ад 12 да 72 кіламетраў. Тры з іх пралягаюць побач з Аўгустоўскім каналам. Там жа, недалёк ад шлюзаў, можна ўзяць у арэнду ровар. Сярэдняя цана пагадзіннай арэнды — 5 рублёў.

Тыя, хто плануе адправіцца ў падарожжа на ровары ўздоўж Аўгустоўскага канала, можа даведацца дэталі маршрутаў у турысцка-інфармацыйным цэнтры ў Сапоцкіна. Вёска знаходзіцца па дарозе да шлюзаў Дамброўка і Нямнова. Тут жа турыстам прапануюць узяць бясплатныя даведнікі. Побач дзейнічае пракат і сэрвіс веласіпедаў. Арэндаваць двухколавы транспарт таксама можна на шлюзе Дамброўка і ў вёсцы Нямнова. Для турыстаў даступна звыш ста ровараў.

Акрамя таго, дабрацца да гідраўлічных збудаванняў можна з Гродна на грамадскім транспарце. Ад аўтавакзала з 26 чэрвеня па суботах і нядзелях будзе хадзіць аўтобус «Гродна-Калеты» з прыпынкам «Аўгустоўскі канал» у 10.15 і 19.00. Зваротныя рэйсы — у 11.45 і 20.05.

Для падарожжа на роварах можна выбраць некалькі веламаршрутаў. Да прыкладу, прэзентацыйны «Аўгустоўскі шлях», які мае працягласць 25 кіламетраў і займае прыкладна чатыры гадзіны язды. Ён праходзіць праз пункт пропуску «Лясная-Рудаўка» і беларускія вёскі Лясная, Сонічы і Нямнова, на аднайменным шлюзе якога адбываецца фініш маршруту. Дарожка расчышчана і дагледжана, яе абнаўляюць да кожнага сезона. Па шляху велааматарам даступныя прыгажосці прыроды і ціхая водная роўнядзь канала.
Больш дасведчаныя веласіпедысты могуць выбраць маршрут «АўгустВела» працягласцю 50 кіламетраў, які быў адкрыты два гады таму. Ён звязвае Аўгустоўскі канал з Гродна. Для выгоды турыстаў на маршруце абсталяваны месцы адпачынку: у вёсках Дамброўка, Крулеўшчына, Зарачанка. 

Яшчэ адным звязаным з Аўгустоўскім каналам маршрутам з’яўляецца «Лісіная гара». Аднак гэты кірунак мае ваенную і гістарычную тэматыку. Яго старт і фініш арганізаваны ў вёсцы Нямнова. Працягласць «Лісінай гары» прыкладна складае 72 кіламетры і зойме каля 10 гадзін. Дарога веласіпедыстаў пройдзе праз абеліск на пагранзаставе імя Сівачова (1941 г.) побач з вёскай Галоўчыцы, магілы паўстанцаў (1863 г.) на Лісінай гары. Маршрут таксама пралягае праз вёскі Лясная, Новікі і прыводзіць да палацава-паркавага комплексу Гурскіх у вёсцы Радзівілкі.

Прысвечана ваеннай і гістарычнай тэматыцы Вялікай Айчыннай вайны яшчэ адна веласіпедная дарога. Гэта маршрут «Лінія Молатава». Веласіпедысты праедуць побач з водным каналам 12 кіламетраў і змогуць убачыць Ваенныя доты. Такі агляд можа заняць тры гадзіны.

У цэлым, у Гродзенскім раёне пралягае яшчэ некалькі веласіпедных маршрутаў. У аддзеле спорту і турызму Гарадзенскага райвыканкама растлумачылі, што некаторыя маршруты накладваюцца адзін на аднаго і перасякаюцца, маленькія маршруты паглынаюць большыя і аб’ядноўваюць іх. Так атрымалася з «АўгустВела», які аб’яднаў невялікія ўчасткі.
Па словах загадчыка сектара Віктара САЛАМЫ, гэты маршрут можна праехаць цалкам, але вельмі папулярныя яго канкрэтныя ўчасткі.

У прыватнасці той, што пралягае паблізу Аўгустоўскага канала. Ён пракладзены па цікавых месцах, таму часта турыстаў цікавяць менавіта канкрэтныя сцежкі.

У ведамстве заўважылі, што ў падарожнікаў ёсць магчымасць прыехаць на канал і ўзяць ровар на пракат на месцы, каб адправіцца на маршрут. Хтосьці спецыяльна прыводзіць двухколавы транспарт з сабой на аўтамабіле. Але варта заўважыць, што для некаторых сцежак можа быць неабходна хоць бы мінімальная падрыхтоўка. Не ўсе ўчасткі веламаршрутаў могуць паддацца аматарам.

Аліса СКІБА