Вы тут

Як у Беларусі выконваецца праграма «Сям'я кожнаму дзіцяці»


...Рома нарадзіўся ў лютым 2020-га. Мама адмовілася ад хлопчыка, і ён трапіў у Гомельскі абласны дом дзіцяці. Немаўля, якое па дакументах з'яўлялася грамадзянінам Украіны, у Беларусі чакаў лёс, наканаваны кожнаму іншаземнаму «адмоўніку»: дэпартацыя на радзіму ці жыццё ў беларускіх інтэрнатах да паўналецця. Апошняе адбылося, калі б украінскія органы ўлады не далі дазволу на ўладкаванне Ромы ў сям'ю на тэрыторыі Беларусі. Работнікі Гомельскага дома дзіцяці знайшлі спачатку бабулю хлопчыка і спадзяваліся, што яна аформіць над унукам апеку. Пасля адшукалі і біялагічную маці і доўга працавалі з ёй... У выніку праз год яна прыехала па сына і забрала паперу на адмову ад Ромы.


Гэта гісторыя, што выклікае шчымлівыя пачуцці, — канкрэтны прыклад работы, якой можна ганарыцца, лічаць у Міжнародным дабрачынным аб'яднанні «Дапаможам дзецям разам». У партнёрстве з ААН (ЮНІСЕФ) у Беларусі яно рэалізоўвае на Гомельшчыне праграму «Сям'я кожнаму дзіцяці», у межах якой здзяйсняецца праект «Прафілактыка інстытуалізацыі (дэінстытуалізацыі) дзяцей ранняга ўзросту на аснове ўкаранення індывідуальна-арыентаванай тэхналогіі вядзення выпадку». Вынікі праекта падвялі нядаўна на канферэнцыі ў Гомелі.

За год работы праграмы колькасць малых у Гомельскім абласным доме дзіцяці зменшылася на 35 %. Цяпер тут выхоўваецца 31 непаўналетні, 14 з якіх — паліятыўныя (ім неабходны пастаянны медыцынскі догляд). Менш стала трапляць у інтэрнаты і новых малых. З 61 дзіцяці-сіраты да чатырох гадоў, якія засталіся без апекі бацькоў, 41 уладкаваны ў замяшчальныя сем'і, у тым ліку на ўсынаўленне, у прыёмныя сем'і і дамы сямейнага тыпу.

Павысілася эфектыўнасць работы з сем'ямі, якія знаходзяцца ў цяжкім жыццёвым становішчы. Толькі 31 дзіця з 336 малых да чатырох гадоў, якія знаходзіліся ў сацыяльна небяспечным становішчы, было забрана ад біялагічных бацькоў. Вырасла таксама колькасць ахвотных стаць замяшчальнымі бацькамі. Створана 11 новых сем'яў-усынавіцеляў, 20 новых апякунскіх сем'яў.

«Мы шукаем не дзіця для сям'і, а сям'ю для дзіцяці» — гэта асноўны пастулат, згодна з якім і будуецца работа па тэхналогіі вядзення выпадку. Гэта тэхналогія сацыяльнай работы з дакладнай праблемнай сітуацыяй, і работа вядзецца для яе вырашэння, удакладніла Наталля САМОЙЛІК, выканаўчы дырэктар Міжнароднага дабрачыннага аб'яднання «Дапаможам дзецям разам»:

— Тэхналогія вядзення выпадку стварыла адзіны падыход і ўпарадкавала сістэму работы спецыялістаў розных ведамстваў адпаведна з міжнароднымі стандартамі. Яна забяспечыла інструментарый, які дапамог сфарміраваць якасную сістэму прафілактыкі вымання дзяцей з сем'яў.

Даследаванні Дзіцячага фонду ААН (ЮНІСЕФ) сведчаць, што кожныя тры месяцы знаходжання малога ў інтэрнаце затрымліваюць яго развіццё на месяц, таму так важна, каб дзеці жылі ў сем'ях: калі не ў родных, то хоць бы ў замяшчальных. З мінулага года асаблівая ўвага аддаецца менавіта сем'ям з дзецьмі ранняга ўзросту — да трох гадоў.

Гэты перыяд — самы спрыяльны час для развіцця чалавека, калі здольнасць засвойваць новае высокая, калі фарміруецца псіхіка і хутка развіваецца мозг. Дзеці ранняга ўзросту — адна з самых уразлівых катэгорый, якія патрабуюць увагі з боку дарослых. Стрэс, эмацыянальны і фізічны гвалт, адсутнасць магчымасці для фарміравання прыхільнасці ў гэты перыяд вядуць да негатыўных наступстваў для фізічнага і псіхаэмацыянальнага стану дзіцяці, патлумачылі ў ЮНІСЕФ.

Сёлета праект, рэалізаваны на Гомельшчыне, намерваюцца распаўсюдзіць і ў Віцебскай вобласці.

Ірына СІДАРОК

Прэв’ю: pixabay.com

Загаловак у газеце: Не дзіця для сям'і, а сям'я для дзіцяці

Выбар рэдакцыі

Грамадства

Індыкатар жаночых праблем. Чаму ў дэкальтэ галоўнае не прыгажосць, а здароўе?

Індыкатар жаночых праблем. Чаму ў дэкальтэ галоўнае не прыгажосць, а здароўе?

Часта незразумелы «шарык» можа быць, напрыклад, фібрадэномай.

Грамадства

Калі дапамога патрэбна экстранна, яе заўсёды змогуць аказаць валанцёры Чырвонага Крыжа

Калі дапамога патрэбна экстранна, яе заўсёды змогуць аказаць валанцёры Чырвонага Крыжа

Гучны гул сірэны знянацку застаў пенсіянерку Веру Васільеўну дома.