Вы тут

Мерапрыемствы да Дня Незалежнасці праходзяць па ўсёй краіне


У кожны куток Беларусі сёння прыйшло свята — па ўсёй краіне з раніцы і да позняй ночы разгорнуцца гулянні, канцэрты, кірмашы, патрыятычныя акцыі, спартыўныя івенты і іншыя мерапрыемствы раённага, гарадскога і рэспубліканскага маштабу, цэнтрам якіх, вядома, стане сталіца. Для кожнага беларуса знойдзецца ў гэты дзень пляцоўка, дзе ён зможа адпачыць, зарадзіцца бадзёрасцю і пазітывам, успомніць пра подзвіг продкаў і адчуць гонар за тое, у якой краіне жыве, паведамляе БелТА.


Мінск

У Дзень Незалежнасці ў горадзе пройдзе больш за сотню мерапрыемстваў рознага ўзроўню. Арганізавана некалькі святочных пляцовак. Самых ранніх пташак запрашаюць на спартыўнае свята «Радасць світання» каля «Чыжоўка-Арэны»: спартсмены з усёй Беларусі будуць спаборнічаць на лыжаролерах, а таксама за званне лепшага на міжнародным фестывалі па гіравым спорце. Пасля 12.00 аматарам фізічнай актыўнасці можна перамясціцца ў парк 900-годдзя Мінска, дзе арганізавана работа пляцоўкі «Заводскі — тэрыторыя спорту».

З паўдня каля Палаца спорту і на пляцоўцы Верхняга горада загучаць беларускія мелодыі, выступяць народныя калектывы і зоркі беларускай эстрады. У прыватнасці, у Верхнім горадзе мінчан і гасцей горада чакае сустрэча з заслужаным аматарскім калектывам Беларусі ансамблем танца «Зубраня» і фальклорна-этнаграфічным ансамблем «Неруш», такімі выканаўцамі, як Жанет, «Верасы», Ірынай Дарафеевай, Валерыем Скаражонкам, Беларускім дзяржаўным ансамблем «Песняры».

Увечары ад стэлы «Мінск — горад-герой» разнясецца шматгалоссе «Хору Турэцкага», у 21.00 тут пачнецца святочная канцэртная праграма «Спяём гімн разам» з удзелам зорак беларускай эстрады, творчых калектываў краіны. Завершыць музычны опэн-эйр хэдлайнер з Расіі.

Святочныя мерапрыемствы адбудуцца ва ўсіх раёнах сталіцы: масавыя гулянні, гандаль і канцэрты, квесты і конкурсы, майстар-класы, фотазоны і дыскатэкі з розыгрышамі прызоў. Міністэрства абароны ў сямі раёнах горада арганізуе выстаўку ваеннай тэхнікі. На святочную праграму запрашае і Мінскі заапарк. А падсілкавацца адпачывальнікі змогуць у кропках грамадскага харчавання і гандлю на 13 пляцоўках.

Фінальным акордам святкаванняў стане грукат маляўнічага феерверка: роўна ў 23.00 яго запусцяць у парках Перамогі, імя М.Паўлава, імя Уга Чавеса, на набярэжнай Драздоў і пляцоўцы каля спартыўнага комплексу «Чыжоўка-Арэна».

Мінская вобласць

Усяго за некалькі кіламетраў ад сталіцы размешчана цэнтральнае месца святкаванняў Мінскай вобласці — мемарыяльны комплекс «Курган Славы». Выстаўкі, кірмашы, святочныя канцэрты і забаўляльныя пляцоўкі адкрыюцца тут для наведвальнікаў у 12.00. Госці комплексу змогуць паглядзець на прэзентацыю рэгіянальных ручнікоў, паўдзельнічаць у майстар-класах па выцінанцы, роспісе па дрэве, паспрабаваць скласці спартыўныя парашуты, зрабіць памятныя фатаграфіі ў тэматычных зонах, паўдзельнічаць у майстар-класах ад рамеснікаў і іншых актыўнасцях, купіць на кірмашы «Беларусь самабытная» рукатворныя сувеніры і лялькі-абярэгі, карціны і дэкор для дому, а таксама мёд і свежы хлеб.

Сапраўдная інтрыга свята — абяцаная арганізатарамі музейная адукацыйная прастора, дзе ў інтэрактыўнай форме прадставяць «парад ажыўшых партрэтаў Хаіма Суціна».

Тым, у каго энергіі праз край, прапануюць пакатацца на конях і паўдзельнічаць у фізкультурна-спартыўных забавах, такіх як міні-гольф, дартс, гіра, гарадкі, кольцакід. Удзельнічаючы ў падлогавай гульні «Мая цаліна», можна будзе даведацца, якія сацыяльна значныя аб’екты дапамагалі будаваць студэнцкія атрады. А на іншай пляцоўцы можна будзе прайсці віктарыну «Анатомія чалавека», навучыцца аказанню першай медыцынскай дапамогі і паўдзельнічаць у пастановачнай аперацыі.

Адбудзецца тут і яшчэ адна сімвалічная акцыя — па вырабе папяровых жураўлікаў. Лічыцца, што загаданае жаданне спраўдзіцца, калі змайстраваць 1 тыс. такіх птушак. Удзельнікі арыгамі-акцыі такім чынам пажадаюць Беларусі заставацца такой жа квітнеючай, мірнай і незалежнай краінай. З пажаданнямі дабра жураўлікаў затым уручаць удзельнікам свята на Кургане Славы.

Святочныя гулянні і шэсці, кірмашы, работа тэматычных пляцовак, экскурсіі па знакавых мясцінах, звязаных з Вялікай Айчыннай вайной, ускладанні кветак да мемарыялаў і помнікаў адбудуцца па ўсёй вобласці. Спартыўны фестываль «Нашы перамогі табе, Беларусь» арганізуюць на Чырванаслабодскiм вадасховішчы ў Салігорскім раёне. Працаўнікі Жодзіна паўдзельнічаюць у акцыі «Мы — разам», прысвечанай Дню Незалежнасці і Дня горада.

Брэст

Мемарыяльны комплекс «Брэсцкая крэпасць-герой» па традыцыі стане месцам прыцягнення жыхароў і гасцей абласнога цэнтра 3 ліпеня. Стартуюць мерапрыемствы ў 10.00 з ускладання кветак да Вечнага агню мемарыяла з удзелам прадстаўнікоў кіраўніцтва вобласці і горада, дыпкорпуса, грамадскіх арганізацый, працоўных калектываў. На гадзіну раней такая ж цырымонія пройдзе на плошчы Свабоды, дзе ўстаноўлены помнік «Вызваленне» ў гонар 47 воінскіх часцей і злучэнняў, якія вызвалялі Брэст ад нямецка-фашысцкіх захопнікаў у ліпені 1944 года.

Днём у гарадскіх парках і зонах адпачынку пройдуць народныя гулянні. Ва ўсіх храмах Брэсцкай епархіі адбудзецца святочны малебен з перазвонам. У 21.30 на пляцоўцы ля галоўнага ўвахода ў мемарыяльны комплекс «Зорка» запланаваны вялікі святочны канцэрт лепшых салістаў і творчых калектываў горада. Канцэрт завершыць рэспубліканская акцыя «Спяём гімн разам!» А ў 23.00 неба над крэпасцю-героем расквеціць святочны феерверк.

Ва ўсіх гарадах і раёнах вобласці таксама падрыхтаваны праграмы святкаванняў. Урачыстыя мітынгі адбудуцца ў Кобрыне, Лунінцы, Маларыце, Жабінцы, Століне, Іванаве, Ляхавічах. У Пінску, акрамя мітынгу і ўскладання кветак да Брацкай магілы, запланаваны рачная рэгата «За Беларусь!», узнагароджанне перадавікоў вытворчасці, падвядзенне вынікаў гарадскога конкурсу «Дасягненні маёй краіны». У Баранавічах адбудзецца ўрачыстая цырымонія ўшанавання лаўрэатаў звання «Чалавек года — 2020». У Бярозе запланавана тэатралізаванае шэсце працоўных калектываў і тэхнікі айчыннай вытворчасці. Паўсюдна пройдуць выстаўкі-кірмашы, канцэрты, спартакіяды, гульнявыя і забаўляльныя праграмы.

Віцебск

У паўночнай сталіцы Беларусі свята адкрыецца мітынгам на галоўнай плошчы горада. Да мемарыяльнага комплексу ў гонар савецкіх воінаў, партызан і падпольшчыкаў Віцебшчыны ўскладуць вянкі і кветкі. На Алеі вайсковай славы пройдзе музычная праграма з удзелам духавога аркестра. У комплексе культурна-масавага адпачынку імя Савецкай Арміі адбудзецца фестываль аўтагуку Hot weekend — 2021. У парках і на пляцоўках устаноў культуры і арганізацый горада будуць арганізаваны забаўляльныя і танцавальна-музычныя мерапрыемствы, выстаўкі, паказ дакументальных фільмаў. Завершыцца святочная праграма маляўнічым феерверкам.

На патрыятычныя акцыі, спартыўныя баталіі і культурна-забаўляльныя праграмы арганізатары запрашаюць новапалачан. У горадзе нафтавікоў пройдзе патрыятычны аўтапрабег, ініцыятарамі якога выступіла ААТ «Нафтан». Аўтакалона пройдзе да мемарыяльнага комплексу «Прарыў» ва Ушачах. Таксама на Заходняй Дзвіне адбудзецца незвычайная эстафета: ад цэнтра веславання да пантоннага моста зробяць заплыў байдарачнікі, а затым перададуць эстафету плыўцам-марафонцам, якія паплывуць да цэнтральнай набярэжнай гарадскога парку культуры і адпачынку. На пляцоўцы за дэндрарыем правядуць турнір асілкаў Strongman U110, дзе ўдзельнікі на хуткасць будуць цягнуць аўтобус. Таксама для дзяцей і дарослых у парку арганізуюць розныя квесты, віктарыны, рухомыя гульні.

Браслаў збярэ на свяце аматараў інтэлектуальных і рухомых спартыўных гульняў: у лесапаркавай зоне пройдзе турнір па шахматах, а на спартпляцоўцы каля мясцовай ДЮСШ адбудуцца спаборніцтвы па міні-футболе «Турнір сяброў». У райцэнтры будуць працаваць тэматычныя і інтэрактыўныя пляцоўкі, выстаўка ваеннай тэхнікі.

Перад пачаткам усіх мерапрыемстваў у храмах вобласці пройдзе ўсенародная малітва.

Гомель

Урачыстыя мітынгі, ускладанні вянкоў і кветак да мемарыялаў воінаў-вызваліцеляў — нязменныя атрыбуты святкавання Дня Незалежнасці і ў Гомельскай вобласці. У праграме ў кожнага раёна і абласнога цэнтра — канцэртна-забаўляльныя пляцоўкі, спартыўныя спаборніцтвы, велапрабегі, арт-праекты і многае іншае.

У Гомелі святкаванні ў 10.00 адкрые шэсце ветэранаў, прадстаўнікоў працоўных калектываў і грамадскіх арганізацый, спартсменаў і творчай моладзі. Калона пройдзе ад плошчы Паўстання па вул.Савецкай да пл.Працы. Ля Вечнага агню на ўрачыстым мітынгу ўшануюць памяць герояў-вызваліцеляў, ускладуць вянкі і кветкі да брацкай магілы савецкіх воінаў і падпольшчыкаў. Сваю долю славы атрымаюць і жывыя героі — уладальнікі ганаровага звання «Чалавек года». Пасля іх ушанавання адбудзецца святочная канцэртная праграма Гомельскага сімфанічнага аркестра, творчых калектываў горада.

На плошчы Леніна свята «Этнафэст» прыцягне на інтэрактыўныя пляцоўкі, майстар-класы, пра таленты нашых продкаў раскажа рэтра-выстаўка «Жывуць рамёствы продкаў».

Канцэрты артыстаў беларускай эстрады парадуюць жыхароў і гасцей Рагачова і Хойнікаў. Ваеннаслужачыя пагранкамендатуры «Лоеў» в/ч 1242 у райцэнтры апоўдні апусцяць на воды Дняпра вянок у памяць аб загінулых пры фарсіраванні ракі і вызваленні краю. Паказальныя выступленні пагранічных войскаў можна будзе ўбачыць у амфітэатры Брагіна.

Жыхары Добруша атрымаюць у гэты дзень падарунак — абноўлены пасля капрамонту раённы Палац культуры. Парк культуры і адпачынку «Перамога» ў Мазыры ператворыцца ў пазнавальна-забаўляльную пляцоўку: на выбар наведвальнікаў — канцэртныя маладзёжныя праграмы, выстаўкі вырабаў майстроў, фотазоны, палявая кухня і многае іншае.

Прадстаўнікі маладзёжных субкультур збяруцца на фестывалі «Вялікая літара — 2021» у Чачэрску. У праграме — раённы конкурс па чырлідынгу і бамперболе (вясёлыя бітвы ў надзіманых шарах), конкурс прыгажосці і творчасці «Міс і Містар 2021 года», бег на абцасах. Працоўная моладзь Светлагорска адзначыць свята чэмпіянатам па лёгкай атлетыцы. Усераённы фітнес-форум і мотафестываль правядуць у Кастрычніцкім. Турніры па футболе і стрытболе сярод дваровых каманд арганізуюць у Жыткавічах. Паспрабаваць свае сілы ў автобатле — гонках на радыёкіруемых машынках — прапануюць у Рэчыцы.

Як і ў іншых гарадах, завершацца ўрачыстасці акцыяй «Спяём гімн разам» і святочным феерверкам.

Гродна

У Гродне ўрачыстасці адкрыюцца мітынгам і ўскладаннем кветак да помніка воінам і партызанам у парку імя Жылібера ў 10.30. Святочныя лакацыі разгорнуцца ў цэнтры горада і нават у спальных раёнах. Адной з асноўных будзе плошча Леніна: увесь дзень гасцей свята тут чакаюць канцэрты і музычныя праграмы.

На інтэрактыўныя пляцоўкі — «Нашы брэнды», «Крокі да Алімпу», «Заасад» і іншыя — гараджан і гасцей запрашаюць у парк імя Жылібера. Тут іх таксама чакаюць анімацыйныя і музычныя праграмы. Пешаходная вуліца Савецкая ператворыцца ў гродзенскі Брадвей з актыўным гандлем рамеснікаў і майстроў. Адметнасцю святочнай вуліцы будуць «Канцэрты на балконе» з жывымі выступленнямі вядомых гродзенскіх артыстаў.

Плошча Тызенгаўза стане «Востравам бяспекі» з тэматычнай інтэрактыўнай пляцоўкай. А яшчэ з плошчы будуць стартаваць аглядныя экскурсіі па Гродне на электробусе.

Канцэртна-забаўляльную праграму прадставяць у лесапарку Пышкі і на назіральнай пляцоўцы па вуліцы Дарвіна. Забаўляльныя лакацыі будуць працаваць у спальных раёнах горада.

Нямала цікавага чакае ўдзельнікаў свята ў раёнах вобласці. Адной з фішак Ліды стане парад сельскагаспадарчай тэхнікі. У Шчучыне пройдзе спартыўны флэш-моб: адначасова будуць падымаць 77 гір. У Ашмянах запланаваны фестываль карвінга (мастацкай рэзкі па агародніне), галоўным атрыбутам якога стане бульба. У Карэлічах адкрыюць інтэрактыўную сцяну аўтографаў, дзе кожны, хто прыйдзе на свята, зможа пакінуць свае пажаданні роднаму краю. А ў Гродзенскім раёне правядуць конкурс квілтаў: удзельнікам свята прапануюць стварыць з абрэзкаў беларускія сімвалы. Акрамя таго, у Ваўкавыску адкрыюць мемарыяльную дошку ў гонар Героя Савецкага Саюза Казбека Нуржанава.

Магілёў

У Магілёве святкаванне Дня Незалежнасці пачнецца з урачыстага мерапрыемства «Абаронцам — слава!» да 80-годдзя абароны горада і выстаўкай ваеннай тэхнікі ў мемарыяльным комплексе «Буйніцкае поле». Гледачы ўбачаць рэканструкцыю паветранага бою з удзелам самалётаў Магілёўскага аэраклуба ДТСААФ, тэатралізацыю падзей пачатку вайны і элементы абароны Магілёва. У парку Падніколле будзе арганізавана вялікае дзіцячае свята «Усміхніся, планета, у Магілёве — лета!», а ў скверы 40-годдзя Перамогі пройдзе яркі і вясёлы фэст фарбаў «Імпульс калор».

Адразу некалькі тэматычных пляцовак разгорнуцца ў цэнтры Магілёва: выстаўка-кірмаш «Горад майстроў» у скверы імя А.І. Герцэна, бібліятэчнае свята «754 гады з кнігай» і экспазіцыя «Пасланні продкаў маёй Радзімы» на вул.Ленінскай, кірмаш-продаж «Апетытны горад» у Камсамольскім скверы. Каля Магілёўскага абласнога лячэбна-дыягнастычнага цэнтра пройдзе гастранамічнае свята ад гарадскіх харчовых прадпрыемстваў, адбудзецца канцэртная праграма.

Праграму святочнага дня прадоўжаць прэзентацыя арт-аб’ектаў праекта «Магілёў вачыма гасцей» на пляцоўцы каля Палаца шлюбу, канцэрт аркестра народных інструментаў настаўнікаў Магілёўскай дзіцячай школы мастацтваў нумар 3 імя М.М. Салдатава каля музея В.К. Бялыніцкага-Бірулі, конкурс самых моцных магілёўцаў «Усё будзе супер!» каля абласнога дыягнастычнага цэнтра. Акрамя таго, магіляўчанам і гасцям горада прапануюць прыняць удзел у тэатралізаванай экскурсіі «Ажыўшая гісторыя» па маршруце гарадская ратуша — вул.Ленінская — плошча Зорак.

Завершыцца Дзень Незалежнасці ў Магілёве на плошчы Славы. Тут адбудуцца канцэртная праграма «Сіла Радзімы — у адзінстве народа!», агульнарэспубліканская акцыя «Спяём гімн разам!» і святочны феерверк.

Выбар рэдакцыі

Эканоміка

Хто выбраў год таму айчынную валюту, аказаўся ў выйгрышы. Куды ўкласці грошы зараз, каб атрымаць выгаду

Хто выбраў год таму айчынную валюту, аказаўся ў выйгрышы. Куды ўкласці грошы зараз, каб атрымаць выгаду

Знаёмства маладых людзей з першымі грашыма адбываецца дзіўным чынам.

Грамадства

Індыкатар жаночых праблем. Чаму ў дэкальтэ галоўнае не прыгажосць, а здароўе?

Індыкатар жаночых праблем. Чаму ў дэкальтэ галоўнае не прыгажосць, а здароўе?

Часта незразумелы «шарык» можа быць, напрыклад, фібрадэномай.

Грамадства

Калі дапамога патрэбна экстранна, яе заўсёды змогуць аказаць валанцёры Чырвонага Крыжа

Калі дапамога патрэбна экстранна, яе заўсёды змогуць аказаць валанцёры Чырвонага Крыжа

Гучны гул сірэны знянацку застаў пенсіянерку Веру Васільеўну дома.