Вы тут

Таццяна Рунец: Форум рэгіёнаў — эфектыўная пляцоўка для ўмацавання гандлёва-эканамічнага супрацоўніцтва»


Такую думку выказала старшыня Пастаяннай камісіі Савета Рэспублікі па эканоміцы, бюджэце і фінансах Таццяна Рунец у гутарцы з журналістам «МС». Акрамя таго, кіраўнік профільнай камісіі расказала, чаго чакае ад Беларуска-расійскага дзелавога савета, створанага гандлёва-прамысловымі палатамі, наколькі вырас тавараабарот з пачатку года і як змяніўся кантрактны партфель за гады правядзення форуму.


Ад кармоў для жывёлы да касмічных праграм

Адшумеў, адгрымеў чарговы Форум рэгіёнаў Беларусі і Расіі, які сёлета праводзіўся восьмы раз. Літаральна ўвесь мінулы тыдзень быў насычаны разнастайнымі форумнымі мерапрыемствамі, якія, падтрымліваючы анлайн-фармат, цалкам завалодалі інтэрнэт-прасторай. І вось зараз, адпавядаючы выслоўю «грошы любяць цішыню», разам са старшынёй профільнай камісіі Савета Рэспублікі мы вырашылі падсумаваць вынікі такіх сустрэч.

Так, на думку суразмоўніцы, Форум рэгіёнаў Беларусі і Расіі стаў адным з найважнейшых эканамічных і камунікацыйных праектаў Саюзнай дзяржавы, бо ён дае магчымасць аб'яднаць намаганні кіраўнікоў беларускіх і расійскіх рэгіёнаў, органаў заканадаўчай і выканаўчай улады, экспертаў, дзелавыя колы і моладзь нашых краін.

— Традыцыйна на гэтым саміце абмяркоўваецца шырокі спектр пытанняў, якія, як правіла, аб'яднаныя агульнай тэмай. Для VІІІ Форуму рэгіёнаў такой тэмай стала навуковае і тэхнічнае супрацоўніцтва нашых краін ва ўвязцы з працэсамі лічбавізацыі, — нагадала Таццяна Рунец. — Лічым гэты кірунак вельмі актуальным і запатрабаваным, бо сёння фактарам поспеху ў эканоміцы часта становіцца паўнавартаснае супрацоўніцтва ў інавацыйнай сферы і кааперацыя з іншымі краінамі.

Прычым рэалізацыю сумесных навукова-тэхнічных праектаў у рамках Саюзнай дзяржавы не варта трактаваць як самамэту і спробу адпавядаць модным інтэграцыйным трэндам, пераканана старшыня профільнай камісіі. Яна лічыць, што гэтыя праекты арыентаваны ў першую чаргу на канкрэтныя практычныя вынікі.

У прыватнасці, расійскія спецыялісты стварылі інтэлектуальныя сістэмы кіравання беларускім кар'ерным самазвалам-беспілотнікам БелАЗ. Дзякуючы супрацоўніцтву з расійскімі калегамі ў рамках саюзных праграм створана касмічная групоўка спадарожнікаў. Распрацоўваюцца новыя тэхналогіі хірургічнага лячэння дзяцей з цяжкімі пашкоджаннямі пазваночніка, а таксама тэхналогіі для вытворчасці збалансаваных кармоў жывёл.

Дзелавы савет — не з нуля

Трэба сказаць, што, акрамя супрацоўніцтва ў навукова-тэхнічнай сферы, на Форуме рэгіёнаў традыцыйна па лініі дзелавых колаў абмяркоўваюцца пытанні двухбаковага супрацоўніцтва ў гандлёва-эканамічнай, прамысловай, інвестыцыйнай сферах. І чарговы форум не стаў выключэннем.

— Відавочна, што сёння, на этапе постковіднага аднаўлення, і дзяржава, і асобна ўзяты бізнес вырашаюць падобныя задачы — выйсці на траекторыю ўстойлівага росту, эфектыўна і паслядоўна развіваць свае канкурэнтныя перавагі, умацоўваць інавацыйны патэнцыял, — падкрэслівае сенатар.

Яна пераканана, што ў рашэнні гэтых мэтавых задач для суб'ектаў гаспадарання Беларусі і Расіі важную ролю адыгрывае фактар інтэграцыі, напрацаваныя сувязі паміж асобнымі рэгіёнамі нашых краін. Рэалізацыя сумесных праектаў, механізмы падтрымкі кааперацыі і ўзаемных інвестыцый — ключавыя ўмовы для паўнавартаснай інтэграцыі і далейшага будаўніцтва Саюзнай дзяржавы. Менавіта гэтыя пытанні сфарміравалі парадак дня пасяджэння савета дзелавога супрацоўніцтва ў рамках VІІІ Форуму рэгіёнаў Беларусі і Расіі.

Нагадаем, што на гэтым пасяджэнні гандлёва-прамысловыя палаты Беларусі і Расіі падпісалі пагадненне аб стварэнні Беларуска-расійскага дзелавога савета. Варта адзначыць, што такі савет не ствараецца з нуля. Ён дзейнічаў і раней. Разам з тым з улікам новых выклікаў, умоў працы, напэўна, наспеў час перафармаціраваць існуючую структуру, перагледзець яе функцыянал.

Як патлумачыла суразмоўца, асноўныя задачы створанага савета — пашырэнне прамых кантактаў паміж суб'ектамі прадпрымальніцкай дзейнасці, пераадоленне бар'ераў і абмежаванняў ва ўзаемным гандлі, поўнафарматны дыялог з органамі заканадаўчай і выканаўчай улады па пытаннях развіцця кааперацыі.

Устойлівы рост кантрактаў

Безумоўна, важная эканамічная кампанента любога эканамічнага форуму — заключэнне камерцыйных кантрактаў. На VІІІ Форуме рэгіёнаў падпісаныя кантракты на суму, эквівалентную 800 мільёнам долараў.

Трэба сказаць, што ў кантрактным партфелі апынуліся сельскагаспадарчая тэхніка, прадукцыя машынабудавання, прадукты харчавання, тавары нафтахіміі з высокай дабаўленай вартасцю і іншыя пазіцыі.

Пазітыўны факт заключаецца і ў тым, што сума заключаных кантрактаў ад форуму да форуму ўзрастае. Калі на ІІ Форуме аб'ём здзелак складаў усяго 230 мільёнаў, то на мінулагоднім, які прайшоў у Мінску і Мінскай вобласці, агульная сума кантрактаў ужо дасягала 711 мільёнаў долараў. І гэты паступальны рост працягваецца і надалей. Налета эксперты прагназуюць дасягненне мільярднага рубяжу.

— У цэлым, тэмпы ўзаемнага гандлю паміж нашымі краінамі, нават пры існуючых ковідных абмежаваннях, вельмі высокія, — упэўнена суразмоўца і ў якасці доказу прыводзіць даныя статыстыкі. — Па выніках чатырох месяцаў бягучага года тавараабарот паміж Беларуссю і Расіяй вырас на 31,9 працэнта. І гэта, вядома, пазітыўны сігнал. З іншага боку, такая станоўчая дынаміка шмат у чым абумоўлена ростам паставак вуглевадароднай сыравіны з Расіі.

З пункту гледжання старшыні Пастаяннай камісіі па эканоміцы, бюджэце і фінансах, у рамках Саюзнай дзяржавы гандлёвыя патокі могуць быць больш збалансаванымі, тады і агульная дынаміка ўзаемнага гандлю не будзе залежаць ад цэнавай кан'юнктуры на сыравінных рынках.

Важным з'яўляецца і тое, што для стымулявання развіцця гандлёва-эканамічных адносін і забеспячэння камфортнага бізнес-асяроддзя па выніках Форуму рэгіёнаў урадам дзвюх краін рэкамендавана да канца гэтага года падпісаць міжнародны дагавор аб узаемным прызнанні электроннага подпісу з выкарыстаннем інстытута даверанага трэцяга боку Беларусі і Расіі. Па меркаванні Таццяны Рунец, гэтая ініцыятыва цалкам адпавядае трэнду на лічбавізацыю эканомікі.

Вольга АНУФРЫЕВА

Выбар рэдакцыі

Грамадства

«Ніякія межы больш не падзеляць нашу родную зямельку — Беларусь»

«Ніякія межы больш не падзеляць нашу родную зямельку — Беларусь»

Менавіта гэтымі словамі нашы папярэднікі-«звяздоўцы» віталі 17 верасня 1939 года.

Грамадства

Мінск сустракае дзяцей з Данецкай вобласці

Мінск сустракае дзяцей з Данецкай вобласці

Дзеці з Данецкай вобласці прыехалі ў Беларусь на адпачынак і аздараўленне.