Вы тут

Міністр замежных спраў Беларусі Уладзімір Макей раскрыў актуальныя тэмы ў інтэрв'ю тэлеканалу RT


Беларусь ніколі не была «параджэннем зла», як цяпер яе спрабуюць прадставіць на Захадзе. На гэта звярнуў увагу міністр замежных спраў Беларусі Уладзімір Макей у інтэрв'ю тэлеканалу RT, паведаміла БелТА.


​«Любыя рашэнні прымаюца выключна ў Мінску»

«Беларусь ніколі не была «параджэннем зла», як цяпер нас спрабуюць прадставіць, ніколі не была ініцыятарам якіх-небудзь дзеянняў, накіраваных на дэстабілізацыю сітуацыі ў нашым рэгіёне. У нас не было і няма ні да кога тэрытарыяльных прэтэнзій, у адрозненне ад некаторых іншых краін. І да апошняга моманту, скажам, у нас і ўнутрыпалітычная сітуацыя развівалася ў спакойным, нармальным, стабільным рэчышчы», — падкрэсліў Уладзімір Макей.

Але пасля таго, як у Беларусі правалілася спроба арганізацыі дзяржаўнага перавароту, яе заходнія партнёры ўвялі санкцыі, і краіна была вымушана адказваць на гэта, звярнуў увагу кіраўнік знешнепалітычнага ведамства. «І адказваць мы будзем адэкватна тым негатыўным крокам, якія прыняты і будуць прыняты ў дачыненні да Беларусі», — сказаў ён.

Любы беларускі міністр абавязаны дзейнічаць і дзейнічае выключна ў інтарэсах свайго народа. На гэта звярнуў увагу міністр замежных спраў Беларусі ў інтэрв'ю тэлеканалу RT, паведаміла БелТА. «Я ведаю, што такія ярлыкі навешваюцца пэўнымі, я бы сказаў, маргінальнымі палітычнымі нейкімі сіламі ў Расіі ў першую чаргу, ну, і ў некаторых сродках масавай інфармацыі. Павінен сказаць, што ў нас няма такіх праектаў (з Захадам. — БелТА), якія існуюць у некаторых суседніх краінах, — сказаў Уладзімір Макей. — У нас гэтага няма і не можа быць. У нас няма празаходняга, праўсходняга, прапаўднёвага або прапаўночнага члена ўрада. І ў нас няма такога, калі людзі назначаюцца па нейкіх палітычных ці асабістых поглядах».

Кіраўнік знешнепалітычнага ведамства таксама заявіў, што не можа ўявіць, каб у Беларусі, напрыклад, пасаду міністра абароны займаў чалавек, які атрымаў у свой час, дапусцім, экалагічную адукацыю. «У нас назначаюцца кадры на тую ці іншую пасаду ў адпаведнасці з тым, наколькі яны добра засвоілі тыя ці іншыя кампетэнцыі і ці могуць яны дзейнічаць у інтарэсах беларускага народа. У нас, можна сказаць, урад ад сахі, чым з палаты лордаў», — падкрэсліў ён.

Яшчэ раз закранаючы гэту тэму ў час інтэрв'ю, Уладзімір Макей заявіў: «Я не магу назваць сябе нейкім адназначна празаходнікам або праўсходнікам. Я прыхільнік таго, каб любыя рашэнні, звязаныя з развіццём дзяржавы, грамадства, прымаліся выключна ў Мінску і не пад націскам знешніх абставін. І менавіта ў Мінску, а не ў Бруселі, прабачце, Маскве, Вашынгтоне, Лондане або нейкай іншай краіне. Таму, каб ужо расставіць усе кропкі над «І», я хачу сказаць, што лічу сябе чалавекам, які любіць сваю краіну, свой народ. І я заўсёды дзейнічаў і буду дзейнічаць выключна ў інтарэсах нашай дзяржавы і грамадства».

«Мы проста апынуліся на гэтым разломе»

Пытанне журналіста датычылася таго, ці была Беларусь плацдармам для тэхналогій рэвалюцый у тым ліку, пасля чаго планавалася ўжо пайсці на Расію. «Абсалютна згодны. Я думаю, што мэта была ў тым (я маю на ўвазе мэту тых, хто арганізоўваў адпаведныя дзеянні ў Беларусі), каб стварыць тут другую Украіну, — сказаў міністр. — І пасля перанесці гэты вопыт на Расію. Таму што сёння мэта нават не ў першую чаргу Беларусь, мэта — Расія. Таму што Расія сёння ператвараецца на нашых вачах у магутную сусветную дзяржаву. Яна фактычна ўжо з'яўляецца роўным геапалітычным гульцом і шмат у чым дыктуе правілы паводзін на міжнароднай арэне. Гэта не падабаецца заходняму свету, які прывык, што сітуацыя развіваецца па захадацэнтрычным сцэнарыі».

Па словах Уладзіміра Макея, усе падзеі, якія адбываліся ў Беларусі, сталі вынікам гэтага геапалітычнага сутыкнення.»Мы проста апынуліся на гэтым разломе, скажам так, у непадыходзячы час. Мы выдатна разумеем гэта і маем намер вельмі шчыльна працаваць з нашымі расійскімі сябрамі. І на міжнароднай арэне ў двухбаковым фармаце, процідзейнічаючы падобнага роду спробам, і ў рамках розных міжнародных арганізацый і нашых інтэграцыйных структур, якія існуюць на постсавецкай прасторы», — заявіў кіраўнік МЗС.

Беларусь бачыць узаемавыгадныя перспектывы для паглыблення інтэграцыі з Расіяй. «Я б не стаў сцвярджаць сёння, што Беларусь фактычна акружаная. Калі браць чыста такі, скажам, геаграфічны фактар, з больш чым 3,5 тысячы кіламетраў нашай граніцы мы маем больш чым 1,3 тыс. км з Расіяй. І, як вы бачыце, і палітычныя, і гандлёва-эканамічныя, і гуманітарныя, і ваенна-палітычныя кантакты ў нас актыўна развіваюцца. І асабліва апошнім часам, чаму спрыяе адпаведная палітыка нашых заходніх партнёраў», — адзначыў Уладзімір Макей.

Паводле яго слоў, беларускі бок бачыць сёння добрыя перспектывы для далейшага паглыблення інтэграцыі з асноўным саюзнікам. «І самае галоўнае, што гэта ўзаемавыгадныя перспектывы. Я лічу гэта асноватворным», — падкрэсліў міністр.

Беларусь збіраецца выпрацаваць больш актыўную стратэгію прасоўвання інтарэсаў у Азіі. «Цяпер мы працуем над тым, каб выпрацаваць новую, больш актыўную стратэгію прасоўвання нашых інтарэсаў з краінамі Азіі», — сказаў Уладзімір Макей. Міністр адзначыў, што Беларусь зацікаўлена мець збалансаваную палітыку з тымі краінамі, якія хочуць бачыць яе ў якасці партнёра. «Таму ў сухім астатку паняцце шматвектарнасці застаецца. І лічу, што мы не павінны адмаўляцца ад гэтага прынцыпу. Але ў той жа час мы разумеем, што вектары могуць быць рознай даўжыні і накіраванасці. І ёсць напрамкі, дзе мы проста абавязаны мець больш цесныя інтэграцыйныя кантакты, сувязі ва ўсіх сферах і галінах», — падкрэсліў ён.

«Жыць у міры і спакоі»

Міністр замежных спраў распавёў, якой ён бачыць Беларусь будучыні. «Спакойнай, стабільнай краінай. Дзе людзі, як і раней, будуць жыць у міры, спакоі. І дзе не будуць баяцца за будучыню сваіх дзяцей і ўнукаў. Я перакананы, што так і будзе», — сказаў міністр.

Ён таксама адказаў на пытанне аб моладзі і маладзёжай палітыцы ў Беларусі. «Тэрмін «страчаная моладзь», я думаю, актуальны для любога грамадства, на любым этапе развіцця дзяржавы. Не выключэнне і Беларусь. Мы ўсе былі маладымі, ва ўсіх нас быў такі юнацкі максімалісцкі запал. Усе мы хацелі змяніць свет да лепшага. Лічылі, што мы яшчэ намнога больш разумныя, чым старэйшае пакаленне, і нашмат мудрэйшыя, чым будучае пакаленне. Таму згодны з тым, што моладзь заўсёды незадаволеная старэйшым пакаленнем, якое ў дадзены момант знаходзіцца пры ўладзе, кіруе краінай і гэтак далей», — адзначыў Уладзімір Макей.

Разам з тым ён не згодны, што ў Беларусі «страцілі моладзь». «Павінен прызнаць, што ёсць пэўныя хібы. І, можа быць, у сферы ідэалогіі, у формах работы з моладдзю, якія і прывялі ў канчатковым выніку да таго, што пэўная частка маладых людзей удзельнічала ў гэтых пратэстах. Але нават калі ўзяць статыстыку, то гэта нязначная частка. Парадку 5-6 працэнтаў ад агульнай колькасці маладых людзей ва ўзросце ад 16 да 30 гадоў — гэта паводле афіцыйнай статыстыкі — прымала ўдзел у тых акцыях пратэсту, якія адбыліся ў мінулым годзе ў Беларусі», — заўважыў кіраўнік МЗС.

Уладзімір Макей спаслаўся на меркаванне сваіх знаёмых, чые дзеці ўдзельнічалі ў гэтых акцыях: «Яны проста пайшлі туды, таму што цікава, таму што сабраўся натоўп. Сабраліся, таму што клёва, як кажуць, патусавацца і гэтак далей і таму падобнае. Збольшага, вядома, пэўная частка моладзі, напэўна, удзельнічала з прычыны нейкіх сваіх ідэалагічных перакананняў».

«Таму казаць пра тое, што мы страцілі пакаленне, не даводзіцца. Мы не страцілі. Але пэўную частку ўсё-ткі трэба паспрабаваць вярнуць», — дадаў міністр. Паводле яго слоў, тут важна адмовіцца ад нейкіх састарэлых ідэалагем, форм работы.

Загаловак у газеце: «У інтарэсах свайго народа»

Выбар рэдакцыі

Эканоміка

Хто выбраў год таму айчынную валюту, аказаўся ў выйгрышы. Куды ўкласці грошы зараз, каб атрымаць выгаду

Хто выбраў год таму айчынную валюту, аказаўся ў выйгрышы. Куды ўкласці грошы зараз, каб атрымаць выгаду

Знаёмства маладых людзей з першымі грашыма адбываецца дзіўным чынам.

Грамадства

Індыкатар жаночых праблем. Чаму ў дэкальтэ галоўнае не прыгажосць, а здароўе?

Індыкатар жаночых праблем. Чаму ў дэкальтэ галоўнае не прыгажосць, а здароўе?

Часта незразумелы «шарык» можа быць, напрыклад, фібрадэномай.

Грамадства

Калі дапамога патрэбна экстранна, яе заўсёды змогуць аказаць валанцёры Чырвонага Крыжа

Калі дапамога патрэбна экстранна, яе заўсёды змогуць аказаць валанцёры Чырвонага Крыжа

Гучны гул сірэны знянацку застаў пенсіянерку Веру Васільеўну дома.