Вы тут

Чаму ў Шчучыне будзе ўстаноўлены помнік Шарлю дэ Голю


Як аказалася, у жыцці вядомага французскага ваеннага і дзяржаўнага дзеяча знойдзены беларускі след. Шарль дэ Голь трапіў сюды падчас Першай сусветнай вайны маладым капітанам. Менавіта такім і паўстане ён у бронзе. На сёняшні дзень ужо ёсць эскіз і абрана месца для пастамента. Наступны этап работы — за аўтарамі, якія павінны здзейсніць праект.


Помнік з’явіцца побач з заводам «Аўтапровад», ля дарогі. Тут днямі адбылася закладка першага каменя і ўзгоднены дакументы з французкім бокам. Намеснік старшыні Шчучынскага райвыканкама Алена Пасюта расказала аб вялікай даследчай рабоце, якая папярэднічала дадзенамуу праекту. У мінулым годзе быў аб’яўлены адкрыты конкурс эскізных праектаў будучага помніка. Было пададзена некалькі дзясяткаў заявак ад творчых калектываў і асобных аўтараў.

Абмежаванняў у выкананні вобраза не ставілася — гэта магла быць любая кампазіцыя. Галоўнае патрабаванне — адлюстраваць тую эпоху, калі будучы генерал быў яшчэ маладым і дапасаваць яго вобраз да таго месца, дзе будзе ўстаноўлены манумент ці нават архітэктурны ансамбль.

Лепшым праектам кампетэнтнае журы палічыла праект творчага калектыву ў складзе скульптара Мікалая Байрачнага і архітэктараў Валерыя Мусіенкі Алены Дземіда. У ліпені праект зацверджанны Рэспубліканскім мастацка-экспертным саветам па манументальным і манументальна-дэкаратыўным мастацтве пры Міністэрстве культуры РБ. Як зазначалася, гэта адзіны помнік, дзе Прэзідэнт Францыі паўстане ў вобразе маладога капітана.

Ідэя ўвекавечыць імя славутага французскага генерала і прэзідэнта Францыі ўзнікла невыпадкова. Як аказалася, у лёсе Шарля дэ Голя ёсць і беларускі след. Знойдзены дакументы, якія сведчаць аб тым, што будучы французкі прэзідэнт падчас Першай сусветнай вайны з ліпеня па верасень 1916 года пасля ранення знаходзіўся ў нямецкім лагеры для ваеннапалонных у Шчучыне.

Аб гэтым факце стала вядома з пісьма аднаго з французкіх афіцэраў, які таксама знаходзіўся сярод палонных. У адным са сваіх лістоў на радзіму ён зазначае, што іх, 37 французскіх афіцэраў, прывезлі ў Шчучын паміж Гродна і Лідай і ўтрымлівалі на другім паверсе двухпавярховага цаглянага будынка.

Праўда, нейкі час меўся на ўвазе польскі Шчучын, але больш падрабязныя дэталі прывялі даследчыкаў у Беларусь. Было, напрыклад, вядома, што ў будынку знаходзіцца вытворчасць драўніны, а на той момант тут якраз працавала піларама князёў Друцкіх-Любецкіх. Указвалася таксама на тое, што ў будынку 13 вокнаў. І гэта таксама не цяжка было праверыць, бо гэты будынак захаваўся, і зараз тут знаходзіцца адзін з цэхаў завода «Аўтапровад». Вокнаў там сапраўды 13.
Французская дыпламатычная дэлегацыя не аднойчы наведвала Шчучын з мэтай увекавечыць памяць свойго знакамітага суайчынніка. Днямі адбылося падпісанне дакументаў, неабходных на вырабу помніка.

Да канца жніўня мастакам трэба будзе выканаць скульптуру ў поўную велічыню з мяккага матэрыялу. А пасля помнік будзе адліты з бронзы. Работы плануецца завяршыць у кастрычніку. Шчучынскія будаўнікі падрыхтуюць пастамент з каменяў і бетону.

У музеі гісторыі Шчучынскага раёна ёсць экспазіцыя з матэрыяламі аб капітане французскай арміі Шарле дэ Голе, нядаўна яна папоўнілася копіямі ўнікальных фотаздымкаў з прыватнай калекцыі менавіта аб шчучынскім перыядзе будучага генерала. Мясцовыя ўлады спадзяюцца, што новы праект стане яшчэ адным цікавым фактам для прыцягвання сюды турыстаў.

Маргарыта УШКЕВІЧ

Выбар рэдакцыі

Грамадства

Час клопату садаводаў: на якія сарты пладовых і ягадных культур варта звярнуць увагу?

Час клопату садаводаў: на якія сарты пладовых і ягадных культур варта звярнуць увагу?

Выбар саджанца для садавода — той момант, значнасць якога складана пераацаніць.

Культура

Чым сёлета будзе здзіўляць наведвальнікаў «Славянскі базар у Віцебску»?

Чым сёлета будзе здзіўляць наведвальнікаў «Славянскі базар у Віцебску»?

Канцэрт для дзяцей і моладзі, пластычны спектакль Ягора Дружыніна і «Рок-панарама».