Вы тут

За мінулы тыдзень у краіне патанулі 33 чалавекі


Гэтае лета б’е рэкорды не толькі па гарачыні. Кожны тыдзень на вадаёмах нашай краіны гінуць людзі. Ахвярамі спёкі, вады, а ў першую чаргу — бацькоўскай няўвагі, на жаль, становяцца і дзеці...


Pixabay.com

У мінулыя выхадныя следчыя некалькі разоў выязджалі да вадаёмаў, у якіх патанулі непаўналетнія. Узрост загінулых — ад 3 да 16 гадоў. Адна з трагедый у нядзелю адбылася ў Лунінецкім раёне, дзе патанула 11-гадовая дзяўчынка. Па папярэдняй інфармацыі, школьніца разам са сваёй 22-гадовай цёткай купалася ў штучным вадаёме. Раптам дзяўчынка знікла. Калі на месца прыбылі ратавальнікі і выцягнулі яе з вады, сэрца дзіцяці ўжо не білася...

У той жа дзень магла здарыцца яшчэ адна бяда. Вечарам 11 ліпеня ратавальнікі атрымалі паведамленне, што на вадасховішчы Міхайлаўскае ў Пухавіцкім раёне дзяўчына 2005 года нараджэння наступіла на металічны трос і самастойна з вады выбрацца не можа.

— На месца здарэння прыбылі супрацоўнікі пажарна-выратавальнай часці № 1 Пухавіцкага раённага аддзела па надзвычайных сітуацыях, а таксама прадстаўнікі штаба ліквідацыі надзвычайных сітуацый цэнтра аператыўнага кіравання Мінскага абласнога ўпраўлення МНС, — паведаміла афіцыйны прадстаўнік Мінскага абласнога ўпраўлення МНС Анастасія ШВАЙБОВІЧ. — Дзяўчына знаходзілася ў вадзе непадалёку ад берага, скардзілася на боль у назе — частка троса знаходзілася на верхняй трэці яе правай галёнкі. Пасля таго як медыкі абязболілі нагу, ратавальнікі з дапамогай гідраўлічнага інструмента «перакусілі» частку троса і перадалі пацярпелую супрацоўнікам «хуткай». Пасля аказання першай медыцынскай дапамогі дзяўчыну даставілі дадому.

Хэпі-эндам скончылася і перакульванне катамарана на акваторыі возера Нарач, што на Мядзельшчыне. Пяць чалавек апынулася ў вадзе, своечасова ім на дапамогу прыбылі супрацоўнікі Таварыства ратавання на водах. Увогуле, за мінулы тыдзень супрацоўнікамі таварыства і Міністэрства па надзвычайных сітуацыях быў выратаваны 31 чалавек.

— Дзявятага ліпеня ў 14.42 у цэнтр аператыўнага кіравання раённага аддзела па надзвычайных сітуацыях ад старшыні ратавальнай станцыі Таварыства ратавання на водах паступіла паведамленне аб тым, што на гарадскім пляжы № 2 горада Петрыкава нашымі супрацоўнікамі выратавана трое дзяцей, — паведаміў начальнік вадалазна-выратавальнай службы Беларускага рэспубліканскага таварыства ратавання на водах Дзмітрый БАРАНОЎСКІ. — Высветлілася, што мужчына купаўся разам са сваімі дзецьмі 2009-га, 2012-га і 2017-га гадоў нараджэння. Ён не бачыў, калі малыя пачалі тануць. Яны былі выратаваныя работнікамі Таварыства ратавання на водах, якія знаходзіліся непадалёку.

За мінулы тыдзень у Беларусі патанулі 33 чалавекі. Часцей за ўсё да трагедый на вадзе прыводзяць купанне ў стане алкагольнага ап’янення, заплывы на далёкія дыстанцыі, мышачныя сутаргі, адсутнасць нагляду за дзецьмі. Ратавальнікі адзначаюць, што вада не даруе бестурботнасці, і нагадваюць правілы паводзін, якія неабходна выконваць падчас адпачынку каля вадаёмаў:

  • выбірайце толькі спецыяльна абсталяваныя для купання месцы
  • знаходзьцеся ад дзіцяці на адлегласці выцягнутай рукі, а не на беразе
  • не скачыце з дамбаў, мастоў і прыстаняў.

Вераніка КАНЮТА

Загаловак у газеце: Вада не даруе бестурботнасці

Выбар рэдакцыі

Грамадства

Індыкатар жаночых праблем. Чаму ў дэкальтэ галоўнае не прыгажосць, а здароўе?

Індыкатар жаночых праблем. Чаму ў дэкальтэ галоўнае не прыгажосць, а здароўе?

Часта незразумелы «шарык» можа быць, напрыклад, фібрадэномай.

Грамадства

Калі дапамога патрэбна экстранна, яе заўсёды змогуць аказаць валанцёры Чырвонага Крыжа

Калі дапамога патрэбна экстранна, яе заўсёды змогуць аказаць валанцёры Чырвонага Крыжа

Гучны гул сірэны знянацку застаў пенсіянерку Веру Васільеўну дома.