Вы тут

Свята ў вашу вёску! У Бялыніцкім раёне кіраўнік гаспадаркі, старшыня сельсавета і святар аб'ехалі некалькі паселішчаў, каб асабіста павіншаваць людзей


У аграгарадку Вішоў святыя Пётр і Павел асабліва шануюцца, у іх гонар мясцовы калгас «Радзіма» пабудаваў тут царкву. Кожны год на свята ў ёй праводзіцца вялікае богаслужэнне, удзел у ім бярэ архіепіскап Магілёўскі і Мсціслаўскі Уладыка Сафроній. СВК «Калгас «Радзіма» арганізоўвае канцэрты і робіць падарункі пенсіянерам і ветэранам. Пандэмія ўнесла свае карэктывы ў звыклы лад жыцця, і сёлета кіраўнік гаспадаркі сумесна са старшынёй Вішоўскага сельвыканкама і настаяцелем храма аб'ехалі некалькі вёсак, каб асабіста павіншаваць людзей.


Настрой жыхарам узнімала творчая група Вішоўскага сельскага Цэнтра культуры і вольнага часу ў складзе яе дырэктара — Алены Хартавай, Валянціны Сільвянковай і Сяргея Панчака. Яны спявалі любімыя ў народзе песні і танцавалі з ахвотнымі іх любімую падэспань.

— Звычайна мы запрашаем народ да сябе, але сёлета ў сувязі з каранавірусам вырашылі праехацца па вёсках і павіншаваць усіх паасобку, — звярнуўся да вяскоўцаў на адным з такіх канцэртаў у вёсцы Навасёлкі старшыня СВК «Калгас «Радзіма» Аляксандр Лапацентаў. — Хацелася б, каб гэта было больш масава, але што зробіш. Галоўнае, каб людзі бачылі, што традыцыі працягваюцца, нягледзячы ні на што. У сувязі са складанай міжнароднай абстаноўкай, якая сёння адбываецца ў свеце, хачу супакоіць, што калгас здольны працаваць у тым жа духу. Вы самі бачыце, што і на палях, і на фермах працягваецца стабільная работа. І тыя санкцыі, якія прыняў Еўрасаюз, мы пакуль не адчуваем. Але ўсё залежыць ад працы саміх людзей.

Калісьці вёска Навасёлкі была цэнтрам калгаса-мільённіка імя Леніна. Зараз яго тэрыторыі адышлі да «Радзімы». І кіраўніцтва аграгаспадаркі ўзяло пад сваю апеку ў тым ліку і ветэранаў некалі моцнага калгаса. Аляксандр Лапацентаў згадаў легендарнага старшыню калгаса — удзельніка вайны і заслужанага работніка сельскай гаспадаркі БССР Уладзіміра Скрыцкага, які знаходзіўся каля руля болей чым 40 гадоў. У сярэдзіне 1990-х ён пайшоў з жыцця (пахаваны на мясцовых могілках). Лапацентаў звярнуў увагу на тое, што за магілай старшыні і яго родных павінен быць арганізаваны пастаянны догляд.

— Гэты калгас павінен быў развівацца, — выказаў ён шкадаванні. — Было зроблена ўсё магчымае: падведзены газ, усе камунікацыі, ёсць добрая школа, дзіцячы сад, Дом культуры. Проста скажу: не знайшлося прадаўжальніка ідэй Уладзіміра Фёдаравіча. І я ганаруся, што мы навялі тут і ў наваколлі парадак. І людзей мы не дзелім на нашых і чужых. Вы сёння таксама частка нашай «Радзімы».

Цяпер ў Навасёлках жыве каля 150 жыхароў. І кіраўнік калгаса «Радзіма» заклапочаны тым, каб іх праблемы вырашаліся своечасова. «Звяртайцеся, — заклікаў ён. — Чым зможам, дапаможам. Калі не ў стане будзем, выйдзем на больш высокі ўзровень і паспрабуем там вырашыць».

Вяскоўцаў павіншаваў настаяцель храма Святых Апосталаў Пятра і Паўла айцец Павел. Ён заклікаў не забывацца пра веру, любіць і шанаваць Радзіму. «Гэта свята, якое вяртае нас да духоўных традыцый, а яшчэ гэта свята нашай гаспадаркі.

І храм, які быў пабудаваны ў Вішове, быў зроблены менавіта для вас. Свята нагадвае нам, што слова Божае было, ёсць і будзе да заканчэння веку», — падкрэсліў ён.

У даўніну свята Пятра і Паўла сімвалізавала канчатак купальскіх святкаванняў і летніх вяселляў, а таксама падрыхтоўку да сенакосу. У гэты дзень традыцыйна ладзіліся святочныя сямейныя абеды і праводзіўся час з блізкімі на прыродзе. Так што фармат, які выбраў для віншавання людзей калгас «Радзіма», можна лічыць народным і сямейным.

— Дзякуючы калгасу наш сельсавет лічыцца адным з самых квітнеючых у вобласці, — падкрэсліў старшыня Вішоўскага сельсавета Дзмітрый Карпікаў. — Паляпшаецца інфраструктура населеных пунктаў, праводзіцца рэгулярнае добраўпарадкаванне. І як вынік — колькасць насельніцтва ў нашым сельсавеце не падае.

Усяго на тэрыторыі сельсавета ў 31 населеным пункце пастаянна пражывае 2500 чалавек, плюс прыязджае 1500 дачнікаў. Вішоўскі сельсавет у Магілёўскай вобласці не толькі адзін з квітнеючых, але і адзін з самых вялікіх.

— Тое, што сам кіраўнік калгаса не абыходзіць нас сваёй увагай, вельмі каштоўна, — адзначыў стараста вёскі Уладзімір Салодкі. — Для нас за гонар было прыйсці сюды, каб пачуць віншаванні з яго вуснаў.

Усяго ў гаспадарцы «Калгас «Радзіма» — 250 пенсіянераў і ветэранаў. Усе яны атрымалі да свята падарункі. Канцэрты прайшлі ў васьмі населеных пунктах.

— Культурныя мерапрыемствы вельмі згуртоўваюць людзей, — перакананы Дзмітрый Карпікаў. — Паглядзіце на іх твары, і ўсё стане зразумела. Яны так шчыра ўсміхаюцца. І вельмі прыемна, што кіраўніцтва калгаса «Радзіма» добра адчувае настрой людзей і разумее, як важна іх падтрымліваць.

На свята Святых Апосталаў Пятра і Паўла ў аграгарадку Вішоў прайшло вялікае богаслужэнне, якое вёў архіепіскап Магілёўскі і Мсціслаўскі Уладыка Сафроній. Для ўдзелу ў ім быў арганізаваны падвоз людзей з населеных пунктаў сельсавета.

Нэлі ЗІГУЛЯ

Фота аўтара

Бялыніцкі раён

Выбар рэдакцыі

Эканоміка

Хто выбраў год таму айчынную валюту, аказаўся ў выйгрышы. Куды ўкласці грошы зараз, каб атрымаць выгаду

Хто выбраў год таму айчынную валюту, аказаўся ў выйгрышы. Куды ўкласці грошы зараз, каб атрымаць выгаду

Знаёмства маладых людзей з першымі грашыма адбываецца дзіўным чынам.

Грамадства

Індыкатар жаночых праблем. Чаму ў дэкальтэ галоўнае не прыгажосць, а здароўе?

Індыкатар жаночых праблем. Чаму ў дэкальтэ галоўнае не прыгажосць, а здароўе?

Часта незразумелы «шарык» можа быць, напрыклад, фібрадэномай.

Грамадства

Калі дапамога патрэбна экстранна, яе заўсёды змогуць аказаць валанцёры Чырвонага Крыжа

Калі дапамога патрэбна экстранна, яе заўсёды змогуць аказаць валанцёры Чырвонага Крыжа

Гучны гул сірэны знянацку застаў пенсіянерку Веру Васільеўну дома.