Вы тут

Беларускі спорт: на нізкім старце і ў поўнай баявой гатоўнасці


У традыцыйным аглядзе «Звязды» расказваем, як беларускі спорт жыве напярэдадні Алімпіяды.


Гераіні тыдня. Беларускія спартсменкі выступілі на этапе Гран-пры па мастацкай гімнастыцы ў Тэль-Авіве. Лідары беларускай каманды сабралі ў суме 10 медалёў. Аліна Гарнасько і Настасся Салас заваявалі «серабро» і «бронзу» адпаведна ў мнагаборстве. У фіналах асобных відаў беларускі таксама не засталіся без медалёў. Аліна Гарнасько стала другой у практыкаваннях з мячом (28.700 бала), булавамі (28,300) і стужкай (22,900), трэцяй — з абручом. Настасся Салас заваявала «серабро» ў выступленні з абручом (27,900), «бронзу» — з мячом, булавамі і стужкай.

Медалі тыдня. Беларускія лёгкаатлеты выступілі на юніёрскім чэмпіянаце Еўропы (U-20) у Эстоніі. Марыёла Букель заваявала «бронзу» ў кіданні молата. У найлепшай спробе беларуская спартсмнека паказала вынік у 63 м 25 см. Аліна Нікіценка стала бронзавым прызёрам у кіданні дыска. Яна адправіла снарад на 55 м 4 см. Ілья Місоўскі — сярэбраны прызёр у штурханні ядра. Беларус адправіў снарад на 19 м 49 см. Бронзавы медаль турніру заваяваў дыскабол Уладзіслаў Пучко. Яго медальны вынік — 61 м 6 см. Мацвей Волкаў, які выступае ў скачках з шастом, заваяваў «серабро» турніру. Яго вынік — 5 м 44 см.

Заклік тыдня. Кіраўнік Міжнароднага алімпійскага камітэта Томас Бах перасцярог спартсменаў ад любых палітычных пратэстаў падчас цырымоній узнагароджання на маючых адбыцца Алімпійскіх гульнях у Токіа.

«П’едэстал і цырымонія ўзнагароджання медалямі створаны не для палітычных дэманстрацый, — адзначыў Томас Бах. — Яны створаны для таго, каб ушанаваць спартсменаў і тых, хто заваяваў медалі, за спартыўныя дасягненні, а не за іх асабістыя погляды». Кіраўнік МАК падкрэсліў, што Алімпіяда павінна аб’ядноўваць народы і краіны, а не раз’ядноўваць.

Адкрыццё тыдня. У сталіцы Японіі адкрылася Алімпійская вёска, якая распачала сваю работу за 10 дзён да старту Гульняў. Комплекс размясціўся на беразе Такійскага заліва, тут будуць пражываць 18 тысяч спартсменаў і прадстаўнікі нацыянальных камандаў.

У сувязі з пандэміяй каранавіруса аб’ект быў адкрыты без афіцыйнай цырымоніі. На тэрыторыі будзе арганізавана кругласутачная работа медыцынскага блока для агляду атлетаў з сімптомамі заражэння. Атлеты будуць прыязджаць у вёску за пяць дзён да пачатку сваіх спаборніцтваў, а з’язджаць не пазней, чым праз 2 дні пасля завяршэння выступлення. Афіцыйна распачаў сваю работу і Алімпійскі медыяцэнтр. Гульні ў Токіа плануе асвятляць больш за 6 тысяч акрэдытаваных журналістаў.

Адмена тыдня. Чэмпіянат свету па акадэмічным веславанні — 2021, які павінен быў прайсці ў Шанхаі, адменены з-за сітуацыі з каранавірусам. Такая інфармацыя змяшчаецца на афіцыйным сайце Міжнароднай федэрацыі вяслярнага спорту (World Rowіng). Рэгата з удзелам найлепшых спартсменаў свету павінна была прайсці 17–24 кастрычніка 2021 года.

Гэта другі планетарны форум па акадэмічным веславанні запар, які быў адменены ў сувязі з пандэміяй COVІD-19. Раней адменены чэмпіянат свету павінен быў прыняць славенскі Блед.

Каманда тыдня. Баскетбалісткі маладзёжнай зборнай Беларусі (U-20) удзельнічаюць у розыгрышы Кубка выкліку, які праходзіць у Турцыі. У стартавым паядынку беларускі пацярпелі паражэнне ад польскіх саперніц — 53:71. Затым уступілі камандзе Расіі — 60:88, прайгралі турэцкай камандзе — 59:83. Доўгачаканую перамогу беларуская каманда здабыла ў матчы з камандай Партугаліі — 63:54. Самай выніковай у беларускай камандзе стала Яна Яхнавец, якая набрала 22 балы.

Цытата тыдня. «Я прыняла вельмі цяжкае для сябе рашэнне не браць удзел у Алімпійскіх гульнях у Токіа. У мяне шмат выдатных успамінаў, калі я выйгравала „золата“ Алімпійскага турніру і прадстаўляла Беларусь на папярэдніх Гульнях, але, нягледзячы на ўсе цяжкасці, з якімі мы сутыкаемся ў сувязі з пандэміяй, у глыбіні душы я ведаю, што гэта правільнае рашэнне для мяне і маёй каманды. Я з нецярпеннем чакаю Алімпіяду 2024 года ў Парыжы, каб прадстаўляць Беларусь. Жадаю ўсім спартсменам бяспечных, здаровых і паспяховых Гульняў!» — напісала ў сваіх саыцяльных сетках Вікторыя Азаранка. Алімпійская чэмпіёнка 2012 года не будзе ўдзельнічаць у Алімпійскіх гульнях — 2021.

Намінацыі тыдня. Асацыяцыя «Беларуская федэрацыя футбола» правяла традыцыйнае апытанне сярд журналістаў беларускіх СМІ. Максім Скавыш прызнаны найлепшым гульцом футбольнага чэмпіянату Беларусі ў чэрвені. У першым летнім месяцы 31-гадовы нападаючы барысаўскага БАТЭ правёў тры матчы, забіўшы ў іх тры галы. Усяго ў цяперашнім першынстве Максім Скавыш забіў дзевяць мячоў. Па выніках галасавання ён набраў 22 ачкі з 36 магчымых.

Найлепшым трэнерам чэрвеня стаў настаўнік БАТЭ Віталь Жукоўскі. Яго падапечныя атрымалі перамогі ва ўсіх трох праведзеных матчах з агульным лікам 8:0. Футбалісты БАТЭ цяпер маюць 39 ачкоў і займаюць другое месца ўслед за салігорскім «Шахцёрам», у якога на адзін бал больш.

Валерыя СЦЯЦКО

Фота БелТА

Выбар рэдакцыі

Эканоміка

Хто выбраў год таму айчынную валюту, аказаўся ў выйгрышы. Куды ўкласці грошы зараз, каб атрымаць выгаду

Хто выбраў год таму айчынную валюту, аказаўся ў выйгрышы. Куды ўкласці грошы зараз, каб атрымаць выгаду

Знаёмства маладых людзей з першымі грашыма адбываецца дзіўным чынам.

Грамадства

Індыкатар жаночых праблем. Чаму ў дэкальтэ галоўнае не прыгажосць, а здароўе?

Індыкатар жаночых праблем. Чаму ў дэкальтэ галоўнае не прыгажосць, а здароўе?

Часта незразумелы «шарык» можа быць, напрыклад, фібрадэномай.

Грамадства

Калі дапамога патрэбна экстранна, яе заўсёды змогуць аказаць валанцёры Чырвонага Крыжа

Калі дапамога патрэбна экстранна, яе заўсёды змогуць аказаць валанцёры Чырвонага Крыжа

Гучны гул сірэны знянацку застаў пенсіянерку Веру Васільеўну дома.