Вы тут

Медыкі, якія атруціліся падчас аказання дапамогі жанчыне, выпісаны са стацыянара


Медыкі Брэсцкай абласной бальніцы, якія атруціліся падчас аказання дапамогі жанчыне на каналізацыйна-помпавай станцыі, выпісаны са стацыянара. Яны знаходзіліся ў медыкаментознай коме на апаратах штучнай вентыляцыі лёгкіх, але цяпер іх стан не выклікае апасенняў. Адметна, што сам урач і медыцынская сястра свой учынак не адносяць да гераічных, а цікавасць да сябе пасля здарэння лічаць празмернай.


Нагадаем, што 13 ліпеня 40-гадовая супрацоўніца «Брэстводаканала» працавала на каналізацыйна-помпавай станцыі, якая размешчана на тэрыторыі Брэсцкай абласной бальніцы.

У пэўны момант калегі не змаглі з ёй звязацца, і адзін з іх знайшоў жанчыну непрытомнай у рабочым памяшканні. Аказаць дапамогу пацярпелай прыйшлі 33-гадовы ўрач і 22-гадовая медсястра гэтай жа бальніцы.

— Чалавек, які знайшоў жанчыну непрытомнай, прыйшоў у прыёмнае аддзяленне і паведаміў, што яна ляжыць быццам бы ў крыві і непрытомная, — згадвае, як развіваліся падзеі, галоўны ўрач Брэсцкай абласной клінічнай бальніцы Аляксандр Карпіцкі. — Першая здагадка — што жанчына ўдарылася падчас падзення і атрымала траўмы. Нашы медыкі, а гэта дзяжурная медсястра і ўрач-уролаг, які знаходзіўся ў прыёмным аддзяленні, бо кансультаваў там пацыента, не раздумваючы пабеглі аказваць першую дапамогу.

Яны таксама страцілі прытомнасць. Па адной з версій, на каналізацыйна-помпавай станцыі адбылася ўцечка серавадароду. Гэта вельмі таксічны газ, пры ўдыханні паветра з ім узнікаюць галавакружэнне, галаўны боль, млоснасць, а ў значнай канцэнтрацыі ён прыводзіць да комы, сутаргаў, ацёкаў лёгкіх і нават да смерці. Пры высокай канцэнтрацыі аднаразовае ўдыханне можа выклікаць імгненную смерць.

Медыкаў, якія страцілі прытомнасць, таксама заўважылі і паведамілі пра гэта ў прыёмны пакой. Былі выкліканы супрацоўнікі МНС, яны і дасталі пацярпелых з памяшкання каналізацыйна-помпавай станцыі. Выратаваць супрацоўніцу «Брэстводаканала», на жаль, не ўдалося. А вось медыкі былі аператыўна дастаўлены ў рэанімацыйнае аддзяленне, уведзены ў штучную кому і падключаны да апаратаў ШВЛ. Больш за тыдзень яны правялі ў стацыянары. У іх лячэнні бралі ўдзел найлепшыя сталічныя таксіколагі і неўролагі, якія кансультавалі брэсцкіх калег. На гэтым тыдні стан медыкаў істотна палепшыўся, яны выпісаны і будуць праходзіць амбулаторнае лячэнне дома.

— Калі яны канчаткова паправяцца і выйдуць на работу, мяркую, што мы іх адзначым — і ад сябе, і ў прафсаюзнай арганізацыі маецца адпаведная ўзнагарода — нагрудны знак «За працу ў імя жыцця». Нашы гарадскія ўлады таксама маюць намер іх ушанаваць, — кажа Аляксандр Карпіцкі. — Сапраўды гэта не шараговы ўчынак — наш доктар увогуле, можна сказаць, выпадкова там апынуўся, ён не быў дзяжурны ў прыёмным аддзяленні. Але паступіў па-чалавечы і як сапраўдны ўрач адразу прыйшоў на дапамогу. Вось нядаўна патэлефанаваў мне і сказаў, што ён не лічыць свой учынак чымсьці адметным.

Алена КРАВЕЦ

Прэв’ю: pixabay.com

Загаловак у газеце: «Не лічаць свой учынак чымсьці адметным»

Выбар рэдакцыі

Грамадства

Апошняя цыгарэта. Неасцярожнае абыходжанне з агнём пагражае сур'ёзнымі наступствамі

Апошняя цыгарэта. Неасцярожнае абыходжанне з агнём пагражае сур'ёзнымі наступствамі

Летась у краіне адбылося 5958 пажараў, на якіх загінулі 627 чалавек.

Здароўе

Мароз і сэрца: што такое халадовы інфаркт, каму ён пагражае і як яго пазбегнуць?

Мароз і сэрца: што такое халадовы інфаркт, каму ён пагражае і як яго пазбегнуць?

Расказала ўрач-тэрапеўт, загадчык аддзялення прафілактыкі 11-й гарадской паліклінікі Мінска Святлана ЯНУШКА.

Спорт

Алег Шэпель: Сусветны паралiмпiйскi рух многае страцiў ад нашай iзаляцыi

Алег Шэпель: Сусветны паралiмпiйскi рух многае страцiў ад нашай iзаляцыi

Гiсторыя паралiмпiйскага спорту — паказчык развiцця краiны.

Грамадства

Каманда «Доктар Хаусс» з Магілёва стала чэмпіёнам Вышэйшай лігі КВЗ-2022

Каманда «Доктар Хаусс» з Магілёва стала чэмпіёнам Вышэйшай лігі КВЗ-2022

Інтэрв’ю з капітанам каманды «Доктар Хаусс» Паўлам Малахавым.​