Вы тут

Алімпійскі дзённік. Беларусы яшчэ пазмагаюцца!


Бронзавы прызёр Алімпійскіх гульняў у Токіа Максім Недасекаў вярнуўся ў Мінск, дзе яго ўрачыста сустракалі кіраўніцтва, сябры і блізкія людзі. Максім падзякаваў усім за падтрымку і падзяліўся ўражаннямі ад Алімпіяды. «Было б ранавата ў 23 гады скокнуць 2.39. Наперадзе яшчэ некалькі алімпіяд і там трэба паказваць добрыя вынікі, скакаць вышэй і забіраць сваё заслужанае „золата“. Я ў сабе ўпэўнены. Я яшчэ не ўсвядоміў, што ў мяне бронзавы медаль Алімпійскіх гульняў. Я страціў тры кілаграмы пасля спаборніцтваў, есці зусім не хацелася. І спаць цяжка было. Цяпер планую тыдзень адпачыць, а потым — зноў на старты», — расказаў Максім Недасекаў.


Фота БелТА

Барацьба. Ірына Курачкіна (57 кг) у паўфінале спаборніцтваў па жаночай барацьбе ўпэўнена перамагла Эвелін Ніколаву з Балгарыі, выйшла ў фінал, і самае галоўнае — забяспечыла сабе мінімум «серабро» Алімпійскіх гульняў. У фінале саперніцай беларускі стане прадстаўніца Японіі Рысака Каваі.

Працягне сваё выступленне ў Токіа і барэц вольнага стылю Алі Шабанаў (86 кг). Яго сапернік па мінулым паядынку амерыканец Дэвід Морыс Тэйлар выйшаў у фінал. Гэта дае Алі Шабанаву магчымасць змагацца за «бронзу» Алімпіяды.

Свой алімпійскі шлях пачнуць барцы вольнага стылю — Дзяніс Храмянкоў і Магамедхабіб Кадзімагамедаў. З алімпійскім настроем, зададзеным Ірынай Курачкінай, на дыван выйдзе Ванеса Каладзінская. Ёй, магчыма, на роду было напісана займацца спортам. Яе бацька Валерый Каладзінскі — вядомы трэнер па спартыўнай гімнастыцы. Ванеса — адзіная з беларускіх спартсменак, хто двойчы выйграў чэмпіянат свету па жаночай барацьбе. Нават нараджэнне дзіцяці і наступныя праблемы са здароўем не змаглі яе прымусіць развітацца з барацьбой.

Веславанне на байдарках і каноэ. Барацьбу за алімпійскія медалі працягнуць і весляры. Вольга Худэнка і Марына Літвінчук выйшлі ў паўфінал заездаў байдарак-адзіночак на дыстанцыі 500 метраў. Алена Наздрова ўпэўнена выйшла ў 1/4 фіналу на дыстанцыі 200 метраў у каноэ-адзіночцы. Алег Юрэня і Юрый Баравікоў прабіліся ў паўфінал на дыстанцыі 1000 метраў у байдарцы-двойцы.

Лёгкая атлетыка. Павел Мялешка і Аляксей Каткавец выйшлі ў фінал спаборніцтваў у кіданні кап’я. У сваіх найлепшых спробах яны паказалі вынік у 82 м 64 см і 82 м 72 см адпаведна.

Стаў вядомы састаў беларускай каманды ў эстафетным бегу 4×400 метраў. Беларусь прадставяць Юлія Блізнец, Эльвіра Герман, Аляксандра Хільмановіч і Астэрыя Узо Лімай. Каманда бярэ маладосцю і ўпэўненасцю ў сваіх сілах. Самай старэйшай удзельніцы Юліі Блізнец — 26 гадоў, а Астэрыі Лімай увогуле 19.

У чацвер стартуюць спаборніцтвы па спартыўнай хадзьбе. На дыстанцыю 20 кіламетраў выйдзе Аляксандр Ляховіч. А ў сектары для скачкоў у вышыню пачнуцца жаночыя спаборніцтвы. Тут Беларусь прадставіць Карына Дзямідзік. Яна прапусціла амаль год, але адразу пасля вяртання змагла ўзяць вышыню ў 1 м 96 см. Вышыня ў два метры для яе дасягальная і ў 2019 годзе ўжо скаралася.

Веласпорт. У чацвер беларусы зноў будуць спрачацца за медалі ў веласіпедным спорце. На старт у дысцыпліне омніум выйдзе Яўген Каралёк. Як адзначаў сам спартсмен, алімпійскія гонкі ў Токіа будуць для яго апошнімі... на трэку. Пасля Алімпіяды ён плануе пераключыцца на выступленні на шашы. У свае 25 гадоў. Важна, што «еўрапейскае серабро» ў 2020 годзе ён заваяваў у омніуме.

Сучаснае пяцібор’е. У Токіа прадстаўляць беларускі сцяг будзе адна з вядучых пяціборак свету Настасся Пракапенка, чэмпіёнка свету 2018, чэмпіёнка Еўропы 2017, найлепшая спартсменка-пяціборка 2018 года на думку Міжнароднага саюза сучаснага пяцібор’я. Двойчы яна сыходзіла ў дэкрэтны водпуск, але кожны раз вярталася ў спорт. Настасся Пракапенка настолькі выдатная спартсменка, што не толькі яна бегае за медалямі, але і яны за ёю. На Алімпіядзе 2008 года яна стала чацвёртай, але праз 10 гадоў у допінг-пробе ўкраінскай спартсменкі знайшлі забаронены прэпарат, а «бронза» напаткала сваю беларускую гераіню. Толькі летам 2021 года Настасся перамагла на чэмпіянаце свету ў Каіры, а затым разам з Вольгай Сілкінай заваявала «золата» ў эстафеце чэмпіянату Еўро-
пы. Дарэчы, Вольга Сілкіна, якая таксама выступіць у Токіа, чэмпіёнка свету 2019 года. На Алімпійскія гульні прыехаў Ілья Палазкоў. У алімпійскім сезоне Ілья сабраў «бронзу» і «серабро» двух этапаў Кубка свету. Разам з Настассяй Пракапенкай стаў сярэбраным прызёрам чэмпіянату свету ў змешанай эстафеце. А літаральна за два тыдні да Алімпіяды разам з Яраславам Радзюком заваявалі «серабро» чэмпіянату Еўропы.

Валерыя СЦЯЦКО

Выбар рэдакцыі

Грамадства

Жыхарка вёскі Мікалаеўка Бялыніцкага раёна Ларыса Клімянок расказала пра трагедыю, якая адбылася з яе сястрой і братамі

Жыхарка вёскі Мікалаеўка Бялыніцкага раёна Ларыса Клімянок расказала пра трагедыю, якая адбылася з яе сястрой і братамі

Экспедыцыю ў Малінаўку арганізаваў навуковы супрацоўнік музея гісторыі Магілёва ветэран пошукавага руху Пётр Хаванскі.

Грамадства

Шматдзетная маці з Полацка расследуе складаныя крымінальныя справы

Шматдзетная маці з Полацка расследуе складаныя крымінальныя справы

Наталля Івашчанка, якая служыць у Полацкім міжраённым аддзеле Следчага камітэта, выхоўвае траіх дзяцей.

Грамадства

Журналіст «Звязды» пракантраляваў нашэнне масак ў грамадскіх месцах

Журналіст «Звязды» пракантраляваў нашэнне масак ў грамадскіх месцах

Чаму наш карэспандэнт у Віцебску прычапіўся да пакупніцы ў краме? 

Эканоміка

Нябедна жыць не забароніш. Дадатковая пенсія з гарантыяй ад дзяржавы

Нябедна жыць не забароніш. Дадатковая пенсія з гарантыяй ад дзяржавы

Сёння з'явілася яшчэ адна магчымасць забяспечыць нябедную старасць.