Вы тут

Летам беларускія студэнты атрымалі дадатковую адукацыю ў Расіі


У пачатку ліпеня 675 беларускіх студэнтаў паехалі ў 12 ВНУ Расіі па праграме «Летні ўніверсітэт — 2021». Сярод гарадоў, куды яны накіраваліся, былі Смаленск, Пскоў, Казань, Уладзівасток, Масква і іншыя. Для студэнтаў падрыхтавалі цікавую адукацыйную праграму з лекцыямі і рознымі праектамі, а таксама забаўляльную: паходы, экскурсіі, катанне на сапбордах.


Саша Бедзіна (справа) на лекцыях у Пскове.

Прымаючы бок узяў на сябе ўсе выдаткі: праезд, пражыванне, харчаванне, ПЛР-тэсты і г. д. За два тыдні студэнты падрыхтавалі 105 сацыяльных праектаў. Адзін з іх, «Лагер натуральнай адукацыі «Альфа», створаны студэнтамі факультэта журналістыкі БДУ, перамог у агульным конкурсе. Пасля вяртання дадому задаволеныя студэнты распавялі нам, як бавілі час у Расіі.

Аляксандра Бедзіна вучыцца на другім курсе філфака БДУ. Ноччу яна села ў арганізаваны да Пскова аўтобус. «Ехалі дзевяць гадзін, было цяжка. Усе вельмі стаміліся. На месцы нас сустрэлі арганізатары. Раздалі сім-карты з доступам у інтэрнэт, майкі, байкі, дажджавікі, заплечнікі — вельмі шмат падарункаў!»

Улад Кучко.

Улад Кучко скончыў першы курс факультэта журналістыкі БДУ. Ехаць у летні ўніверсітэт спачатку не планаваў, а цяпер аб гэтым не шкадуе.

«Нас прывезлі ў спартыўна-турыстычны комплекс, размеркавалі ў нумары рознага фармату. А камусьці нават дастаўся катэдж з усімі выгодамі для дваіх».

Асобна ўдзельнікі адзначаюць ежу ў сталовай. Кармілі чатыры разы на дзень. Саша ўспамінае, як дзяўчаты ледзьве не скрозь слёзы адносна сваіх постацяў елі булачкі, але... моцна не скардзіліся — было смачна. Сталовая працавала ў фармаце шведскага стала: бярэш колькі хочаш і чаго хочаш.

Удзельнікі «Летняга ўніверсітэта» ў Краснаярску.

Распарадак дня быў насычаны: ранішняя зарадка, сняданак, заняткі, абед, заняткі. Пасля навучальных пар арганізатары пакінулі час для забаўляльнай праграмы.

 «Штодзённыя аэробіка, басейн, настольныя гульні, танцы. Дадаткова ў некаторыя дні адкрываўся запіс на кераміку, жывапіс, прагулку на цеплаходзе, пілатэс, каліграфію. Але больш за ўсё спадабалася выязная экскурсія ў Пушкінскія горы. Пабывалі ў трох сядзібах Аляксандра Сяргеевіча: Міхайлаўскім, Трыгорскім і Пятроўскім. Для мяне як для філолага гэта былі найлепшыя ўражанні ў жыцці. Прайсціся па дарогах, якімі хадзіў Пушкін, паглядзець на краявіды, якія яго натхнялі... І нават анамальныя 35 Со+ не перашкодзілі атрымаць незабыўныя эмоцыі», — распавядае Аляксандра.

Саша Бедзіна падчас катання на сапбордах.

Калі казаць пра найлепшую актыўнасць у Пскове, усе ўспамінаюць сапборды. Гэта як сёрфінг, але з вяслом. На адной дошцы можа знаходзіцца адразу некалькі чалавек. «Сто чалавек! Амаль усе ўпершыню ўсталі на дошкі і адправіліся ўніз па рацэ Вялікая», — прыгадвае Саша.

Даша Серак, кіраўнік праекта-пераможцы.

Насця Казінец — студэнтка трэцяга курса эканамічнага факультэта БДУ. Яна таксама вучылася ў летнім універсітэце. Толькі гэтую частку студэнтаў прымаў Краснаярск. Дзяўчына адзначае цікавы шлях: яны дабіраліся на самалёце з перасадкай у Маскве. Тая доўжылася каля сямі гадзін, таму хапіла часу на Красную плошчу і парк «Зараддзе».

«Спачатку абяцалі звычайны інтэрнат, але ў выніку засялілі ў школьныя. Тым не менш, было нядрэнна. Галоўны мінус — мы павінны былі вяртацца да 23.00. Ні разу так не зрабіла! Пазней гэта правіла і зусім адмянілі. Нашы вячэрнія шпацыры па горадзе сталі легальныя», — дзеліцца Насця.

Насця Казінец ў Краснаярску.

Свае прыемныя бонусы былі і тут: падарункі ад краёвай адміністрацыі, выдатны Енісей, прыгожая прырода, масты.

Самая важная частка летняга ўніверсітэта — гэта падрыхтоўка сацыяльнага праекта. Кожны з іх быў скіраваны на вырашэнне нейкай праблемы. Найлепшы, на думку журы, падрыхтавалі студэнты факультэта журналістыкі БДУ «Лагер натуральнай адукацыі «Альфа».

— Яго сутнасць — дзецям будуць выкладаць дысцыпліны, якія не вывучаюць у школе, але яны карысныя ў жыцці. Напрыклад, гэта фінансавая, інфармацыйная адукаванасць, палавое выхаванне, — расказвае Даша Серак, кіраўнік праекта, студэнтка трэцяга курса журфака БДУ. — Мы доўга займаліся гэтым праектам. Спачатку выслухалі лекцыі, затым атрымалі прыкладны план і пачалі развіваць сваю ідэю. Нашай асноўнай задачай было прадумаць увесь цыкл рэалізацыі задумы. Гэта значыць, ад распрацоўкі ідэі да пошуку выканаўцаў і падрадчыкаў, складання каштарыса. Напрыклад, калі дзяцей трэба некуды прывесці, нам трэба знайсці аўтобусы, выбраць дату, даведацца пра кошт.

Каманда прэзентавала свой праект і перамагла. Усе ўдзельнікі атрымалі сертыфікаты аб праходжанні дадатковай адукацыі.

Іван САЗОН, студэнт ІІІ курса факультэта журналістыкі БДУ.

Выбар рэдакцыі

Грамадства

Амаль кожны дзень на пажарах гінуць людзі. Як не стаць ахвярай агню?

Амаль кожны дзень на пажарах гінуць людзі. Як не стаць ахвярай агню?

З пачаткам ацяпляльнага сезона ў камунальных службаў работы дадаецца ў разы.

Грамадства

Як у маладой рэспубліцы ўвасаблялі амбіцыйны праект універсітэцкага гарадка...

Як у маладой рэспубліцы ўвасаблялі амбіцыйны праект універсітэцкага гарадка...

Асобнае месца займае будынак гімназіі Зубакіна і Фальковіча.

Эканоміка

Баляслаў Пірштук: Будучыня — за «зялёнай» эканомікай

Баляслаў Пірштук: Будучыня — за «зялёнай» эканомікай

З кожным днём на нашых дарогах усё больш электратранспарту.

Грамадства

Добраўпарадкаванне. У гарадах, на сельгаспрадпрыемствах, могілках, уздоўж трас і ў дварах

Добраўпарадкаванне. У гарадах, на сельгаспрадпрыемствах, могілках, уздоўж трас і ў дварах

Да канца года ў краіне павінны ліквідаваць усе міні-палігоны для адходаў.