Ісачанка: У аснове дасягнення Мэт устойлівага развіцця — моцныя рэгіёны

Нацыянальны каардынатар па дасягненні Мэтаў устойлівага развіцця Рэспублікі Беларусі, віцэ-спікер Савета Рэспублікі Анатоль ІСАЧАНКА прыняў удзел у адкрыцці рэгіянальнай канферэнцыі «Лакалізацыя МУР на рэгіянальным узроўні». 

Сама канферэнцыя праходзіла ў весцы Салтанаўка Магілёўскага раёна, але Нацыянальны каардынатар далучыўся да яе дзякуючы сучасным інфармацыйна-камунікацыйным тэхналогіям. 

— У аснове глабальнага стратэгічнага плана, вядомага ў свеце як Парадак дня ў галіне ўстойлівага развіцця, ляжыць асэнсаваны дэвіз — «нікога не пакінуць убаку», — нагадаў Анатоль Ісачанка, адкрываючы сустрэчу. — Кіруючыся гэтым прынцыпам, сёння пытанні ўцягнення ўсіх рэгіёнаў Беларусі ў планамернае развіццё, з улікам іх асаблівасцяў, з’яўляюцца важнымі для дзяржавы. 

Ён адзначыў, што такі падыход па лакалізацыі МУР носіць стратэгічны характар і цалкам адпавядае аднаму з прыярытэтаў, выпрацаваных на VI Усебеларускім народным сходзе, — моцныя рэгіёны. 

Трэба сказаць, што агульная карціна выканання нашай краінай Мэт устойлівага развіцця складваецца з розных сфер і накірункаў. У гэтым кантэксце дасягненні кожнай галіны ўносяць істотны уклад у агульную работу над рэалізацыяй МУР. Улічваючы гэта, зараз у Рэспублікі Беларусь нядрэнныя вынікі: па ацэнках міжнародных экспертаў узровень прагрэсу ў дасягненні нашай краінай Мэт складае амаль 79 %. У Індэксе чалавечага развіцця мы займаем 53-е месца ў катэгорыі краін з вельмі высокім узроўнем чалавечага развіцця. А ў незалежным рэйтынгу Мэт устойлівага развіцця Беларусі належыць 24-е месца са 165 краін. 

— Дзякуючы Кіраўніку дзяржавы і рэалізуемай ім палітыцы Беларусь годна выглядае ў многіх сферах: харчаванні, адукацыі, экалогіі, энергетыкі, санітарыі, прамысловасці, — падкрэсліў Нацыянальны каардынатар. 

Аднак ён з жалем канстатаваў, што сёння пазітыўным памкненням Беларусі супрацьстаяць мэтанакіраваныя дзеянні шэрагу дзяржаў. 

— Парадак дня — 2030, які павінен быць па-за палітыкай, схільны да негатыўнага знешняга ўздзеяння, — падкрэсліў Анатоль Ісачанка. 

Ён нагадаў, што ўмяшанне ва ўнутраныя справы суверэннай дзяржавы, палітычны і санкцыйны ціск супярэчаць шэрагу міжнародных абавязацельстваў і ідуць насуперак з палажэннямі Статута ААН.

— Нягледзячы на гэтую часовую тэндэнцыю, на міжнароднай арэне мы скіраваны на канструктыўны, праўдзівы дыялог і павагу адно да аднаго, — акцэнтаваў увагу віцэ-спікер Савета Рэспублікі. 

Паводле яго слоў, Беларусь працягвае сістэмнае выкананне Парадку дня — 2030 і ў гэтым пытанні кіруецца тым, што Мэты ўстойлівага развіцця «працуюць» на людзей і для людзей. 

— Так, флагманам у прасоўванні ідэй устойлівага развіцця ў Беларусі з’яўляецца Магілёўскі рэгіён, дзе па ініцыятыве кіраўніцтва вобласці прынята і паспяхова рэалізуецца першая рэгіянальная стратэгія ўстойлівага развіцця да 2035 года, — паведаміў Анатоль Ісачанка. 

Ён напрыканцы адзначыў, што такой актыўнай пазіцыі па гэтым накірунку павінны прытрымлівацца ўсе рэгіёны нашай краіны. 

Вольга АНУФРЫЕВА

Фота БелТА