У Магілёве плануюць зрабіць плошчу і знак у гонар народнага адзінства

Разглядаецца пляцоўка каля Магілёўскага абласнога лячэбна-дыягнастычнага цэнтра і гандлёва-забаўляльнага цэнтра «Атрыум». Ідэю з назвай і ўстаноўкай памятнага знака абмеркавалі на нядаўнім пасяджэнні гарадской тапанімічнай камісіі і горадабудаўнічага Савета.

У якасці альтэрнатывы разглядалася яшчэ і плошча Леніна, дзе знаходзіцца Дом Саветаў — помнік архітэктуры міжваеннага перыяду, аўтарам якога з'яўляецца Іосіф Лангбард. Будынак быў узведзены ў канцы 1930-х, калі Брэсцкая і Гродзенская вобласці знаходзіліся ў складзе Польшчы. Магілёў у той час збіраліся зрабіць сталіцай Беларусі. Вядомы магілёўскі гісторык Мікалай Барысенка лічыць, што гэта плошча найбольш дакладна перадае дух тых часоў і вельмі цесна звязана з падзеямі 1939 года. Дарэчы, кажуць, што плошча не мае афіцыйнай назвы. Маўляў, у гонар Леніна яе сталі называць проста ў народзе, і назва прыжылася.

Між тым адкрыццё памятнага знака, прысвечанага Дню народнага адзінства, паводле плана мерапрыемстваў вобласці «Беларусь — адзіная: адзінства, развіццё, незалежнасць», прымеркаваных да новага свята, адбудзецца на пляцоўцы каля лячэбна-дыягнастычнага цэнтра (на фота). Дата яго прэзентацыі — 17 верасня. Над стварэннем знака працуе магілёўскі скульптар Аляксандр Мінькоў. Кампазіцыя, паводле яго слоў, будзе ўяўляць сабой трохметровую ў вышыню і метровую ў шырыню стэлу ў выглядзе валошкі з шасцю пялёсткамі зверху і арнаментам беларускага сцяга знізу.

— Шэсць пялёсткаў — гэта шэсць абласцей, з якіх складаецца Беларусь, — кажа Аляксандр. — Для мяне тэма адзінства — гэта тэма Радзімы. Я нарадзіўся ў Беларусі і вельмі люблю сваю краіну. Яна асацыюецца ў мяне менавіта з гэтай палявой кветкай, вельмі простай, але сімвалічнай. Нехта кажа, што гэта вельмі прыземлены вобраз, але ж мы ўсе дзеці зямлі. Спачатку была ідэя зрабіць на стэле яшчэ і каласкі, дзе зярняткі — гэта быццам бы людзі. Шэсць каласкоў — шэсць абласцей, але вырашылі ўсё ж пакінуць толькі валошку. Лаканічнасць твора лепш перадасць яго сэнсавую нагрузку. У якасці матэрыялу выкарыстоўваецца ўральскі граніт. Гэты камень найбольш удала перадасць глыбіню ўсёй кампазіцыі.

Аляксандр Мінькоў — нязменны ўдзельнік выставачных праектаў і пленэраў «Каменная кветка», яго работы ўпрыгожваюць паркі Магілёва ды іншых гарадоў вобласці. Летась у Бялынічах напярэдадні Дня пісьменства была ўстаноўлена яго скульптура «З'ява іконы» ў выглядзе гранітнага анёла з іконай Божай Маці на грудзях.

У плане па святкаванні Дня народнага адзінства ў Магілёўскай вобласці шмат розных мерапрыемстваў, пачынаючы ад пасадкі памятных алей, аўта- і велапрабегаў, конкурсаў дзіцячага малюнка, урокаў патрыятычнага выхавання і заканчваючы круглымі сталамі, дыялогавымі пляцоўкамі, навядзеннем парадку на сацыяльна значных аб'ектах.

Па словах начальніка ўпраўлення культуры Магілёўскага гарвыканкама Марыны Клепчуковай, будзе шмат канцэртаў з удзелам прафесійных і аматарскіх творчых калектываў.

— Сёмага верасня ў Магілёве пройдзе вялікая абласная канферэнцыя з удзелам вядучых палітолагаў, — падзяліўся планамі начальнік упраўлення ідэалагічнай работы галоўнага ўпраўлення ідэалагічнай работы і па справах моладзі Магілёўскага аблвыканкама Алег Корапаў. — Акрамя гэтага, рыхтуем вялікі ўрачысты сход і канцэрт, якія адбудуцца 16 верасня. Свята новае, база толькі напрацоўваецца.

Нэлі ЗІГУЛЯ