Вы тут

Як не «падчапіць» ад хатніх жывёл стрыгучы лішай


Нават у XXІ стагоддзі, у эпоху тэхналагічных прарываў, чалавецтва яшчэ пакутуе ад такога захворвання скуры, як лішай, або па-навуковаму — мікраспарыя. Гэта грыбковае захворванне часцей паражае дзяцей. Вінаватымі ў лушчэнні скуры і пачырваненнях на целе з’яўляюцца браты нашы меншыя — бяздомныя і нават хатнія жывёлы. Пра тое, як пазбегнуць гэтай непрыемнай і вельмі заразнай хваробы, расказала ўрач-інфекцыяніст 3-й гарадской дзіцячай клінічнай паліклінікі Юлія Мілько.


Pixabay.com

— Мікраспарыя, ці стрыгучы лішай — гэта грыбковае заразнае скурнае захворванне чалавека і жывёл (катоў, радзей сабак і іншых). У чалавека пры захворванні гэтай інфекцыяй паражаюцца пераважна скура і валасы, — расказвае Юлія Васільеўна.

Чаму захворванне такое заразнае?

Яго ўзбуджальнікам з’яўяўляюцца патагенныя грыбы роду Мікраспорум. Яны характарызуюцца высокай устойлівасцю ў навакольным асяроддзі і могуць захоўваць сваю жыццяздольнасць у лускавінках скуры, у абломках валасоў і поўсці жывёл на працягу многіх месяцаў і нават гадоў — аж да 10.

Як заражаюцца стрыгучым лішаём?

Пры непасрэдным кантакце з хворымі жывёламі, а часам і з людзьмі ці праз аб’екты знешняга асяроддзя, на якіх знаходзяцца споры грыба: адзенне, ручнік, галаўныя ўборы, пасцельныя рэчы, цацкі, лежакі і прадметы догляду жывёл.

Як зразумець, што адбылося заражэнне?

З моманту заражэння да з’яўлення клінічных сімптомаў захворвання звычайна праходзіць ад 5–7 дзён да 4–6 тыдняў. На скуры з’яўляюцца круглаватыя або авальныя, выразна акрэсленыя плямы. Па краі плямы фармуецца валік у выглядзе дробных вузельчыкаў, бурбалак і скурачак. Цэнтральная частка плямы мае больш бледную афарбоўку, з лушчэннем на паверхні. Такім чынам, ачаг мае выгляд кольца.

Пры гэтым на валасістай частцы галавы ўзнікае ачаг, у якім валасы абламаныя на вышыні 4–6 мм і выглядаюць як бы падстрыжанымі (адсюль назва — стрыгучы лішай), пянькі валасоў пакрытыя чахлом шаравата-белага колеру са спораў грыба.

У чым складанасці лячэння?

Гэта вельмі доўгі працэс, які патрабуе неадкладнага выканання ўсіх рэкамендацый. За прызначэннем лячэння неабходна звяртацца да ўрача-дэрматолага.

Як засцерагчыся?

Найперш не кантактаваць з бяздомнымі жывёламі, не гладзіць і не дазваляць дзецям гуляць з бяздомнымі кошкамі і сабакамі. Не браць у ложак чатырохногіх сяброў. Для жывёлы ў доме павінна быць выдзелена сваё пастаяннае месца, якое трэба ўтрымліваць у чысціні, як, зрэшты, і саму жывёлу. Нельга выпускаць жывёл без нагляду з кватэр і выгульваць іх у неўстаноўленых месцах.

Калі хатняя жывёла захварэла, яе неабходна даставіць у ветэрынарную клініку для агляду. Купляць хатніх гадаванцаў лепш у спецыялізаваных крамах. Калі жывёла набыта не ў спецыялізаванай краме, то яе варта агледзець у ветэрынарнай лячэбніцы.

Таксама важна выконваць правілы асабістай гігіены — выкарыстоўваць індывідуальныя бытавыя і гігіенічныя рэчы і іншае. Пры з’яўленні прыкмет скурнага захворвання неабходна звярнуцца да ўрача-дэрматолага і не займацца самалячэннем.

Загаловак у газеце: Небяспечныя плямы

Выбар рэдакцыі

У свеце

На краі бездані. Чаму Латвію захліснула пандэмія?

На краі бездані. Чаму Латвію захліснула пандэмія?

У Латвіі ўведзены жорсткі лакдаўн, каб прыпыніць распаўсюджванне COVІD-19.

Эканоміка

З «шэрымі» выплатамі цяпер лепш не рызыкаваць

З «шэрымі» выплатамі цяпер лепш не рызыкаваць

КДК выявілі 30 злачынстваў па выплаце зарплаты ў канвертах.

Эканоміка

Іван Крупко: Забеспячэнне харчовай бяспекі — найважнейшы напрамак нацыянальнай палітыкі

Іван Крупко: Забеспячэнне харчовай бяспекі — найважнейшы напрамак нацыянальнай палітыкі

 У краіне завяршаецца уборачная кампанія, скончана сяўба азімых культур.