Людзі, якія не ведаюць абмежаванняў. Неверагодныя гісторыі параалімпійскіх чэмпіёнаў

У гэтыя дні ў Токіа пішацца новая спартыўная і чалавечая гісторыя. Параалімпійскія гульні, якія цяпер прымае японская сталіца, заўсёды квінтэнсэнцыя мужнасці, сілы духу і пастаянных перамог. Прапаноўваем крыху больш даведацца пра Гульні самых мужных і самых моцных духам людзей.

• На сёння самы тытулаваны параалімпіец Беларусі Ігар Бокій мае 14 залатых медалёў галоўнага старту. Але Ігару ёсць куды імкнуцца. Амерыканка Трыша Зорн – рэкардсмен па колькасці залатых медалёў Параалімпійскіх гульняў. З 1980 па 2004 гады яна ўдзельнічала ў васьім Гульнях, падчас якіх заваявала 55 медалёў вышэйшай годнасці. У 2004 годзе на параалімпіядзе ў Афінах яна заваявала 55-е “золата” і скончыла спартыўную кар’еру.
• Бразілія заўсёды была футбольнай краінай, параалімпійскі спорт ад гэтага статусу не адстае. Краіна дамініравала ў футболе 5 на 5 з тых пор, як упершыню была прадстаўлена ў параалімпійскай праграме ў Афінах у 2004 годзе. А на Гульнях у Рыа 2016 году яны паказалі, хто тут гаспадар. Тады параалімпійская зборная, дзякуючы галам сваіх ладіраў Рычардзіньо і Жэфінью, выйграла чэмпіёнскі тытул чацвёрты раз запар.

• Венгерскі спартсмен Пал Секерш стаў першым і пакуль адзіным чалавекам у свеце, які выйграў Алімпійскія і Параалімпійскія гульні. У 1988 годзе ў Сеўле ён стаў алімпійскім чэмпіёнам у фехтаванні. У 1991 годзе трапіў у аўтамабільную аварыю. А ў 1992 годзе ў Барселоне стаў чэмпіёнам Параалімпіяды ў фехтаванні на інвалідных калясках.
• Усе чатыры фінішоры ў фінале Параалімпійскіх гульняў 2016 году на дыстанцыі 1500 метраў у класе Т13 (спартсмены з парушэннямі зроку) паказалі лепшы вынік, чым чатыры фіналісты Алімпійскіх гульняў на гэтай дыстанцыі. Тады параалімпійскі чэмпіён Абдэллаціф Бака паказаў вынік у 3 хв. 48.29 секунд. А алімпійскі чэмпіён Мэцью Сэнтравіц прыбег да фінішу за 3 хв. 56,63 секунды.

• Аўстралійскі стралок Ліббі Космала выступала на Параалімпійскіх гульнях у Рыа ва ўзросце 74 гадоў. Усяго яна ўдзельнічала ў 12 Гульнях у перыяд з 1972 па 2016 гады. На яе рахунку 12 паралімпійскіх медалёў – дзевяць залатых і тры сярэбраных у стральбе і адна бронзавая ў плаванні.  

Валерыя СЦЯЦКО