Сёлета ў краіне назіраецца значны рост нарказлачынстваў. Аб гэтым расказаў часова выконваючы абавязкі намесніка начальніка першага ўпраўлення галоўнага ўпраўлення па наркакантролі і супрацьдзеянні гандлю людзьмі Міністэрства ўнутраных спраў Аляксандр ХІЛО.
— Асаблівую трывогу выклікае рост перадазіровак сярод непаўналетніх, а таксама рост смяротных перадазіровак з іх удзелам. Да таго ж павялічылася колькасць выяўленых і спыненых каналаў распаўсюджвання наркотыкаў, а таксама фактаў перамяшчэння наркотыкаў праз дзяржаўныя граніцы. Найбольш распаўсюджаны наркотык у нашай краіне — марыхуана, сярод псіхатропаў — асабліва небяспечныя псіхаактыўныя рэчывы альфа-ПВП і параметыл-эфедрон. Мы разумеем, што толькі комплексны падыход у прафілактыцы такіх злачынстваў — найлепшае рашэнне для іх змяншэння. Таму ўзмоцнена працуем менавіта ў гэтым кірунку.
Падлеткі цяпер у асноўным здяйсняюць нарказлачынствы, у тым ліку асабліва цяжкія, праз інтэрнэт. Аб гэтым расказаў старшы інспектар па асаблівых даручэннях аддзела арганізацыі работы інспекцый па справах непаўналетніх упраўлення прафілактыкі галоўнага ўпраўлення аховы правапарадку і прафілактыкі Міністэрства ўнутраных спраў Валерый АСКЕРКА.
— Менавіта там адбываецца вярбоўка маладых людзей для дзейнасці так званых кур’ераў або закладчыкаў. Камунікацыя адбываецца праз тэлеграм-каналы. Пры гэтым ніхто з іх не задумваецца пра наступствы як для сябе, так і для сваіх родных. Але наіўна спадзявацца на беспакаранасць і думаць, што можна пазбегнуць адказнасці. Хочацца нагадаць: шмат што залежыць ад выхавання непаўналетніх. Многія бацькі дагэтуль не ведаюць, што гаджэты і сацсеткі не толькі дапамагаюць у развіцці іх дзяцей, але і выклікаюць вялікую небяспеку. Не залазячы ў асабістую прастору дзяцей, не парушаючы іх асабістыя межы, не ведаючы іх кола зносін, не заўважаючы змен у іх паводзінах, таты і мамы пазнаюць аб непрыемных наступствах занадта позна. Толькі ў першым паўгоддзі гэтага года ў арганізацыі аховы здароўя трапілі 228 маладых людзей, 58 з якіх памерлі, восем з якіх непаўналетнія.
Валерый Аскерка звярнуў увагу, што сёння змяніліся падыходы ў рабоце з падлеткамі: «Яны накіраваны на ранняе выяўленне ўжывання псіхаактыўных рэчываў дзецьмі, а таксама арганізацыю індывідуальнай прафілактычнай работы з імі. Запушчана работа цэнтраў па прафілактыцы наркаманіі, якія створаны ў Брэсце і Віцебску. У маі падпісана пагадненне аб супрацоўніцтве па прафілактыцы наркаманіі паміж Міністэрствам унутраных спраў і Беларускай праваслаўнай царквой. Актыўная інфармацыйная работа з непаўналетнімі праводзіцца супрацоўнікамі міліцыі ва ўстановах адукацыі краіны. Акрамя таго, праводзяцца тэматычныя лекцыі, круглыя сталы, культурна-масавыя, спартыўныя і іншыя мерапрыемствы».
Кіраўнік каардынацыйнага цэнтра Беларускай праваслаўнай царквы па супрацьдзеянні наркаманіі і алкагалізму ў гонар мучаніка Баніфацыя протаіерэй Дзіянісій ПЯСЕЦКІ адзначыў, што ўсё часцей маладыя людзі трапляюць пад агрэсіўны ўплыў прадстаўнікоў наркабізнесу ў пошуках лёгкага заробку і губяць свае жыцці, сваю будучыню, трапляючы ў месцы пазбаўлення волі.
— У такой сітуацыі мы не застаёмся ўбаку і бачым рашэнне гэтай праблемы ва ўмацаванні духоўна-маральнага імунітэту моладзі, фарміраванні сістэмы маральных каштоўнасцяў, якія не дазволяць пераступіць парог закона і здзейсніць учынкі, якія прыводзяць да шкоды для жыцця і здароўя. Беларуская праваслаўная царква вядзе актыўнае супрацоўніцтва з установамі адукацыі ў сферы прафілактычнай работы з падлеткамі і моладдзю. Святары ўдзельнічаюць у правядзенні інфармацыйна-асветніцкіх мерапрыемстваў у навучальных установах, дзіцячых аздараўленчых лагерах, наведваюць класныя гадзіны, бацькоўскія сходы, праводзяць гутаркі з падлеткамі, якія знаходзяцца ў цяжкай сітуацыі. У школах сталіцы для старшакласнікаў цяпер рэалізоўваецца выязны выставачны праект «Будзь вольны і незалежны», скіраваны на папулярызацыю здаровага спосабу жыцця.
Дар’я ШЛАПАКОВА
Прэв'ю: pixabay.com
У парадку дня — зацвярджэнне Канцэпцыі нацбяспекі і Ваеннай дактрыны.
Фіналістка праекта «Акадэмія талентаў» на АНТ — пра творчасць і жыццё.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.