Першага верасня — яшчэ адзін дзень у календары, калі можна абазначыць новыя планы і мэты на будучыню. У тым ліку і спартыўныя, для дасягнення якіх у сталіцы з'явіліся новыя пляцоўкі.
У Мінску адкрыўся абноўлены стадыён Рэспубліканскага дзяржаўнага вучылішча алімпійскага рэзерву. Гэта адзін з падарункаў вучылішчу на 55-гадовы юбілей, які адзначаецца сёлета. З пачаткам новага вучэбнага года педагогаў і навучэнцаў вучылішча віншавалі кіраўнік Нацыянальнага алімпійскага камітэта Віктар Лукашэнка, намеснік кіраўніка Адміністрацыі Прэзідэнта Ігар Луцкі, міністр спорту і турызму Сяргей Кавальчук, кіраўнік АБФФ Уладзімір Базанаў, выпускніца ўстановы алімпійская чэмпіёнка Антаніна Кошаль.
Ігар Луцкі перадаў віншавальныя словы ад Прэзідэнта Беларусі Аляксандра Лукашэнкі працоўнаму калектыву вучылішча. У прывітанні падкрэслена, што за гады працы ўстановы вырасла цэлая плеяда выдатных спартсменаў. «Галоўнае, што вы не толькі выхоўваеце чэмпіёнаў, але і вучыце моладзь любіць Радзіму, даяце сваім выхаванцам пуцёўку ў жыццё», — сказана ў віншаванні ад кіраўніка краіны.
Сяргей Кавальчук, міністр спорту і турызму, падкрэсліў, што вучылішча алімпійскага рэзерву — кузня кадраў для ўсяго беларускага спорту: «Жадаю, каб са сцен вашай альма-матар выходзілі новыя чэмпіёны Еўропы, свету, Алімпійскіх гульняў. У вас усё для гэтага ёсць». Актыўны ўдзел у рэканструкцыі стадыёна прыняла Асацыяцыя «Беларуская федэрацыя футбола». Старшыня арганізацыі Уладзімір Базанаў перадаў вучылішчу камплекты формы і мячы.
Новыя спартыўныя пляцоўкі з гэтага вучэбнага года будуць працаваць і ў Беларускім дзяржаўным універсітэце фізічнай культуры. У дзень ведаў тут адкрылі па адной пляцоўцы для міні-футбола, хакея на траве, валейбола, дзве баскетбольныя пляцоўкі і два тэнісныя корты. Урачыстая перадача сімвалічнага ключа адбылася падчас святочнай універсітэцкай лінейкі, удзел у якой прыняў намеснік кіраўніка Адміністрацыі Прэзідэнта Ігар Луцкі.
«Я ўжо з першых хвілін адчуў, як наш універсітэт ажывае. Мяне ў гэтым годзе парадаваў прахадны бал на нашы спартыўна-педагагічныя факультэты. І сёлета мы змаглі ажыццявіць ідэю, якую пачалі два гады таму, мы адкрылі спецыяльныя класы па фізічнай культуры. І сёння 17 выпускнікоў гэтых класаў пачнуць сваё навучанне ў нашым універсітэце. Спадзяюся, у будучыні яны стануць выдатнымі трэнерамі», — падкрэсліў рэктар БДУФК Сяргей Рэпкін.
З пачаткам новага вучэбнага года будучых спартыўных спецыялістаў павіншаваў міністр спорту і турызму Сяргей Кавальчук. «Я 46 гадоў назад прыйшоў першы раз у першы клас. І кожны год, наведваючы 1 верасня нашы навучальныя ўстановы, адчуваю асаблівае хваляванне. Хтосьці робіць першы крок у школе, хтосьці — ва ўніверсітэце пачынае паход па веды. І сёння першы крок да прафесіі робяць студэнты БДУФК. І мы з асаблівым нецярпеннем чакаем у нашых спартыўных установах выпускнікоў універсітэта, якія будуць перадаваць свае веды, — падзяліўся міністр. Па словах Сяргей Кавальчука, для першакурснікаў будзе вельмі карысна і цікава вучыцца разам з алімпійскімі чэмпіёнамі і прызёрамі. «Кожны павінен зразумець, што немагчымае магчыма на прыкладзе Івана Літвіновіча, які яшчэ студэнт, але ўжо пакарае алімпійскія вяршыні», — упэўнены ён.
Разам са спортам новы вучэбны год пачалі і сталічныя школьнікі. У штаб-кватэры Нацыянальнага алімпійскага камітэта прайшоў традыцыйны алімпійскі ўрок. Удзел у ім узялі пераможцы школьнай алімпіяды па вучэбным прадмеце «Фізічная культура». Яны праверылі свае веды ў гісторыі сусветнага алімпійскага руху і беларускага спорту. Падчас урока Беларуская алімпійская акадэмія прэзентавала новы адукацыйны праект — анлайн-школу, дзе кожны школьнік можа атрымаць цікавую інфармацыю пра алімпійскі рух і сусветны спорт. Удачы школьнікам пажадалі ўдзельнікі Алімпійскіх гульняў. А значыць, вучэбны год будзе паспяховым.
Валерыя СЦЯЦКО
Фота Аліна МАЗАВЕЦ
Амаль тысяча дзвесце чалавек збяруцца, каб вырашаць найважнейшыя пытанні развіцця краіны.
Расказаў першы намеснік старшыні Дзяржаўнага камітэта па навуцы і тэхналогіях Рэспублікі Беларусь Дзяніс Каржыцкі.
Як вакцыны выратоўваюць жыцці і чаго можа каштаваць іх ігнараванне?
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.