Жыхары аграгарадка Ціхінічы і работнікі аднайменнага сельгаспрадпрыемства Рагачоўскага раёна Гомельскай вобласці сёння прыехалі на экскурсію ў Палац Незалежнасці ў Мінску. Не проста так, а па асабістым запрашэнні Прэзідэнта Беларусі Аляксандра Лукашэнкі, які 13 жніўня пабываў у гэтым аграгарадку, перадае БелТА.
Такім чынам, сёння не міністры і дыпламаты, і нават не кіраўнік дзяржавы, гаспадары аднаго з галоўных сімвалаў беларускай незалежнасці і суверэнітэту. Іх месца занялі простыя людзі з Ціхінічаў, у тым ліку дзякуючы працы якіх ствараецца народны дабрабыт — аснова для моцнай эканомікі, без якой немагчымая і сама незалежнасць у яе праўдзівым разуменні.
Інжынер-механік, прадавец, кухар, бухгалтар, трактарыст-машыніст, аператар машыннага даення, жывёлавод, аграном, электрагазазваршчык, настаўнік, сацыяльны работнік… Гэта далёка не поўны спіс прафесій некалькіх дзясяткаў жыхароў аграгарадка, якія наведалі Палац Незалежнасці. У зале ўрачыстых цырымоній ад імя кіраўніка дзяржавы іх цёпла вітала прэс-сакратар Прэзідэнта Беларусі Наталля Эйсмант.
Да гэтага яны з непадробнай цікавасцю разглядалі інтэр’еры залы, дзе ёсць і копія Слуцкага пояса, і ганаровыя сцягі часоў БССР, і карціны, падораныя ў розныя гады Прэзідэнту Беларусі, і нават жывыя лімонныя і апельсінавыя дрэвы.
Прэс-сакратар нагадала, што раней у Ціхінічах па даручэнні Прэзідэнта ўжо арганізавалі канцэрт з удзелам беларускіх артыстаў, а наведванне палаца — гэта працяг дружбы з кіраўніком дзяржавы. «У яго сапраўды засталіся цудоўныя ўражанні ад наведвання Ціхінічаў. Мы ўсе пастаянна ўспамінаем. Гэта такі райскі куток. Мы ненадоўга прыехалі, але, сапраўды, ваш край нам запомніўся. Прэзідэнт у курсе, што сёння вы тут», — сказала яна.
Наталля Эйсмант адзначыла, што Аляксандр Лукашэнка зусім не любіць, калі Палац Незалежнасці называюць яго рабочай рэзідэнцыяй, і менавіта па яго даручэнні некалькі гадоў таму гэты аб’ект адчыніў дзверы для экскурсій.
«Зрабілі кучу фатаграфій. Запомнілася, што ўсё гэта зроблена беларускімі людзьмі, што гэта ўсё наша. Вельмі прыемна, што нас так сустрэлі, распавядаюць усе падрабязнасці. Гэта вельмі цікава, чапляе. Усё прыгожа зроблена, проста душа радуецца. Вельмі рада, што мы прыехалі сюды», — падзялілася Наталля.
«Усё прыгожа. Падабацца. Проста прыемна тут знаходзіцца. Адчуваецца атмасфера гэтых залаў. У кожнага ёсць свая разыначка», — дадаў Анатоль.
Будзе чым падзяліцца з сяброўкамі ў плане яркіх успамінаў і ў юнай Соф’і. «Гэта для мяне нечакана і цікава, пазітыў нейкі», — сказала яна.
У жніўні Аляксандр Лукашэнка не толькі наведаў сельгаспрадпрыемства і фізкультурна-аздараўленчы комплекс у самім аграгарадку, але і пагутарыў з мясцовымі жыхарамі. Нагода для прыезду была больш глабальная — паглядзець, як на прыкладзе гэтага аграгарадка рэалізуецца праект «Вёска будучыні» па развіцці і добраўпарадкаванні такіх сельскіх населеных пунктаў.
Усяго па краіне ў гэты праект уключылі больш за 170 аграгарадкоў і вёсак.
За апошнія два гады ў Ціхінічах абнавілі дарожную інфраструктуру, адрамантавалі і пабудавалі новыя сацыяльныя і спартыўныя аб’екты, азелянілі і добраўпарадкавалі тэрыторыю аграгарадка. Таксама была ўдасканалена вытворчая сфера прадпрыемстваў камунальнай уласнасці. Праца па ўладкаванні Ціхінічаў і пераўтварэнні аграгарадка ў «вёску будучыні» працягнецца да 2025 года.
Фота БелТА
А разам з імі навучанне, сацпакет і нават жыллё.
Беларусь — адзін з сусветных лідараў у галіне здабычы і глыбокай перапрацоўкі торфу.
«Мы зацікаўлены, каб да нас прыязджалі».
