Беларусы рыхтуюцца да матчу Кубка Дэвіса

Беларускія тэнісісты зноў аб’ядналіся, каб прадставіць краіну на сусветна вядомым Кубку Дэвіса. У матчы 1 круга І Сусветнай групы каманда Беларусі сустрэнецца з камандай Аргенціны. Сустрэча пройдзе ў Буэнас-Айрэс з 18 па 19 верасня. Да знакавага матчу беларускія тэнісісты рыхтуюцца на родных мінскіх кортах. Іх трэніроўку наведала карэспандэнт «Звязды». 

Барацьба ў аргенцінскай сталіцы абяцае быць цікавай і напружанай. Беларускі трэнерскі штаб зрабіў акцэнт на маладых і перспектыўных ігракоў — Аляксандра Згіроўскага, Марціна Барысюка, Данііла Астапенкава і Эрыка Аруцюняна. У процівагу ім — масцітыя і вопытныя аргенцінцы. Першы нумар каманды Дыега Шварцман займае 14-ую пазіцыю сусветнага рэйтынгу, а Федэрыка Корыя размясціўся на 62-м радку. Лёгка беларусам не будзе. Таму, па словах капітана каманды Аляксандра Васілеўскага, праграма мінімум — паказаць дастойны тэніс, дастойнае супраціўленне такой моцнай камандзе і набрацца вопыту. А каманда максімум, канешне, перамагчы. 

«Юніёры Данііл Астапенкаў і Эрык Аруцюнян вельмі добра выступалі на нядаўніх юніёрскіх турнірах, паднялі свой рэйтынг. Эрык зараз — 36-ы ў свеце сярод юніёраў, а Данііл — 60-ы. І добры вынік яны паказалі менавіта на грунтовай серыі. Старэйшыя ігракі Марцін і Аляксандр таксама набралі добрую форму. Не сакрэт, што каманда Аргенціны — фаварыты і яны маюць высокі рэйтынг, узровень падрыхтоўкі. Ігракі вельмі вопытныя, масцітыя і, канешне, нам будзе вельмі цяжка. Але мы настроены рабіць усё, што ў нашых сілах. Але гульня ёсць гульня і перамагае мацнейшы. У Аргенціне тэнісісты круглы год гуляюць на грунтовых кортах, гэта іх любімае пакрыццё і яны на ім асы. Таму гульня будзе вельмі актыўная. І будзе вельмі добра, калі нашы хлопцы змогуць іх атакаваць, калі пойдзе падача», — расказаў Аляксандр Васілеўскі. 

Адказнасць на вынік сустрэчы легла на плечы маладых тэнісістаў не проста так. У лідараў беларускай каманды па аб’етыўных прычынах не атрымаецца сыграць за краіну. Ілья Івашка атрымаў траўму падчас доўгага і напружанага сезону. Ягор Герасімаў падчас выступлення на US Open здаў станоўчы тэст на каранавірус і, знаходзячыся ў ізаляцыі, не мог трэніравацца. У Андрэя Васілеўскага прычына значна прыемней. Менавіта ў даты матчу Беларусь-Аргенціна яго жонка павінна нарадзіць дзіця, таму тэнісіст вырашыў у такі адказны момант быць з сям’ёй. 

Аднак Аляксандр Васілеўскі ўпэўнены, што маладосць каманды пойдзе ёй у плюс. «Нам няма чаго губляць. Калі прайграем у барацьбе, ніхто не скажа, што мы дрэнна выступілі», — ўпэўнены капітан каманды. 

Нягледзячы, на сваю маладосць, ігракі маюць вопыт выступлення ў матчах Кубку Дэвіса. Дэбютанат толькі Эрык Аруцюнян. Але і ён настроены рашуча: «Я ў добрай форме, нядаўна выйграў турнір ITF да 18 гадоў. Плануем аддаць усе сілы, паказаць усё, што ўмеем. Першы раз выступаць за каманду ў Кубку Дэвіса, канешне, адказна, але спадзяюся, што гэта надасць мне сіл». 

Данііл Асіпекаў упэўнены, што галоўнае — гэта камандны дух, камандная работа і ўзаемадапамога. Толькі так можна дасягнуць поспеху. «Без лідараў, канешне, складана. Але што зробіш, калі такая сітуацыя склалася. Значыць, будзем гуляць у такіх умовах. Тым больш, што мы выступаем за краіну, а гэта заўсёды надае вялікую матывацыю», — падкрэсліў тэнісіст. Марцін Барысюк успрымае будучую сустрэчы як выклік самому сабе. Маладосць каманды ён лічыць, з аднаго боку, перавагай, з іншага — недахопам. «У нейкіх момантах скажацца недахоп вопыту ў нас. Але мы ўсе будзем вельмі зараджаныя. Тэніс не проста наша работа, гэта наша жыццё. Таму гэта будзе добры вопыт для нас усіх», — упэўнены спартсмен. 

З тым, што матч з аргенцінцамі будзе добрым вопытам згодзен і першы нумар каманды Аляксандр Згіроўскі. «На турнірах, дзе мы выступаем паасобку мы не сустракаемся з нашымі будучымі сапернікамі. І яны для нас як маякі. Будзе вельмі карысна паглядзець, што адрознівае нас ад ігракоў, якія знаходзяцца ў топе сусветнага рэйтынгу. Нашы сапернікі больш рэйтынгавыя і таму, мабыць, ціск на іх будзе большым, чым на нас. Нам няма чаго губляць, а набыць мы можам многае», — адзначыў Аляксандр.
Тэнісісты і іх капітан упэўнены, што у такім складаным матчы галоўнае — гэта раслабіцца і гуляць у задавальненне. І тады атрымаецца паказаць лепшы тэніс і нават выканаць праграму максімум. 

Валерыя СЦЯЦКО

Фота Беларускай тэніснай федэрацыі