Вы тут

ХХV Міжнародны тэатральны фестываль «Белая Вежа» пройдзе ў Брэсце з 10 да 18 верасня


ХХV Міжнародны тэатральны фестываль «Белая Вежа» пройдзе ў Брэсце з 10 да 18 верасня. Творчыя калектывы розных краін прыедуць у Беларусь, каб падарыць гледачу яркія эмоцыі. У фестывальнай афішы заяўлены 22 тэатры з сямі краін — Беларусі, Арменіі, Грузіі, Казахстана, Малдовы, Расіі і Таджыкістана. Фестываль прысвечаны 30-гадоваму юбілею Саюза Незалежных Дзяржаў і праводзіцца пры садзейнічанні Міждзяржаўнага фонду гуманітарнага супрацоўніцтва.


Праграма фестывалю ўжо вядомая, знайсці яе можна на афіцыйным сайце Брэсцкага акадэмічнага тэатра драмы. У спісе пастановак адразу сустракаюцца вядомыя, шматабяцальныя назвы: «Вій», «Запіскі юнага лекара», «Новая зямля», «На дне» і шмат што іншае. Паказ адбудзецца на трох мовах — беларускай, рускай і таджыкскай (у суправаджэнні сінхроннага перакладу на рускую мову). Пастаноўкі пройдуць на трох пляцоўках горада: у вялікай і малой залах Брэсцкага акадэмічнага тэатра драмы, у Палацы культуры прафсаюзаў і Брэсцкім тэатры лялек. Сярод чаканых удзельнікаў фестывалю — чатыры ўладальнікі Гран-пры папярэдніх форумаў, лаўрэаты Нацыянальнай тэатральнай прэміі Беларусі і расійскай «Залатой маскі».

Пра цікавыя дэталі будучага мерапрыемства мы даведаліся ў дырэктара Міжнароднага тэатральнага фестывалю «Белая Вежа», заслужанага дзеяча мастацтваў Беларусі Аляксандра Козака:

— Што адметнага адбудзецца на сёлетнім фестывалі? Чым здзівяць гледача?

— Сёлета з-за абмежавальных ковідных мер фестываль будзе праходзіць без удзелу еўрапейскіх калектываў. Гэта дазволіла нам больш увагі аддаць цікавым і перспектыўным тэатрам краін СНД, з якімі мы будзем рады пазнаёміць нашых гледачоў. Таксама ў фестывалі гэтага года шырока прадстаўлена беларуская праграма. Дзевяць нацыянальных калектываў парадуюць сваёй творчасцю берасцейцаў. Гэта і Нацыянальны акадэмічны драматычны тэатр імя М. Горкага з Мінска, які прадставіць сцэнічную фантазію на гістарычную тэму — «Пане Каханку», і Рэспубліканскі тэатр беларускай драматургіі з эксперыментальнай пастаноўкай «Шлюб з ветрам», дзе большая частка дыялогаў заменена музыкай і песнямі. У блоку тэатра лялек будуць прадстаўлены цэлыя тры вядомыя беларускія калектывы. Брэсцкі тэатр лялек выступіць з драмай па класіцы беларускай літаратуры «Новая зямля». Магілёўскі абласны тэатр лялек пакажа сучасную дзёрзкую інтэрпрэтацыю класічнай аповесці Вальтэра «Кандзіда, або Аптымізм», а Беларускі дзяржаўны тэатр лялек раскажа аб цяжкай працы маладых медыцынскіх работнікаў у спектаклі «Запіскі юнага ўрача» паводле Булгакава. Брэсцкі акадэмічны тэатр драмы ў рамках форуму пакажа адну са сваіх апошніх прэм'ер — эксперыментальны спектакль па сучаснай драме «Дзень Б.» у пастаноўцы Дзяніса Фёдарава. Пастаноўка яркая і ўжо палюбілася брастаўчанам. І гэта далёка не ўсё. Мы спадзяёмся, што гледачы фестывалю па-новаму адкрыюць для сябе нацыянальны тэатр, а таксама тэатр краін СНД.

— Якія фестывальныя традыцыі будуць захоўвацца сёлета?

— Самая галоўная традыцыя тэатральнага фестывалю «Белая Вежа» — гэта падбор якаснай і разнастайнай рэпертуарнай афішы. На мой погляд, нягледзячы на ўсе абмежаванні, мы справіліся з гэтай задачай. У афішы гэтага года прадстаўлены спектаклі драматычныя, музычныя і пластычныя, а таксама спектаклі тэатра лялек для дарослых і дзяцей. Кожны глядач знойдзе тую пастаноўку, якая кране яго і запомніцца на доўгія гады. На мой погляд, менавіта дзякуючы прафесійнаму адбору спектакляў рэпутацыя нашага фестывалю з году ў год мацнее, а брэсцкая публіка з нецярпеннем чакае верасня.

— Чаму варта схадзіць на фестываль?

— Гэта заўсёды вялікае культурнае свята. Ён дорыць гледачам незабыўныя эмоцыі, якія застаюцца ў сэрцы надоўга. А таксама наш форум дазваляе брэсцкай публіцы пазнаёміцца з велізарнай разнастайнасцю культур, з тэатральным мастацтвам розных дзяржаў і нацый. Гэта ўнікальны шанц убачыць тэатральны працэс у яго развіцці. Дзякуючы форуму мы падтрымліваем і развіваем дыялог культур, спрыяем фарміраванню сяброўскіх адносін і з'яўленню новых творчых праектаў. Мы робім усё магчымае, каб паход у тэатр быў прыемным і бяспечным баўленнем часу.

— З-за ковіду ёсць складанасці ў правядзенні масавых мерапрыемстваў. У сувязі з гэтым, магчыма, будуць анлайн-спектаклі?

— Тэатр усё ж, на мой погляд, — мастацтва кантактнае. Прысутнасць гледача ў зале дапамагае ходу спектакля, натхняе артыстаў і напаўняе пастаноўкі сапраўдным жыццём. Таму мы прыклалі максімальныя намаганні, каб мерапрыемства прайшло ў жывым фармаце. Будзьце ўпэўненыя, што ўсе антыковідныя меры будуць выкананы. Мы таксама просім гледачоў пры паходзе ў тэатр строга прытрымлівацца масачнага рэжыму, каб засцерагчы сябе і гасцей.

Азнаёміцца з праграмай фестывалю і набыць квіткі на спектаклі можна ў касе тэатра з дапамогай электроннага заказу квіткоў на сайце і па тэлефоне 34-26-57.

Ангеліна ВАРАТЫНСКАЯ

Загаловак у газеце: «Фестываль — гэта радасць і духоўны рост»

Выбар рэдакцыі

У свеце

На краі бездані. Чаму Латвію захліснула пандэмія?

На краі бездані. Чаму Латвію захліснула пандэмія?

У Латвіі ўведзены жорсткі лакдаўн, каб прыпыніць распаўсюджванне COVІD-19.

Эканоміка

З «шэрымі» выплатамі цяпер лепш не рызыкаваць

З «шэрымі» выплатамі цяпер лепш не рызыкаваць

КДК выявілі 30 злачынстваў па выплаце зарплаты ў канвертах.

Эканоміка

Іван Крупко: Забеспячэнне харчовай бяспекі — найважнейшы напрамак нацыянальнай палітыкі

Іван Крупко: Забеспячэнне харчовай бяспекі — найважнейшы напрамак нацыянальнай палітыкі

 У краіне завяршаецца уборачная кампанія, скончана сяўба азімых культур.