Вы тут

Адно з самых камфортных паштовых аддзяленняў працуе ў Капылі


Адно з самых утульных, камфортных паштовых аддзяленняў з сучасным электронным абсталяваннем працуе ў Мінскай вобласці ў старажытным Капылі. Мясцовыя жыхары заходзяць сюды з ахвотай. Для наведвальнікаў і супрацоўнікаў тут створаны найлепшыя ўмовы.


Будынак Капыльскага ВПС

— У рамках мерапрыемстваў па падрыхтоўцы да XVІІІ Дня беларускага пісьменства, які сёлета прайшоў у Капылі, наш горад змяніўся. Змянілася і гарадское паштовае аддзяленне, — адзначыў начальнік Капыльскага ўчастка паштовай сувязі Слуцкага РВПС Ігар Бурак. — У аддзяленні выкананы сучасны рамонт, тут з'явілася новая ўтульная мэбля, пачала працаваць электронная чарга, дарэчы, з функцыяй папярэдняга запісу. Напрыклад, знаходзячыся дома, чалавек можа выбраць прымальны для яго час і забраніраваць яго для наведвання пошты. Потым у аддзяленні застаецца толькі пацвердзіць гэтую бронь і адразу атрымаць неабходныя паслугі. Гэта, згадзіцеся, для многіх людзей вельмі зручна.

Да паслуг наведвальнікаў — сучаснае электроннае абсталяванне.

Акрамя таго, у аддзяленні паштовай сувязі абсталяваны прыгожы дзіцячы куток. Каб дзеці, якія прыйшлі з бацькамі на пошту, не сумавалі там у час знаходжання. Маленькія хлопчыкі і дзяўчынкі могуць у гэтым кутку маляваць, займацца на навучальных панэлях, якія знаходзяцца на сценах кутка.

Дзіцячы куток у паштовым аддзяленні.

Па словах Ігара Бурака, у гарадскім аддзяленні паштовай сувязі працуе выдатны калектыў. Усе работнікі вопытныя, добрасумленныя, адказныя. Сёння яны вельмі задаволены ўмовамі працы, якія тут створаны. Дарэчы, рамонт выкананы не толькі ў аперацыйнай зале, але і ў службовых памяшканнях. Прыгожа зараз выглядае і тэрыторыя перад будынкам участка сувязі. А на самым будынку зусім нядаўна з'явіліся дзве тэматычныя карціны, якія, вядома, надаюць прывабнасці.

Сёння ў Капыльскім раёне дзейнічаюць 25 аб'ектаў сувязі, з якіх адно, найбуйнейшае, знаходзіцца у райцэнтры. Ёсць і перасоўнае аддзяленне, якое абслугоўвае жыхароў вёсак. Самыя буйныя з сельскіх аддзяленняў знаходзяцца у Цімкавічах і Быстрыцы.

Спецыялісты паштовай дзейнасці Алена Яневіч і Валянціна Пархімовіч.

— Усяго ў нашым аддзяленні працуе 11 работнікаў, сярод іх — пяць паштальёнаў, — паведаміла начальнік АПС Таццяна Лазюк. — Абслугоўваем прыкладна 10 тысяч чалавек — усё насельніцтва Капыля. Горад наш невялікі і многіх сваіх кліентаў мы добра ведаем. Зносіны з наведвальнікамі склаліся прыязныя і ўзаемна паважлівыя. Да кожнага знойдзем падыход, вырашым любыя пытанні. Калектыў аддзялення склаўся дастаткова даўно. Дарэчы, усіх супрацоўнікаў адбіралі старанна, улічваючы як дзелавыя, так і чалавечыя якасці. Адносіны паміж людзьмі вельмі дружныя. Некаторыя работнікі маюць вельмі салідны вопыт. Я сама працую ў галіне сувязі 39 гадоў. Але хачу падкрэсліць, што ўсе без выключэння нашы супрацоўнікі захавалі адданасць сваёй прафесіі.

Сяргей РУЧАНАЎ

Выбар рэдакцыі