Вы тут

Анімацыя як трамплін да дарослага і самастойнага жыцця


Ведаеце, які зараз адзін з найбольш актуальных трэндаў у сацсетках? Мабільная анімацыя. Наша гераіня Аляксандра ЖУРОМСКАЯ зацікавілася ёй амаль два гады таму, і зараз гэты занятак для дзяўчыны не проста хобі, а работа па душы.


Фота з архіва гераіні.

— Я з Мазыра, але зараз жыву ў Мінску. З дзяцінства думала, што стану вядомай спявачкай, аднак лёс распарадзіўся па-іншаму, — расказала наша суразмоўніца. — Скончыла Мінскі дзяржаўны лінгвістычны ўніверсітэт, паралельна адвучылася на візажыста. Але пайшла ў грамадскае харчаванне, дзе прапрацавала дзесяць гадоў: афіцыянткай, метрдатэлем у адным з вядомых рэстаранаў сталіцы. З абавязкамі спраўлялася добра, была магчымасць развівацца ў гэтай сферы, аднак мне заўсёды хацелася рэалізаваць менавіта свой творчы патэнцыял. Таму ў мінулым годзе прыняла рашэнне звольніцца і пачала рабіць відэа- і фотакантэнт для сацсетак знаёмых, сяброў. Хутка да мяне звярнулася сяброўка, якая прапанавала весці профіль у Іnstagram яе рэстарана. Пагадзілася, але не думала, што змагу гэтым зарабляць, да таго ж адчувала шмат няўпэўненасці. Але мне вельмі падабалася ствараць прыгожыя відэаролікі, таму не спынялася ў развіцці.

Заказчыкі пачалі прыходзіць да Сашы з прапановамі супрацоўніцтва амаль адразу. Яна самастойна вывучала сферу мабільнай анімацыі, разбіралася і эксперыментавала з дадаткамі.

— Анімацыя стала для мяне трамплінам да дарослага і самастойнага жыцця. З гэтым было не вельмі складана, таму што асабістыя сацсеткі я актыўна вяду яшчэ з юнацтва. Ужо правяла каля дзесяці вэбінараў па мабільнай анімацыі, майстар-класы, выпусціла некалькі патокаў вучаніц аўтарскага курса. Каб усё атрымалася, з раніцы да ночы па 18–20 гадзін на працягу некалькіх месяцаў рыхтавала якасны кантэнт, напрацоўвала ўласныя «фішкі». І цяпер падпісчыкі і вучаніцы адзначаюць, што мае работы не падобныя на іншыя, адрозніваюцца асаблівай эстэтыкай і складанасцю выканання. Над кожным сваім праектам працую доўга, педантычна прадумваю кожную дэталь, кадр, таму ролікі выглядаюць цэласна і дынамічна. Акрамя таго, для мяне важна расставіць правільныя акцэнты ў музыцы. Таму можна сказаць, што для ўдалага выніку я не шкадую ні часу, ні сіл.

Аляксандра супрацоўнічае з вядомымі беларускімі і замежнымі брэндамі. Дзяўчына прызнаецца, што яна — самы строгі для сябе крытык...

— Шчыра кажучы, асабліва з крытыкай я не сутыкалася, і для мне гэта прыемна. Да таго ж чым больш напрацоўвала вопыт, тым больш станавілася ўпэўненай у сваіх сілах. Лічу сябе гнуткай у рабоце: калі заказчык патрабуе — магу перарабіць або падкарэкціраваць відэаролік колькі трэба разоў. На стварэнне аднаго 15- або 30-секунднага ў мяне сыходзіць прыкладна пяць гадзін. Памятаю, аднойчы рабіла двух- і чатыроххвілінныя відэа, тады спатрэбілася каля двух тыдняў. Гэта да таго, што не так усё проста, як падаецца на першы погляд. Каб рабіць такія ролікі, патрабуецца добрая тэхніка — раю карыстацца Іphone, ён больш падыходзіць для работы, там нашмат больш патрэбных функцый і інструментаў. А таксама трэба мець пачуццё густу, нагледжанасці і жаданне развівацца, тварыць.

Саша расказала, што, для таго каб пачаць зарабляць на мабільнай анімацыі, хопіць усяго трох мабільных дадаткаў: Bazart (відэарэдактар), Vіdeoleap (фотарэдактар), Motіonleap (для апрацоўкі дэталяў).

— Для многіх з тых, хто навучаецца мабільнай анімацыі, вялікую цяжкасць складае актыўнае вядзенне сацсетак. Але трэба разумець: зараз блогінг выйшаў на іншы ўзровень, змяніліся «правілы гульні», таму гэтаму абавязкова трэба вучыцца. Мала ведаць асновы мабільнай анімацыі, варта яшчэ і ўнікаць у маркетынг, блогінг, законы прасоўвання ў Іnstagram. Я люблю сацсеткі і адчуваю сябе там як рыба ў вадзе. Здымаць сторыз, рабіць фота- і відэакантэнт для мяне ў радасць. Штодзень публікую цікавы кантэнт, афармляю калажы, дапамагаю весці розныя камерцыйныя профілі, падтрымліваю зваротную сувязь са сваімі вучаніцамі. З такім хуткім рытмам перыядычна выгараю, аднак з-за таго, што ёсць вялікае жаданне вывесці свой брэнд на новы ўзровень, у якім бы я ні была настроі, бяру сябе ў рукі і іду далей. У мяне пакуль няма сваёй каманды, дзесьці ўнутры яшчэ сядзіць праблема пад назвай «зраблю ўсё сама», але ў далейшым усё ж такі планую дэлегіраваць бізнес-частку свайго занятку іншым спецыялістам, каб у мяне было больш часу на творчасць.

Саша кажа, што настройвацца на правільны рабочы лад ёй дапамагае прырода, добрая музыка і медытацыі. «Але на гэта ўсё застаецца вельмі мала часу. У мяне ёсць дакладная мэта — развіваць асабісты брэнд, маштабаваць яго і актыўна і якасна прасоўвацца ў сацсетках».

Дар’я ШЛАПАКОВА

Выбар рэдакцыі

Культура

Жэмчуг і пясок. Пяць расчараванняў Максіма Багдановіча

Жэмчуг і пясок. Пяць расчараванняў Максіма Багдановіча

існуе тэорыя, што толькі той, каму выпала перажыць моцныя ўзрушэнні, можа стаць сапраўдным паэтам.

Грамадства

Вакцынацыя і рэвакцынацыя: калі і каму прышчапляцца ад каранавіруса паўторна

Вакцынацыя і рэвакцынацыя: калі і каму прышчапляцца ад каранавіруса паўторна

Якую вакцыну выбраць для паўторнай прышчэпкі ад каранавіруса?

Грамадства

Крэпасць духу. 10 натхняльных храмаў Гродзеншчыны

Крэпасць духу. 10 натхняльных храмаў Гродзеншчыны

Гэта культурнае багацце прыцягвае ў краіну масу падарожнікаў.