Вы тут

«Мір 24»: новы «гулец» у нашай тэлепрасторы


Вядома, што кожны з нас у выбары інфармацыі аддае перавагу той крыніцы, якой давярае. Але не менш важным з'яўляецца і той момант, што нам там прапануюць. Прыгожай карцінкай і гучнымі загалоўкамі ў наш час здзіўляць ужо даволі складана, а вось уменне даць аўдыторыі якасны і актуальны кантэнт можа стаць перавагай. Як і тое, калі гледачу даюць свабоду самому рабіць высновы з пачутага і ўбачанага.

Зусім нядаўна ў агульнадаступных пакетах беларускіх кабельных аператараў адбылося «папаўненне»: сярод бясплатных тэлеканалаў з'явіўся «Мір 24». Ён з'яўляецца часткай Міждзяржаўнай тэлерадыёкампаніі «Мір», заснаванай яшчэ ў кастрычніку 1992 года ў выніку дагавора краін — удзельніц СНД. Пра тое, чым жыве тэлеканал, на якія тэндэнцыі арыентуецца і чаго ад яго варта чакаць масаваму гледачу, мы пагаварылі з галоўным рэдактарам студыі тэлебачання Прадстаўніцтва МТРК «Мір» у Беларусі Андрэем Аляксеенкам і намеснікам галоўнага рэдактара канала Аленай Будрыцовай.


«Зроблена ў Еўразіі». Альшаны.

«Мір 24» пачаў сваю работу з 2013 года і сёння пазіцыянуецца як «першы еўразійскі інфармацыйны тэлеканал, які фарміруе новыя еўразійскія эліты». Тут аўдыторыі прапаноўваюць у прамым эфіры выпускі навін з краін СНД (штодня кожную гадзіну). Плюс кругласутачна — інфармацыйныя стужкі бягучым радком з «гарачымі» навінамі і тэмамі дня. Акрамя гэтага, у тэлеканала шырокі асартымент праграм і праектаў уласнай вытворчасці, зробленых, у прыватнасці, беларускім прадстаўніцтвам, сярод якіх сёння «Еўразія даслоўна», «Культ асобы», «Нашы іншаземцы», «Пяць прычын застацца дома» і іншыя. Іх аўтары ведаюць дакладна, як нараджаецца беларускі крышталь і дзе ў нас здабываюць соль, не горшую за марскую... А ў лінейцы «Еўразія рэгіёны» можна ладзіць завочныя вандроўкі, дзе гледачоў не раз падкуплялі каларыт і культурныя, гістарычныя палітры нашых рэгіёнаў. Аднак усё ж застаецца актуальным простае пытанне...

— Ці варта ўвогуле сёння сучаснаму чалавеку глядзець тэлевізар, калі ёсць шмат крыніц інфармацыі і настолькі распаўсюджаны інтэрнэт?

Андрэй Аляксеенка: — Так, але проста кожны сам вырашае, дзе шукаць тое, што хочацца паглядзець. Нават тэлебачанне сышло ў YouTube, і наш «Мір 24» сёння можна паглядзець там. Як у прамой трансляцыі, так і пасля выхаду той ці іншай праграмы ў эфіры. Глядач адкрывае сайт тэлеканала і трапляе адразу на платформу, дзе можа знайсці цікавую і актуальную інфармацыю пра Беларусь, Казахстан, Расію, Азербайджан, Арменію і г. д. Глядзім «Культ асобы» і дазнаёмся, чым жывуць вядомыя і знакамітыя. Заходзім на «Зроблена ў Еўразіі», і нам прапануюць цікавыя рэпартажы, напрыклад, з беларускага завода ў Віцебску, дзе за дзесяць хвілін ткуць дыван. А як уключаеш «Пяць прычын застацца дома», то можна перанесціся на курорт, скажам, Грузіі. Тэлебачанне ў рэжыме рэальнага часу і на інтэрнэт-пляцоўцы — сёння ўжо непадзельныя рэчы...

Алена Будрыцова: — Адзінае, тэлевізар вызваляе нам рукі. Уключыў любімы канал і можаш займацца сваімі справамі. Варта згадаць і пра вельмі пераканаўчы плюс тэлеканала «Мір 24». Ён заключаецца ў тым, што тут інфармацыя трансліруецца блокамі. Калі, напрыклад, раніцай вы не паспелі альбо праслухалі выпуск цікавай праграмы, то на працягу дня можна вярнуцца да яе перагляду.

А паглядзець, паверце, кожны знойдзе што. І, галоўнае, цяпер любы ахвотны зможа зрабіць гэта, таму што з нядаўняга часу «Мір 24» уваходзіць у бясплатныя пакеты кабельных аператараў. Лічыце, тэлеканал цяпер можа смела стаць госцем у доме кожнага беларуса. Праўда, пакуль нашым тэлегледачам яшчэ трэба пазнаёміцца з ім, прыгледзецца да прапаноў і вырашыць, ці варты такі госць душэўнага прыёму.

А. А.: — «Мір 24» інфармацыйна насычаны тэлеканал, які дае магчымасць сваёй аўдыторыі за лічаныя хвіліны перамяшчацца з краіны ў краіну і дазнавацца пра апошнія падзеі з тых рэгіёнаў, якія раней былі ў складзе адзінага Савецкага Саюза. Існуюць жа розныя аб'яднанні накшталт СНД, ЕАЭС, часткай якіх з'яўляецца Беларусь, але часта мы нічога не ведаем пра тыя працэсы, якія там адбываюцца. А наш канал якраз і распавядае пра гэта.

— То-бок, вы прапаноўваеце аўдыторыі пэўны зрэз падзей і іх аналітыку?

А. А.: — Мы паказваем і расказваем, што адбываецца і дзе мы жывём, якія ў нас эканамічныя, палітычныя ўзаемасувязі з іншымі краінамі. Можна сказаць, тут прысутнічае яшчэ і асветніцкі фармат, якога не хапала. Ёсць падзеі і эксперты, якія могуць патлумачыць сутнасць, а сам журналіст павінен быць нейтральным... Напрыклад, зусім нядаўна мы расказвалі, што ў Беларусі з'явілася сядзіба, дзе можна вырошчваць арганічныя прадукты з адпаведным знакам якасці. І мы ведаем, што ў ЕАЭС такі ж працэс запускаецца, таму даём магчымасць гледачам убачыць, як кожная з краін саюза працуе ў дадзеным кірунку і як пакупніку разумець, што яму прапаноўваюць у краме. Так і па іншых напрамках тлумачым сутнасць і нюансы... Але ж людзям не будзеш навязваць нейкі пункт гледжання — яны проста пасля азнаямлення з інфармацыяй самі пачынаюць разумець, што да чаго.

А. Б.: — Думаю, тое, што мы робім, дадае больш яснасці адносна тых працэсаў, якія стаяць за вышэйзгаданымі абрэвіятурамі. Цяпер людзі змогуць наглядна бачыць і разумець, што канкрэтна для нашай краіны дае тое ці іншае аб'яднанне.

— Значыць пазіцыянаванне «Мір 24» як тэлеканала, які «фарміруе еўразійскія эліты», і мае на ўвазе той самы асветніцкі акцэнт?

А. А.: — Мы мала ведаем, што ўяўляе сабой палітычная, эканамічная ці бізнес-мадэль у краін былога Савецкага Саюза. Мы ўсе адносна маладыя, цікава, у якім напрамку кожная з дзяржаў развіваецца. І «Мір 24» расказвае якраз пра тое, чым жыве, скажам, Таджыкістан. Альбо хто яны, заможныя людзі Казахстана. У той жа Арменіі зараз вельмі добра развіваецца ІТ-індустрыя. І мы, калі знаёмім аўдыторыю з прадстаўнікамі гэтых эліт, прапаноўваем ацаніць, як і ў чым развіваецца кожная з краін.

Хоць тэлеканал і арыентуецца пераважна на аўдыторыю 35+, але вялікі і разнастайны асартымент праграм дазваляе быць цікавым для самых розных гледачоў. І таму любы эфірны прадукт, незалежна ад таго, ці гэта сюжэт з навіной, ці дакументальны фільм, аўтары робяць якасна і з выкарыстаннем сучасных тэхналогій, бо ўлічваюць, што цяпер людзі актыўныя і трэба адпавядаць іх запытам, быць дынамічнымі. Мінулы год і пандэмія ўнеслі пэўныя карэкціроўкі ў работу і ацэнку зробленага. Калі гледачы апынуліся дома і пачалі больш глядзець тэлевізар, то стала ясна, у якіх напрамках адносна кантэнту нам варта працягваць, а ад чаго можна адмовіцца. І цяпер у эфіры засталіся толькі самыя моцныя.

«Попел Хатыні». Следчы.

Своеасаблівымі візітоўкамі тэлеканала, мяркую, па праве можна лічыць і дакументальныя фільмы. Паспяховымі сталі «Попел Хатыні. Боль без тэрміну даўніны», «ЧАЭС 35. Горыч Палыну», «Беларусь. Незалежнасць. Місія выканальная». Зусім нядаўна прайшоў у тэлеэфіры дакументальны фільм «Фабзайцы» (сумесны праект Беларускага і Санкт-Пецярбургскага філіялаў, прысвечаны 80-годдзю блакады Ленінграда), што распавядае пра беларускіх падлеткаў, якіх час і лёс выпрабавалі на трываласць у няпростых умовах.

А. Б.: — Было няпроста ў працэсе падрыхтоўкі фільма, бо не змаглі ўжо знайсці нікога з дзяцей, хто вярнуўся адтуль. Вялі напружаную працу ў архівах Пецярбурга. Потым думалі, як паказаць лёсы і гісторыі гэтых дзяцей. І ў выніку атрымалася вельмі кранальная гісторыя. Тэма цікавая і мала каму вядомая. Уявіце маштабы трагедыі: з 24 тысяч дзяцей вярнуліся пасля толькі 12 тысяч. І такія старонкі гісторыі заўсёды цікава адкрываць. Няхай яны і з сумным зместам, але іх трэба ведаць і не забываць. Будзем спадзявацца, што і ў наступным годзе аўдыторыя «Мір 24» убачыць не менш цікавыя дакументальныя праекты, напрыклад на ваенную тэматыку...

— Поспех прадстаўленых на YouTube-канале праграм вы ацэньваеце па цікавасці да іх гледача ў першыя гадзіны, дні ці ў доўгатэрміновай перспектыве?

А. Б.: — Як правіла, асноўную масу праглядаў праграма набірае адразу пасля выхаду. Потым можа яшчэ нешта дабраць, але гэта ўжо невялікі працэнт. Напрыклад, калі выйшаў выпуск «Зроблена ў Еўразіі» пра фермераў з Альшан, то ўжо літаральна ў першыя дні было 40 тысяч праглядаў. Так заўсёды: альбо выстрэльвае, альбо не... Хоць важна яшчэ ўлічваць і тое, што сваю ролю адыгрываюць розныя нюансы, якія датычацца менавіта аптымізацыі відэа на YouTube. І таму бывае, што матэрыял цудоўны, але ён застаецца недаацэненым на гэтай пляцоўцы.

Чалавечы фактар, відаць, спрацоўвае ўсюды. Аднак у тым, дзе яго можна адсачыць і скіраваць на добры вынік, кіраўніцтва тэлеканала «Мір 24» трымае руку на пульсе. Тут заўсёды адкрытыя да супрацоўніцтва, але перавагу аддаюць прафесіяналам мэтанакіраваным і з жаданнем працаваць. А значыць, і гледачам гарантаваны якасны кантэнт.

Алена ДРАПКО

Фота дадзена тэлеканалам «Мір 24»

Выбар рэдакцыі

Культура

Біблія на беларускай мове: «Галоўнае — абапірацца не на прыдуманыя ўяўленні, а на тысячагадовы вопыт набожных папярэднікаў»

Біблія на беларускай мове: «Галоўнае — абапірацца не на прыдуманыя ўяўленні, а на тысячагадовы вопыт набожных папярэднікаў»

 У 2019 годзе прэміяй «За духоўнае адраджэнне» былі адзначаны перакладчыкі Бібліі на беларускую мову.

Палітыка

Алег Іваноў: Наша супрацоўніцтва — вуліца з двухбаковым рухам

Алег Іваноў: Наша супрацоўніцтва — вуліца з двухбаковым рухам

У бягучым годзе стартуе рэалізацыя 28 інтэграцыйных праграм Саюзнай дзяржавы.

Грамадства

Чым прыцягвае гісторыя ваеннай авіяцыі бераставіцкіх аматараў тэхнічнай творчасці

Чым прыцягвае гісторыя ваеннай авіяцыі бераставіцкіх аматараў тэхнічнай творчасці

Ідэя стварыць гурток авіямадэлістаў у нейкім сэнсе звязана і з размяшчэннем побач з райцэнтрам былога ваеннага аэрадрома.

Грамадства

Інавацыі ў будаўнічай навуцы. Як стварыць тое, што ніхто дагэтуль не ствараў?

Інавацыі ў будаўнічай навуцы. Як стварыць тое, што ніхто дагэтуль не ствараў?

Будаўнічыя ідэі распрацоўваюцца ў лабараторыі аднаго брэсцкага вучонага.