Вы тут

Як мёд памагае захоўваць жаночую прыгажосць і маладосць


Пра лекавыя ўласцівасці мёду нам вядома з ранняга дзяцінства, таму што гэтыя нашы першыя лекі ад прастуды і кашлю. Вядомы старажытнагрэчаскі філосаф і «бацька медыцыны» Гіпакрат лічыў, што мёд увабраў у сябе столькі сіл ад прыроды, што здольны вылечыць чалавека «ад тысячы хвароб». Па легендзе поруч з месцам пахавання Гіпакрата пасяліліся дзікія пчолы, пра што даведаліся сучаснікі, і натоўпы паломнікаў накіраваліся ў Фесалійскую даліну за адменна гаючым мёдам.


Фота: pixabay.com

Мёд – не толькі цудадзейныя лекі, смачны ласунак, ён таксама дапамагае захаваць жаночую прыгажосць і маладосць, таму даўно ўзяты красунямі на ўзбраенне: пажыўныя маскі для твару і цела, мядовыя абкручванні, мядовы масаж і інш. Здаўна мёд існуе ў касметыцы.

Мядовая маска для твару

Гэта адна з нескладаных, але вельмі эфектыўных хатніх працэдур. Мядовая маска спрыяе падтрыманню свежасці і маладосці скуры, рэгулюе абменныя працэсы і водны баланс, паспяхова змагаецца са з'яўленнем маршчын. А ўсё таму, што мёд багаты такімі рэчывамі, як глюкоза, фруктоза, бялок, утрымвае асноўныя амінакіслоты і вітаміны, солі калію, натрыю, жалеза, фосфару, кальцыю і шэраг іншых важных мікраэлементаў. Мёд вядомы як прыродны антыбіётык, а значыць, здымае запаленчыя працэсы на скуры, выступае ў ролі антысептыка, загойваючы невялікія ранкі, вугрысты сып і прышчы. Мядовая маска – выдатная абарона ад уплыву такіх неспрыяльных знешніх фактараў, як дрэннае надвор'е і шкодная гарадская экалогія.

Для нармальнай скуры твару. Змяшайце 1 яечны бялок з ½ ч. л. міндальнага алею, 2 ст. л. аўсянай мукі і 1 ст. л. мёду. Злёгку ўзбіце, нанясіце на твар на 15-20 хвілін, потым здыміце маску ватным дыскам ці сурвэткай, змочанай у цёплай вадзе. Для завяршэння працэдуры карысна зрабіць халодны кампрэс ці працерці скуру кубікам лёду.

Для сухой скуры твару. Разамніце адну бульбіну, дадайце да яе 2 ст. л. малака, па 1 ст. л. аліўкавага алею і мёду, ампулу вітаміну Ё. Перамяшайце і атрыманую сумесь нанясіце на твар. Праз 15-20 хвілін маску змыйце халаднаватай вадой.

Для тлустай скуры твару. Узбіты яечны бялок змяшайце з 1 ст. л. мёду, 1 ст. л. соку лімона, 50 мл малака і дадайце вотруб'е для лепшага нанясення маскі. Нанясіце маску на твар на 15-20 хвілін, потым здыміце сурвэткай, змочанай у цёплай вадзе. Скуру карысна працерці рамонкавым настоем.

Для праблемнай скуры твару. Зварыце адвар з рамонка ў прапорцыі 1:10. Развядзіце 2 ст. л. мёду ў 50 мг цёплага адвару і наносьце раз на тыдзень на 20-25 хвілін на скуру, што пакутуе ад вугрыстага сыпу.

Маска для сухіх валасоў. Вазьміце 1 ч. л. мёду, 1 ст. л. густой смятаны, 2 зубкі часнаку. Згатуйце настой крапівы для апалосквання (50 г сухога лісця крапівы на 2 шклянкі кіпеню). Змяшайце ўсе інгрэдыенты, дробна здрабніўшы часнок. Нанясіце маску на валасы на 20-30 хвілін. Пасля мыцця валасоў цёплай вадой з шампунем апаласніце крапіўным настоем, які трэба папярэдне працадзіць.

Маска для саслабелых валасоў. Прапорцыі: на 1 ст. л. соку альясу бярэцца 1 ст. л. мёду. Усё старанна перамяшайце, нанясіце на валасы на 10 хвілін і змыйце цёплай вадой. Гэтую маску можна прыгатаваць і захоўваць у халадзільніку.

Маска пры выпадзенні валасоў. Склад: 1 ч. л. мёду, ½ ч. л. соку часнаку, 1 ч. л. густой тлустай смятаны, 1 ч. л. соку цыбулі, 4 кроплі алею лаванды. Кампаненты змяшайце і нанясіце маску на карані валасоў на паўгадзіны. Змыйце цёплай вадой з шампунем. Праводзьце працэдуру 1 раз на тыдзень.

Маска для тлустых валасоў. Вазьміце па 1 ст. л. мёду, лімоннага соку, соку альясу, здробненага часнаку. Змяшайце інгрэдыенты, нанясіце на тлустыя валасы, абгарніце харчовай плёнкай і ручніком. Трымайце паўгадзіны, потым змыйце цёплай вадой з шампунем. Для апалосквання рэкамендуецца згатаваць ваду з даданнем сухой гарчыцы.

Асцярожна: алергія!

  • Здараецца, што імунная сістэма “блытае” мёд з патэнцыйна небяспечным для арганізма рэчывам і пачынае выпрацоўваць гістамін і антыцелы для змагання з ім.
  • Праявы алергіі на мёд могуць быць рознымі і залежаць ад стану здароўя чалавека. Найболей частымі сімптомамі з'яўляюцца насмарк, ацёкі губ ці языка, слязлівыя вочы, пяршэнне ў горле, чханне і сып. Таксама ў рэдкіх выпадках могуць паўстаць болі галавы і стомленасць.
  • Алергікам пра мёд важна ведаць, што алергічная рэакцыя ўзнікае не толькі на чысты прадукт, але і на рэчывы, якія могуць утрымваць зусім нязначную колькасць мёду.
  • Найнебяспечнейшым ускладненнем, якое можа суправаджаць алергію на мёд, лічыцца анафілактычны шок – галавакружэнне, задышка, непрытомнасць і сутаргі. Яго немагчыма вылечыць, проста прыняўшы таблетку «Дымедролу» і інш. Тэрмінова выклікайце «хуткую»!

Друкуецца ў часопісе «Алеся»

Выбар рэдакцыі

Грамадства

Чаму важна аднаўляць балотныя экасістэмы?

Чаму важна аднаўляць балотныя экасістэмы?

Балоты непарыўна звязаныя з культурай і гісторыяй беларускага народу. 

Спорт

Сяргей Кавальчук: У спорце вышэйшых дасягненняў адна мэта — быць лепшымі

Сяргей Кавальчук: У спорце вышэйшых дасягненняў адна мэта — быць лепшымі

Міністр спорту і турызму пра жыццё беларускага спорту. Шчыра і аб’ектыўна.

Грамадства

Хто рызыкуе захварэць на рак малочнай залозы?

Хто рызыкуе захварэць на рак малочнай залозы?

На першым месцы — спадчынны фактар.  

Здароўе

Чаму беларусы не спяшаюцца прышчапляцца?

Чаму беларусы не спяшаюцца прышчапляцца?

Праз які час праводзіць рэвакцынацыю ад COVІD-19 і ці патрэбна яна ўвогуле?