Вы тут

Паштоўку з партрэтам Багдановіча адправілі ў космас


Выява паэта, які апеў зорку Венеру, апынулася ў космасе... Калісьці супрацоўнікі літаратурнага музея Максіма Багдановіча прэзентавалі гэтую паштоўку з партрэтам самага рамантычнага беларускага паэта журналістцы АНТ Святлане Карульскай, а тая, у сваю чаргу, перадала яе беларускаму касманаўту Алегу Навіцкаму. Вось такое вялікае падарожжа атрымалася ў звычайнай паштоўкі. Загадчык музея Максіма Багдановіча Міхал Бараноўскі дапамог «Звяздзе» даведацца аб дэталях гэтай літаратурна-касмічнай навіны:


— Ірына Мацяс, супрацоўніца нашага музея, калі перадавала паштоўку, звярнула ўвагу на радкі, размешчаныя на адваротным баку. А гэта верш Максіма Багдановіча «Я хацеў бы спаткацца з Вамі на вуліцы...», напісаны ў 1915 годзе. Лірычны зварот, у якім ідзе развага аб ролі чалавека ў кантэксце сусвету: «Нашто ж на зямлі // Сваркі і звадкі, боль і горыч, // Калі ўсе мы разам ляцім // Да зор?» Святлана Карульская праявіла ініцыятыву і перадала пасылку касманаўту Алегу Навіцкаму як сімвал Радзімы. Ідэя зрабіць так, каб Максім мог апынуцца бліжэй да зор, пра якія так марыў, даўно лётала ў паветры, але ўсё не было нагоды яе рэалізаваць, а тут зоркі сышліся, і праз тры поціскі рукі верш Максіма апынуўся на арбіце. Мы былі ў курсе справы і ўважліва сачылі за навінамі, і вось, нарэшце, наша маленькая мара збылася.

Так беларуская літаратура распаўсюджваецца па ўсім сусвеце. Дарэчы, традыцыя касманаўтаў браць з сабою ў космас нейкія асабліва важныя для іх кнігі існуе даўно — хоць гэта вельмі складана, бо кожны грам грузу ўлічваецца. Але ў 1984 годзе на борце карабля «Саюз Т-10» пабывала кніга «Апошнія вершы М. Ю. Лермантава», якраз тады, калі аднаму з астэроідаў надалі імя гэтага паэта. Да стагоддзя Льва Талстога ў космас адправіліся «Севастопальскія апавяданні». Казахскі касманаўт Талгат Мусанбаеў узяў з сабой на станцыю Каран, расіянін Алег Рыжыкаў — Евангелле... Але яшчэ раней пабывала на касмічнай вышыні беларуская літаратура: касманаўт Уладзімір Кавалёнак у 1978 годзе ўзяў з сабой на арбітальную станцыю «Салют-6» паэтычны зборнік Васіля Зуёнка «Нача», захаваліся кадры, як ён чытае вершы адтуль на арбіце. Пётр Клімук браў з сабой кніжнае выданне «Новай зямлі», і гэты асобнік цяпер захоўваецца ў коласаўскім музеі ў Смольні. І касманаўт Алег Навіцкі, родам з Чэрвеня, ніколі не забываўся на сваю радзіму. Успомніце, як падчас святкавання Дня беларускага пісьменства ў Капылі мы змаглі ўбачыць на экране яго віншаванне землякам-беларусам. Тады ж ён з пачуццём прачытаў урывак з верша Максіма Танка «Рукі маці». А цяпер дзякуючы Алегу Навіцкаму на станцыі — паштоўка, з якой Максім Багдановіч глядзіць на Зямлю і на любімую Беларусь з космасу.

Арына КАРПОВІЧ

Загаловак у газеце: «Калі мы ўсе разам ляцім да зор»

Выбар рэдакцыі

Грамадства

Снежань сёлета чакаецца цяплейшым за звычайны. Прагноз ад Дзмітрыя Рабава

Снежань сёлета чакаецца цяплейшым за звычайны. Прагноз ад Дзмітрыя Рабава

«Традыцыйна першы месяц зімы — самы цёмны і пахмурны месяц года». 

Палітыка

Крызіс на мяжы. Уся аператыўная інфармацыя на панядзелак (абнаўляецца)

Крызіс на мяжы. Уся аператыўная інфармацыя на панядзелак (абнаўляецца)

Аператыўная інфармацыя з беларуска-польскай мяжы.

Грамадства

Самы паспяховы сезон! З Аўгустоўскага канала сплылі цеплаходы

Самы паспяховы сезон! З Аўгустоўскага канала сплылі цеплаходы

У некаторыя выходныя цеплаход здзяйсняў па канале дванаццаць рэйсаў.

Палітыка

Крызіс на мяжы. Уся аператыўная інфармацыя на нядзелю

Крызіс на мяжы. Уся аператыўная інфармацыя на нядзелю

Аператыўная інфармацыя з беларуска-польскай мяжы.