Тры кантралёра пасажырскага транспарту ў Мінску абвінавачваюцца ў злоўжыванні паўнамоцтвамі

Фрунзенскі (горада Мінска) раённы аддзел Следчага камітэта завяршыў расследаванне крымінальных спраў па абвінавачванні трох кантралёраў пасажырскага транспарту ў злоўжыванні службовымі паўнамоцтвамі, паведамляе БелТА са спасылкай на аддзел інфармацыі і сувязі з грамадскасцю УСК па Мінску.

Па дадзеных следства, неаднаразова ў мінулым і гэтым гадах, знаходзячыся на тэрыторыі Мінска і Мінскага раёна, кантралёры наземнага пасажырскага транспарту выяўлялі безбілетных пасажыраў і атрымлівалі ад іх наяўныя грошы ў якасці штрафу. Аднак у некаторых выпадках з-за адсутнасці ў безбілетнікаў дакументаў, якія пацвярджаюць асобу, кантралёры адпускалі іх, каб пазбегнуць неабходнай працэдуры па дастаўленні правапарушальнікаў у тэрытарыяльны орган унутраных спраў для высвятлення асобы. Пры гэтым пастановы аб накладанні адміністрацыйнага спагнання складалі на раней прыцягнутых імі грамадзян за безбілетны праезд. Копія пастановы, як правіла, на рукі грамадзянам не выдавалася.

Следства зафіксавала выпадкі, калі кантралёры атрымлівалі ад пасажыраў грошы і не выносілі пастановы аб накладанні адміністрацыйнага спагнання. Такім чынам, дзеяннямі абвінавачаных па складанні несапраўдных пратаколаў або несупастаўленні пратаколаў нанесеная шкода правам і законным інтарэсам грамадзян. Па крымінальных справах прызнаныя пацярпелымі дзевяць чалавек.

«Злачынствы супраць інтарэсаў службы — найбольш небяспечная праява карупцыі, паколькі падрываюць прынцыпы дзяржаўнага кіравання, сацыяльнай справядлівасці, стрымліваюць эканамічнае развіццё і пагражаюць маральным асновам грамадства», — адзначылі ў Следчым камітэце.

Падчас расследавання вывучаныя асобы абвінавачаных — усё раней не судзімыя і станоўча характарызуюцца па месцы жыхарства і працы. Па завяршэнні расследавання крымінальных спраў дзеянні абвінавачаных, 57-гадовага мужчыны і жанчын 46 і 51 года, кваліфікаваныя па ч. 2 арт. 424 (злоўжыванне службовымі паўнамоцтвамі) КК. Да ўсіх прыменена мера стрымання ў выглядзе асабістага паручыцельства.

Матэрыялы крымінальнай справы перададзеныя пракурору для накіравання ў суд.

Прэв’ю: pixabay.com