Жыхар Слаўгарада прасіў знаёмых браць для яго тэлефоны ў растэрміноўку і не вяртаў грошы

Жыхар Слаўгарада прасіў знаёмых браць для яго тэлефоны ў растэрміноўку і не вяртаў грошы і сродкі сувязі, расказалі ва УУС Магілёўскага аблвыканкама.

«Спосаб хуткага грашовага ўзбагачэння абраў для сябе нідзе не працуючы 22-гадовы жыхар Слаўгарада. Прыяцеляў і знаёмых ён угаворваў у салоне ўзяць на іх імя мабільны тэлефон у растэрміноўку. Пасля працэдуры афармлення яны аддавалі яму апарат, а малады чалавек наўзамен абяцаў спраўна кожны месяц уносіць пакладзеную па растэрміноўцы суму. Аднак дадзенага слова не стрымліваў, і людзі заставаліся без тэлефонаў, з вялікім доўгам перад крамай», — распавялі ва УУС.

На працягу двух гадоў ён так ашукваў мясцовых жыхароў, пяцёра з якіх пазней напісалі заявы ў міліцыю. Агульны кошт новых тэлефонаў, якія яны перадалі знаёмаму, склаў больш як Br2 тыс. Праваахоўнікі Слаўгарадскага РАУС устанавілі, што ўзятымі ў растэрміноўку мабільнымі тэлефонамі малады чалавек сам не карыстаўся, а хутка знаходзіў пакупнікоў і збываў іх.

На фігуранта пачалі крымінальную справу.

Прэв’ю: pexels.com