Вы тут

Інтэрактыўны цэнтр жывой гісторыі адкрыўся ў Віцебску


Там (у памяшканнях культурна-спартыўнага комплексу Летняга амфітэатра) можна перамясціцца ў часе прыкладна на дзесяць стагоддзяў таму. Такая магчымасць спадабаецца і дзецям, і дарослым. У цырымоніі адкрыцця ўдзельнічалі старшыня Віцебскага гарадскога Савета дэпутатаў Уладзімір Бялевіч, намеснік старшыні Віцебскага гарадскога выканаўчага камітэта Віктар Глушын, генеральны дырэктар Цэнтра культуры «Віцебск» Глеб Лапіцкі.


Новы пункт на турыстычнай карце Віцебска мае назву «Варгенторн», што ў перакладзе значыць «Воўчая вежа». Цэнтр стаў домам для аднайменнага клуба гістарычнай рэканструкцыі, які дзейнічае ў Віцебску з 2003 года і носіць ганаровае званне «Народны калектыў». Клуб яднае дзесяткі аматараў гісторыі розных узростаў і прафесій.

Члены «Варгенторна» — частыя госці на розных мерапрыемствах у Віцебску і іншых рэгіёнах. У рэпертуары калектыву — тэатралізаваныя паказы, заснаваныя на летапісах, сагах, легендах і гістарычных дакументах. Вельмі відовішчныя «варгенторнаўскія» мініяцюры, танцы, пастановачныя баі з выкарыстаннем аналагаў сярэднявечнай зброі. Клуб вядомы вывучэннем і інтэрпрэтацыяй іспанскай школы фехтавання XVІІ стагоддзя La Verdadera destreza, а яшчэ адзінай у Віцебску афіцыйнай школай ірландскага танца.

Інтэрактыўны цэнтр жывой гісторыі, дзе аматары могуць усё гэта паказаць у любы час года, адкрыўся ў рамках праекта «Даўгаўпілс і Віцебск: культурнае супрацоўніцтва і развіццё ІІ». Беларусь і Віцебск, у прыватнасці, як адзін з самых старажытных гарадоў заўсёды будуць цікавыя для турыстаў. Цяпер ёсць магчымасць на свае вочы ўбачыць, як жылі далёкія продкі беларусаў у сярэднявеччы, дакрануцца да мінулага, стаць пры жаданні членам клуба. Такі аб'ект быў даўно запатрабаваны.

У інтэрактыўным цэнтры жывой гісторыі ёсць выставачная зала, памяшканне для правядзення майстар-класаў, будуць створаны гарбарная, сталярная, слясарная і ювелірная майстэрні.

Падчас адкрыцця «Варгенторна» прайшлі заняткі па гістарычным фехтаванні «Старажытны Віцебск»: былі паказаны ваенныя забавы, работа рамеснікаў і танцы. Галоўная мэта майстар-класа, як падкрэслілі арганізатары мерапрыемства, — азнаямленне з асновамі сярэднявечнага бою на тэрыторыі Днепра-Дзвінскага рэгіёна ў ІX—XІ стагоддзях і знаёмства з канцэпцыяй гістарычнага фехтавання і дружыннай культурай Прыбалтыйскага рэгіёна ў сярэднявеччы. Адначасова адкрылася выстаўка ахоўнага рыштунку і наступальнага ўзбраення ваяроў на шляху «з варагаў у грэкі».

Яшчэ адзін цікавы міжнародны праект, які днямі рэалізавалі супрацоўнікі «Цэнтра культуры «Віцебск», — першая персанальная выстаўка «Беларускі погляд Даўгаўпілса» фотамастака Эдуарда Літвіноўскага.

Сярод арганізатараў выстаўкі — Генеральнае консульства Рэспублікі Беларусь у Даўгаўпілсе і Беларускае культурна-асветніцкае таварыства «Уздым».

Аўтар нарадзіўся ў Даўгаўпілсе, па бацькоўскай лініі мае беларускія карані, шмат гадоў цесна супрацоўнічае з Даўгаўпілскім цэнтрам беларускай культуры.

Ідэя выстаўкі — у аб'яднанні беларусаў, якія пражываюць у Латгаліі (рэгіён на граніцы з Беларуссю), у адной фотасесіі: у нацыянальных касцюмах на фоне пейзажаў і гарадскога асяроддзя.

Злавіць непаўторную магію погляду, прыдумаць і знайсці кожнаму лакацыю для здымка, стварыць вобразы, якія найбольш поўна раскрываюць характар мадэляў, паказаць багацце і разнастайнасць беларускага нацыянальнага касцюма, адлюстраваць зачаравальныя віды Даўгаўпілса і яго наваколляў — такія задачы ставіў перад сабой творца.

Выстаўку можна ўбачыць у канцэртнай зале «Віцебск» да 12 лістапада.

Аляксандр ПУКШАНСКІ

Фота Цэнтра культуры «Віцебск»

Загаловак у газеце: Тут гісторыя ажывае

Выбар рэдакцыі

Грамадства

Час клопату садаводаў: на якія сарты пладовых і ягадных культур варта звярнуць увагу?

Час клопату садаводаў: на якія сарты пладовых і ягадных культур варта звярнуць увагу?

Выбар саджанца для садавода — той момант, значнасць якога складана пераацаніць.

Культура

Чым сёлета будзе здзіўляць наведвальнікаў «Славянскі базар у Віцебску»?

Чым сёлета будзе здзіўляць наведвальнікаў «Славянскі базар у Віцебску»?

Канцэрт для дзяцей і моладзі, пластычны спектакль Ягора Дружыніна і «Рок-панарама».