Выйшаў зборнік вершаў Ніны Галіноўскай «У казачным лесе»

У Выдавецкім доме «Звязда» — чарговая кніжная навінка для самых юных чытачоў: выйшаў зборнік вершаў Ніны ГАЛІНОЎСКАЙ «У казачным лесе», адрасаваных дашкольнікам і вучням малодшых класаў. 

«У лесе схавалася казка./ На елцы яна ці сасне./ Напэўна, зялёная маска/ Хавае яе ад мяне./ І доўга я казку шукаю — / Нідзе непаседы няма./ Вось зараз вазьму пагукаю — / Адклікнецца, можа яна...» Вядомая беларуская дзіцячая пісьменніца Ніна Галіноўская захоплена, маляўніча расказвае пра свае ўражанні ад сустрэч з лясным сябрам. Вавёркі, зайкі, вожыкі, воўк, мурашы... З усімі з іх у юнага чытача ёсць цудоўная магчымасць пагутарыць, сустрэцца, разгледзець іх на малюнках таленавітага кніжнага графіка Алены Карповіч. 

А колькі розных з’яў, відовішчаў разгортваецца перад увагай чытачоў і слухачоў!.. «Мурашыны бой» — гэта проста драматычнае дзеянне, якое варта сцэнічнай увагі дзе-небудзь на школьнай сцэне, у тэатры, зарыентаваным на юнага гледача.

У арэшыны гора: 

Ненаедны абжора

Нішчыць лісце каварна.

І сварыцца з ім марна. 

Але будзе збавенне — 

Мурашы ў наступленні,

У вялікім паходзе.

— Хто арэшыне шкодзіць? 

Ах ты, Вусень-нягоднік,

Лесу нашага шкоднік,

За паганую справу 

Паспяшай на расправу!

Ды і на ўроку малявання (верш «Заняткі») дзея няхай сабе і не ваяўнічая, але не меней захапляльная. Бацька Зай выступае ў ролі настаўніка малявання, «раздае маленькім гліну», дае заданне вылепіць машыну. У вершы — і настаўніцка-бацькоўскі прыклад Зая, і вясёлая гульня, поўная добрага гумару, і так патрэбная мастацкаму слову лаканічнасць, калі вершаваныя радкі фарміруюць сапраўднае дзейства, калі казачныя, фантазійныя элементы набліжаны да сапраўднага жыцця. 

Некаторыя творы зборніка «У казачным лесе» дапамогуць выхавацелям і іх дзеткам добра правесці час, стануць асновай маленькіх і сімпатычных спектакляў. Як і ў пярэдадзень навагодніх святаў, так і ў іншыя часіны года. 

Ужо гэтымі днямі кніга Ніны Галіноўская прыйшла ў кнігарні краіны, займае сваё годнае месца на паліцах бібліятэк. Будзем спадзявацца, што яна знойдзе свайго чытача ў дзіцячых садках і школах. Як і папярэднія зборнікі твораў вядомай пісьменніцы, якая нарадзілася на Магілёўшчыне, у Шклоўскім раёне, і летась, у 2020 годзе, адзначыла сваё 85-годдзе з дня нараджэння, — «Давайце пазнаёмімся», «Размова сняжынак», «Сяргейкаў параход», «Кніжчыны сябры», «Мой дзень», «Восень едзе ў магазін», «Незвычайны карагод»... 

Мікола БЕРЛЕЖ