Вы тут

Мастацкі музей і выдавецтва «Беларусь» запусцілі кніжны праект Скарбы музея — у фаліянтах


На мінулым тыдні ў Нацыянальным мастацкім музеі адбылася прэзентацыя незвычайнага альбома-каталога. Выданне прысвечана іканапісу і алтарнаму жывапісу Беларусі ў перыяд з ХVІ да ХІХ стагоддзя. Але гэта толькі пачатак, плануецца выпусціць яшчэ адзінаццаць такіх альбомаў, якія пазнаёмяць чытачоў са скарбамі галоўнага беларускага мастацкага музея краіны.


Дванаццаць — лічба знакавая, сакральная... Падчас прэзентацыі альбома Уладзімір Пракапцоў, дырэктар Нацыянальнага мастацкага музея, адзначыў:

— На працягу пяці або шасці гадоў мы плануем выдаваць па два тамы штогод. Усе найлепшыя шэдэўры, якія захоўваюцца ў нашым музеі, можна будзе знайсці на старонках гэтых альбомаў. Кнігі стануць выходзіць адразу на трох мовах: беларускай, рускай і англійскай, каб і замежныя турысты маглі іх набыць.

Дырэктар падзякаваў Міністэрству інфармацыі і Міністэрству культуры, а таксама выдавецтву «Беларусь», падкрэсліўшы, што без іх дапамогі альбом наўрад ці пабачыў бы свет. Анжэла Садоўская, вядучы спецыяліст выдавецтва «Беларусь», засяродзіла ўвагу на маштабнасці праекта:

— На старонках гэтых кніг мы хочам увекавечыць мастацкую спадчыну нашай краіны.

Выхад першага тома знакавага праекта быў бы немагчымы без даследчай працы аддзела старажытнага беларускага мастацтва пад кіраўніцтвам Алены Карпенкі.

— Гісторыя гэтай кнігі была дастаткова складаная, — гаворыць яна. — Першапачаткова планавалася, што альбом выйдзе ў 2016 годзе. Па розных прычынах выдаць каталог у той час не атрымалася, але матэрыял быў ужо сабраны. Мы дапоўнілі том, удакладнілі тапаграфіі некаторых ікон, а таксама дадалі некалькі невядомых раней публікацый.

Далёка не кожны чалавек можа назваць сябе экспертам у пытаннях іканапісу і алтарнага жывапісу. Як звычайным карыстальнікам зразумець, аб чым ідзе гаворка? Адказваючы на пытанне «Звязды», Уладзімір Пракапцоў адзначыў, што тэксты, якія ўвайшлі ў альбом, адмыслова напісаны ў жанры навукова-папулярнай літаратуры. Гэта дазволіць кожнаму зразумець амаль усе асаблівасці вузкаспецыяльнай тэмы.

Не менш цікава было даведацца, якім мастацкім напрамкам будуць прысвечаны наступныя выданні. Дырэктар музея адказаў і на гэтае пытанне:

— У наступным годзе выйдзе альбом беларускага народнага мастацтва, а таксама том беларускага мастацтва ХХ—ХХІ стагоддзя.

Адзначым, што каталог «Іканапіс і алтарны жывапіс Беларусі XVІ — пачатку XІX стагоддзя» ўжо можна набыць у краме Нацыянальнага мастацкага музея.

Арына КАРПОВІЧ

Фота Анатоля КЛЕШЧУКА

Выбар рэдакцыі

Палітыка

Се Сяаюн: Супрацоўніцтва Кітая і Беларусі — прыклад міжнародных адносін новага тыпу

Се Сяаюн: Супрацоўніцтва Кітая і Беларусі — прыклад міжнародных адносін новага тыпу

Беларусь і Кітай адзначаюць адметную дату — 30-годдзе ўстанаўлення дыпламатычных адносін.

Грамадства

Дзе падпрацаваць пасля Новага года?

Дзе падпрацаваць пасля Новага года?

Псіхолагі раяць пачынаць не з маніторынгу рынку, а з некалькіх пытанняў самому сабе — каб вызначыцца з прыярытэтамі.

Грамадства

Уладзімір Мішчанчук: Марым аб брыльянтавым вяселлі

Уладзімір Мішчанчук: Марым аб брыльянтавым вяселлі

Уладзімір Мішчанчук — заслужаны артыст БССР, дэкан тэатральнага факультэта БДАМ, прафесар.

Грамадства

«Сацыяльная зніжка» — каму і на што? Як купіць прадукты танней на 10 %

«Сацыяльная зніжка» — каму і на што? Як купіць прадукты танней на 10 %

На зніжку могуць разлічваць пенсіянеры, шматдзетныя сем’і.