Праца над праектам абноўленай Канстытуцыі практычна падышла да фіналу, заявіў у эфіры тэлеканала «Беларусь 1» кіраўнік Адміністрацыі Прэзідэнта Ігар Сергеенка, паведамляе БелТА.
«Работа практычна падышла да фіналу. Мы выйшлі на праект Канстытуцыі, але тым не менш трэба яшчэ нязначную дапрацоўку, дашліфоўку па асобных пазіцыях. Асноўная мэта рабочай групы — стварыць канчатковую канфігурацыю праекта закона, які б адпавядаў патрабаванням сённяшняга часу, забяспечваў далейшае развіццё нашай краіны, мір і згоду на беларускай зямлі і, адпаведна, дабрабыт нашых грамадзян», — сказаў Ігар Сергеенка.
Паводле яго слоў, работа над абноўленым варыянтам Асноўнага закона краіны мела дастаткова напружаны характар. «Пастаянныя дыскусіі, спрэчкі, кансультацыі. Сёння мы можам сказаць, што змяненні закранулі практычна ўсе раздзелы. Прынцыповыя дапаўненні і змяненні ўнесены ў 77 артыкулаў, з’явілася 11 новых і прапануецца новая частка, якая будзе раскрываць статус, паўнамоцтвы, кампетэнцыі Усебеларускага народнага сходу», — адзначыў кіраўнік Адміністрацыі Прэзідэнта.
У прэамбуле Канстытуцыі змены нязначныя. «Тым не менш прэамбула дапоўнена палажэннямі аб захаванні нацыянальнай самабытнасці, суверэнітэту, духоўных і культурных традыцый Беларусі. Сёння тэма беларускай ідэнтычнасці мае актуальнае гучанне. Мяркую, што ў працэсе ўсенароднага абмеркавання палітолагамі, крытыкамі, гісторыкамі прэамбула можа быць дапоўнена», — падкрэсліў Ігар Сергеенка.
«Усебеларускі народны сход па праекту Канстытуцыі — гэта вышэйшы прадстаўнічы орган народаўладдзя. І ў раздзеле дастаткова падрабязна распісаны паўнамоцтвы ВНС, як будуць выбірацца яго дэлегаты. Дарэчы, у гэтай частцы яшчэ трэба будзе невялікая дапрацоўка ў плане выбару дэлегатаў на мясцовым узроўні. Меркаванні тут не зусім супалі. Думаю, на працягу тыдня мы гэта дапрацуем», — сказаў Ігар Сергеенка.
Паводле яго слоў, Усебеларускі народны сход будзе сфарміраваны на дэмакратычных прынцыпах і павінен стаць стабілізуючай сілай у адносінах паміж усімі галінамі ўлады. «Тым больш у склад дэлегатаў у нас будуць уваходзіць прадстаўнікі выканаўчай, заканадаўчай, судовай галін улады, а таксама прадстаўнікі мясцовых Саветаў дэпутатаў і грамадзянскай супольнасці. Адпаведна, УНС надзяляецца істотнымі паўнамоцтвамі — вызначаць і зацвярджаць стратэгічныя напрамкі развіцця нашай краіны, праграмы сацыяльна-эканамічнага развіцця », - адзначыў кіраўнік Адміністрацыі Прэзідэнта.
Ігар Сергеенка падкрэсліў, рашэнні ВНС будуць абавязковымі для ўсіх органаў і грамадзян. «УНС, мяркуецца, будзе надзелена правам адмяняць рашэнні іншых органаў, калі гэтыя рашэнні будуць супярэчыць інтарэсам нацыянальнай бяспекі нашай краіны. Мяркуем, што яшчэ асобныя дапаўненні, якія прапісаны і датычацца прызначэння кіраўніцтва і суддзяў Канстытуцыйнага суда, Вярхоўнага суда, Цэнтральнай выбарчай камісіі таксама знойдуць адлюстраванне ў паўнамоцтвах УНС», — дапоўніў ён.
Пры фарміраванні паўнамоцтваў УНС зыходзілі з прынцыпу, што ў краіне не павінна быць двоеўладдзя. «Наша дзяржава застаецца прэзідэнцкай рэспублікай і, адпаведна, вышэйшай службовай асобай з’яўляецца Прэзідэнт. Мяркуецца, што ў новым праекце знойдуць адлюстраванне змены ў некаторых артыкулах, якія закрануць патрабаванні да кандыдатаў на пасаду Прэзідэнта. Гэтыя патрабаванні будуць крыху больш жорсткімі. Плануецца ўвядзенне абмежаванняў па тэрмінах для кіраўніка дзяржавы — не больш як два тэрміны. Таксама плануецца змяніць працэдуру імпічменту. З улікам паўнамоцтваў УНС гэтая працэдура будзе відазменена, у некаторай ступені можа быць нават некалькі спрошчана, — растлумачыў кіраўнік Адміністрацыі Прэзідэнта. — Калі гаварыць аб ролі парламента, то ён атрымлівае пэўныя дадатковыя кантралючуыя функцыі. Гэта заслухоўванне шэрагу вышэйшых службовых асоб — генеральнага пракурора, старшыні Камітэта дзяржкантролю, кіраўніка Нацбанка. Парламент будзе працаваць ужо не дзве сесіі: вясновую і восеньскую, а практычна цэлы год. Тэрмін дзеяння парламента плануецца павялічыць да 5 гадоў».
Далейшае развіццё атрымаюць традыцыйныя сямейныя каштоўнасці, клопат аб інвалідах, ветэранах, моладзі. «Разам з тым прапануецца ўвесці і сацыяльную адказнасць грамадзян перад грамадствам і дзяржавай. Не толькі пашырэнне правоў, але і павінны быць абавязкі. Канстытуцыя — гэта не набор ільгот, гэта шэраг гарантый, якія прадастаўлены нашым грамадзянам», — канстатаваў Ігар Сергеенка.
«Мяркуецца дапоўніць арт.18 — Беларусь выключае ваенную агрэсію са сваёй тэрыторыі ў адносінах да іншых дзяржаў. Гэта значыць сведчыць аб міралюбівым характары беларускай знешняй палітыкі, і гэта пасыл, вядома, нашым знешнім партнёрам», — сказаў Ігар Сергеенка.
Таксама будзе адлюстравана яшчэ адна з пазіцый з улікам развіцця атамнай энергетыкі — выкарыстанне атамнай энергетыкі ў мірных мэтах. «Вы бачыце сёння, якую хвалю ўзнімае Літва ў першую чаргу, іншыя краіны. І мы вырашылі гэту пазіцыю таксама адлюстраваць, што наша энергетыка развіваецца толькі ў мірных мэтах, і станцыя развіваецца бяспечна», — адзначыў кіраўнік Адміністрацыі Прэзідэнта.
«Цэнтральная выбарчая камісія, мяркуем, атрымае новую назву. І ў Канстытуцыі прапісаны паўнамоцтвы Цэнтральнай выбарчай камісіі: якія выбарчыя кампаніі арганізуе, у тым ліку і выбары дэлегатаў Усебеларускага народнага сходу, адпаведна, парламенцкія, прэзідэнцкія, выбары ў мясцовыя саветы. Права вылучэння кандыдатаў у дэпутаты, плануецца, нараўне з працоўнымі калектывамі і грамадзянамі ў адпаведнасці з законам будзе прадастаўлена палітычным партыям. Гэта значыць пэўныя змены. Адзіны дзень галасавання — у нас ужо рашэнне прынята адпаведным законам», — сказаў Ігар Сергеенка.
Пашыраны паўнамоцтвы Канстытуцыйнага суда. «Канстытуцыйны суд будзе правяраць канстытуцыйнасць усіх пытанняў, якія выносяцца на рэферэндум, а таксама ацэньваць канстытуцыйнасць правядзення выбараў у парламент і выбараў Прэзідэнта. І з’яўляецца новая форма — гэта падача грамадзянінам непасрэдна скаргі ў Канстытуцыйны суд. І Канстытуцыйны суд мае права разгледзець і даць адказ канкрэтнай асобе па тым ці іншым пытанні», — адзначыў кіраўнік Адміністрацыі Прэзідэнта.
«Я думаю, што ў першай палове снежня мы зможам азнаёміцца (з праектам абноўленай Канстытуцыі. — Заўв. БелТА), калі прыйдзем да канчатковага рашэння літаральна па некалькіх пазіцыях, якія прагучалі на нарадзе ў кіраўніка дзяржавы. І я ўпэўнены, што далейшая праца над Канстытуцыяй будзе прадоўжана ўжо на пляцоўках у ходзе ўсенароднага абмеркавання», — сказаў Ігар Сергеенка.
Кіраўнік Адміністрацыі Прэзідэнта заклікаў беларусаў узяць актыўны ўдзел у абмеркаванні праекта Канстытуцыі. «Таму, што на гэтым этапе таксама могуць паступіць прапановы, якія будуць заслугоўваць увагі. Мы будзем іх улічваць у сваёй працы для таго, каб канчаткова па выніках усенароднага абмеркавання выйсці на Канстытуцыю, каб яна захавала сацыяльна арыентаваную накіраванасць з апорай на моцную дзяржаву, на моцныя традыцыі, якія існуюць у нас у краіне», — канстатаваў ён.
Набор на бюджэтныя месцы павялічыцца.
Колькі ж каштуе гэты важны кампанент здаровага рацыёну зараз?
Не выявіць ні секунды абыякавасці.
