Калядны (Піліпаўскі) пост вернікі сёлета трымаюць з 28 лістапада па 6 студзеня. Перад пачаткам добраахвотнага абмежавання сябе ў ежы нашы продкі арганізоўвалі вячоркі, каб удосталь пачаставацца ды павесяліцца. Традыцыі дагэтуль працягваюць у многіх мястэчках Беларусі. Прынамсі на Ашмяншчыне зладзілі «Запусты» і сустрэлі «Піліпаўку на парозе».
Удзельнікі вячорак «На парозе посту», што прайшлі ў аграгарадку Кракоўка, жадалі ўсім здароўя, як у зялёнага дуба, ды дзяліліся ўспамінамі аб тым, як раней у сем’ях адзначалі пачатак посту і праводзілі абрад «Запусты». Падчас яго, дарэчы, частаваліся найлепшымі прысмакамі. Лічыцца, што менавіта тлустымі ды каларыйнымі стравамі варта назапасіць арганізм напрыканцы «мясаеду», перш чым трымаць доўгі пост.
А ў аддзеле рамёстваў і традыцыйнай культуры Ашмян у рамках этнаграфічнага праекта «Без кораня і палын не расце» правялі абрадавую праграму «Піліпаўка на парозе». Падчас свята госці завіталі да цёткі Валянціны і яе дачкі Алеські, каб пачаставацца прысмакамі ды павучыцца ў майстрых ткаць паясы на дошчачках і прасці на калаўроце. Не жанатыя хлопцы ды дзеўкі згулялі ў «Яшчара» ды пагадалі на будучую палову на часнаку і лучынах.
Ірына СІДАРОК
Фота: Ашмянскі раённы цэнтр культуры
Выбар саджанца для садавода — той момант, значнасць якога складана пераацаніць.
Канцэрт для дзяцей і моладзі, пластычны спектакль Ягора Дружыніна і «Рок-панарама».