Наталля Качанава: «Разам мы зможам вырашыць задачы, якія стаяць перад народамі Беларусі і Расіі»

Старшыня Савета Рэспублікі сустрэлася сёння з намеснікам старшыні Савета Федэрацыі Федэральнага сходу Расійскай Федэрацыі Канстанцінам Касачовым.

— Сённяшняя сустрэча — выдатная магчымасць абмеркаваць бягучыя пытанні, якія нам неабходна вырашаць у бліжэйшы час, — звярнулася яна да госця і выказала задаволенасць ад таго, што паміж Саветам Рэспублікі і Саветам Федэрацыі, сенатарамі дзвюх краін складваюцца добрыя і канструктыўныя адносіны. — Гэта вельмі важна ў нашай дзейнасці, паколькі гэта спрыяе больш давернаму і змястоўнаму ўзаемадзеянню паміж дзяржаўнымі органамі.

Таксама спікер верхняй палаты беларускага парламента выказала ўдзячнасць дэлегацыі Савета Федэрацыі за падтрымку падчас 143-й Асамблеі Міжпарламенцкага саюза па недапушчэнні ўнясення ў парадак дня ў якасці надзвычайнага пункта рэзалюцыі па Беларусі.

— Ваша падтрымка для нас вельмі важная, — адзначыла яна і звярнула ўвагу на тое, што падтрымка абодвух бакоў у цяперашніх няпростых умовах вельмі важная. — Нам разам, нашым краінам будзе эфектыўней супрацьстаяць выклікам, якія ўсялякі раз узнікаюць у адносінах да нашых краін. 

Яна падзякавала за падтрымку, якую аказвае Расійская Федэрацыя нашай краіне:

— Мы не проста надзейныя партнёры, але добрыя сябры, якія заўсёды падставяць плячо і будуць ісці разам.
Спікер верхняй палаты парламента адзначыла, што ў рэалізацыі 28 саюзных праграм, падпісаных кіраўнікамі Беларусі і Расіі на вышэйшым Дзяржаўным Савеце Саюзнай дзяржавы, парламентарыяў чакае вялікая праца, у тым ліку па ўніфікацыі заканадаўства. 

Акрамя таго, нагадала Наталля Качанава, ужо распачалася падрыхтоўка да чарговага ІХ Форума рэгіёнаў Беларусі і Расіі, правядзенне якога запланавана на чэрвень. 

— Прапановы, якія паступілі ад Савета Федэрацыі, мы разгледзелі і згодныя з прапанаванай тэматыкай і датай правядзення. Упэўненая, што разам мы зможам вырашыць тыя задачы, якія стаяць перад нашымі народамі, — падкрэсліла яна.

Са свайго боку віцэ-спікер Савета Федэрацыі падзякаваў Наталлі Качанавай за магчымасць сустрэцца і перадаў шчырае прывітанне ад старшыні Савета Федэрацыі Федэральнага сходу Расіі Валянціны Мацвіенкі. Паводле слоў госця, спікер верхняй палаты расійскага парламента высока цэніць прафесійныя і асабістыя адносіны, якія склаліся паміж палатамі. 

— Кажучы пра сітуацыю на Асамблеі Міжпарламенцкага саюза, у нас не было ні ценю сумневу, што мы павінны ў яе ўключыцца самым актыўным чынам, — падкрэсліў Канстанцін Касачоў. 

Вольга АНУФРЫЕВА