Удзельнікі абмеркавалі тэму фарміравання і рэалізацыі дзяржаўнай палітыкі па супрацьдзеянні незаконнаму абароту наркатычных сродкаў, псіхатропных рэчываў, іх прэкурсораў і аналагаў у кантэксце забеспячэння і абароны інтарэсаў грамадства і дзяржавы. Зацікаўленую гутарку ініцыявала Пастаянная камісія Савета Рэспублікі па заканадаўстве і дзяржаўным будаўніцтве.
Круглы стол адкрыла Наталля Качанава, якая падкрэсліла неабходнасць дэталёва і усебакова прааналізаваць сітуацыю з наркотыкамі ў нашай краіне, вызначыць найбольш аптымальныя і эфектыўныя шляхі вырашэння гэтай праблемы.
— Сёння нельга быць абыякавым да існуючай у нашай краіне праблемы спажывання і распаўсюджвання наркатычных сродкаў, — падкрэсліла спікер верхняй палаты парламента. — Наркаманія — гэта бяда, і праблемы наркаманіі датычацца кожнага, таму вырашаць іх трэба комплексна. Гэта значыць, і дзяржаўныя органы, і грамадскія аб’яднанні, арганізацыі павінны працаваць разам. Намеснік міністра ўнутраных спраў — начальнік крымінальнай міліцыі Генадзь Казакевіч у сваім выступе падрабязна праінфармаваў аб стане нарказлачыннасці ў Рэспубліцы Беларусь.
Згодна статыстычных даных, у першым квартале 2021 годзе выяўлена 1063 злачынствы, непасрэдна звязаныя з незаконным абаротам наркотыкаў, а таксама 615 — са збытам псіхаактыўных рэчываў. Зноў стала павялічвацца колькасць непаўналетніх, якія ўцягваюцца ў нарказбыт: затрымана больш за 70 маладых людзей, якія навучаюцца ў сярэдніх, сярэдніх спецыяльных і вышэйшых навучальных установах, большасці з якіх інкрымінуецца частка 3 артыкула Крымінальнага кодэксу.
Павялічылася колькасць злачынстваў, здзейсненых групай асоб на 55,1 % (з 69 за аналагічны перыяд мінулага года да 107), а ў складзе арганізаванай групы — у 5,5 раз (з 11 да 60). Захоўваецца тэндэнцыя павелічэння колькасці перадазіровак псіхаактыўнымі рэчывамі (з 127 за аналагічны перыяд 2020-га да 138). Павялічыўся аб’ём канфіскаваных наркотыкаў (з 38,5 кг за аналагічны перыяд летась да 69,1 кг).
Узбуджана 277 крымінальных спраў (у 2020-м — 180) у адносінах да 216 асоб (летась — 148), якія адносяцца да незаконнага абароту наркотыкаў з выкарыстаннем розных вэб-рэсурсаў.
Намеснік міністра падкрэсліў, што жорсткасць закона — дзейсны інструмент, які ўплывае на стрымліванне распаўсюджвання гэтай бяды.
У прыватнасці, лібералізацыя заканадаўства (зніжэнне тэрмінаў па артыкуле 328 Крымінальнага кодэкса) не нясе той нагрузкі, якую на яе ўскладвалі заканадаўцы.
Аб мерах па супрацьдзеянні незаконнаму абароту наркотыкаў і прафілактыцы наркаманіі, а таксама аб практыцы пракурорскага нагляду па справах аб незаконным абароце наркатычных сродкаў, псіхатропных рэчываў, іх прэкурсораў і аналагаў паведамілі адпаведна намеснік старшыні Вярхоўнага Суда Рэспублікі Беларусь Сяргей Кандрацьеў і намеснік генеральнага пракурора Сяргей Хмарук.
Згодна даных Вярхоўнага Суда, у 2020-м колькасць непаўналетніх, асуджаных за незаконны абарот наркотыкаў, зменшылася больш чым у пяць разоў. У прыватнасці, у 2016-м іх было 226 чалавек, у 2020-м — 42. Па артыкуле 328 Крымінальнага кодэксу было асуджана: па частцы 1 — 19 маладых людзей (да рэальнага пазбаўлення волі не быў прысуджаны ніводны з непаўналетніх), па частках 2-4 — 23 чалавекі (прысуд на тэрмін звыш 10 гадоў быў вынесены толькі аднаму маладому чалавеку, ад 5 да 8-мі — 13 непаўналетнім).
Намеснік генпракурора адзначыў, што заканадаўства патрабуе ўдасканалення і вывучэння падыходаў іншых краін, а таксама ўвядзення крымінальнай адказнасці за прапаганду (для так званых рэкламадаўцаў) на пляцоўках інтэрнэт-крам.
Міністр аховы здароўя Дзмітрый Піневіч расказаў аб мерах, якія прымаюцца па аказанні дапамогі пацыентам з наркаманіяй. Ён падкрэсліў, што за пяць гадоў колькасць пацыентаў на ўліку зменшылася, прычым значна. Аднак супакойвацца нельга — важна бачыць латэнтнасць гэтай праблемы. Разам з тым, колькасць атручвання ад ужывання наркотыкаў з лятальным вынікам за 9 месяцаў 2021 года ў параўнанні з такім жа перыядам мінулага года вырасла з 65-і да 114-і, у Брэсцкай вобласці з 0 да 11-і, у Мінску — з 44-х да 63-х. І гэта выклікае занепакоенасць у медыкаў. Прафілактыка, ранняе выяўленне, рэабілітацыя пацыентаў — гэта важныя кампаненты ў барацьбе з гэтым злом.
Першы намеснік начальніка Акадэміі МУС Аляксей Башан паведаміў аб выніках апытання, якое было праведзена сярод насельніцтва. У прыватнасці, 68,7 % грамадзян лічаць неабходным узмацняць адказнасць за выкарыстанне і распаўсюджанне наркотыкаў, 14 % устрымаліся ад адказу і толькі 17 % адзначылі, што трэба ўвесці палёгкі ў заканадаўстве.
Не менш цікавым аказаліся і вынікі апытання сярод асуджаных па гэтым артыкуле Крымінальнага кодэксу. Толькі палова — 51 % апытаных — раскайваюцца ў сваім учынку, 30 % — наадварот, не раскайваюцца, сярод іх 7 % — не выключаюць магчымасці вяртання да злачыннай дзейнасці.
Падводзячы вынікі круглага стала, Старшыня Савета Рэспублікі звярнула ўвагу на шырокае кола праблем, якое было абмеркавана падчас мерапрыемства, і прапанавала ўсім зацікаўленым накіраваць у Савет Рэспублікі прапановы ў рэкамендацыі круглага стала.
— Усе прапановы будуць акумуляваныя намі і накіраваны адпаведным дзяржаўным органам для выкарыстання ў дзейнасці, — падкрэсліла Наталля Качанава.
Адзначым, што ў мерапрыемстве прынялі ўдзел члены Прэзідыума Савета Рэспублікі, прадстаўнікі кіраўніцтва Адміністрацыі Прэзідэнта Рэспублікі Беларусь, Вярхоўнага Суда Рэспублікі Беларусь, Генеральнай пракуратуры, Нацыянальнага цэнтра заканадаўства і прававых даследаванняў, Следчага камітэта, міністэрстваў унутраных спраў, аховы здароўя, інфармацыі, працы і сацыяльнай абароны, адукацыі, абласных і Мінскага гарадскога выканаўчых камітэтаў, а таксама Мітрапаліт Мінскі і Заслаўскі, Патрыяршы Экзарх усяе Беларусі Веніямін.
Вольга АНУФРЫЕВА
Амаль тысяча дзвесце чалавек сабраліся, каб вырашаць найважнейшыя пытанні развіцця краіны.
Расказаў першы намеснік старшыні Дзяржаўнага камітэта па навуцы і тэхналогіях Рэспублікі Беларусь Дзяніс Каржыцкі.
Як вакцыны выратоўваюць жыцці і чаго можа каштаваць іх ігнараванне?
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
