Міністр прыродных рэсурсаў і аховы навакольнага асяроддзя наведаў дзіцячы дом № 3 г. Мінска ў рамках акцыі «Нашы дзеці»
Наведванне гэтай установы адукацыі напярэдадні Новага года стала добрай традыцыяй для Мінпрыроды. Вось і сёлета, 24 снежня, міністр прыродных рэсурсаў і аховы навакольнага асяроддзя Андрэй Худык павіншаваў выхаванцаў дзіцячага дома № 3 з надыходзячымі святамі.
На свята да дзяцей таксама завіталі старшыня Камітэта дзяржаўнага кантролю Васіль Герасімаў, прадстаўнікі ўпраўлення Следчага камітэта па горадзе Мінску, сталічнага ўпраўлення ДАІ, РУП «Белмедпрэпараты», ААТ «Белінвестбанк», Маскоўскага аддзела Дэпартамента аховы МУС і 50-й змешанай ордэна Чырвонай Зоркі авіяцыйнай базы.
Выхаванцы дзіцячага дома сыгралі для гасцей навагодні спектакль і, зразумела, самі таксама не засталіся без падарункаў. Так, ад Мінпрыроды дзіцячаму дому быў перададзены прынтар і ласункі.
Віншуючы дзяцей і педагогаў з надыходзячымі святамі, Андрэй Худык адзначыў, што ганарыцца сацыяльнай палітыкай нашай краіны. «Дзеці, а асабліва дзеці-інваліды і іншыя асобы, якія маюць патрэбу ў дапамозе, заўсёды знаходзяцца ў зоне пастаяннай увагі дзяржавы», — сказаў міністр. Кіраўнік прыродаахоўнага ведамства таксама выказаў удзячнасць выхавальнікам і настаўнікам за іх цярпенне, дабрыню і душэўнасць.
ДУА «Дзіцячы дом № 3 г. Мінска» — сацыяльна-педагагічная ўстанова, у якой рэалізуюцца праграмы спецыяльнай адукацыі на дашкольным узроўні. Сёння там пражываюць 53 дзіцяці з асаблівасцямі псіхафізічнага развіцця ва ўзросце ад трох да васьмі гадоў.
Вераніка КОЛАСАВА, фота прэс-службы Мінпрыроды
Фіналістка праекта «Акадэмія талентаў» на АНТ — пра творчасць і жыццё.
Амаль тысяча дзвесце чалавек сабраліся, каб вырашаць найважнейшыя пытанні развіцця краіны.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
