Лукашэнка: Кожны малы беларус ведае, што ён бясконца дарагі і патрэбны сваёй роднай краіне

Аляксандр Лукашэнка далучыўся да дабрачыннага свята ў рамках акцыі «Нашы дзеці». На галоўную ёлку краіны па традыцыі прыехалі дзеці з усёй краіны — усяго амаль 2400 маленькіх беларусаў ва ўзросце ад 8 да 14 гадоў. У склад дэлегацый увайшлі выхаванцы дамоў-інтэрнатаў, кадэты, пераможцы разнастайных рэспубліканскіх і міжнародных спаборніцтваў, лепшыя ў грамадскай дзейнасці, дзеці, што пражываюць у рэгіёнах, забруджаных ад аварыі на ЧАЭС, хлопчыкі і дзяўчынкі са шматдзетных сем’яў.

Галоўнай падзеяй навагодняга свята ў Палацы Рэспублікі стаў навагодні паказ «Цудоўная сіла». Праграма ўяўляе сабою яскравае казачнае музычна-сцэнічнае шоу, у якім удзельнічаюць лепшыя творчыя калектывы краіны. 

Дзяцей сабралі на спектакль загадзя. Але ім было чым заняцца — малыя і падлеткі гулялі па Палацы Рэспублікі, фатаграфаваліся на фоне ззяючых навагодніх дэкарацый у фае, дзяцей забаўлялі конкурсамі і міні-дыскатэкай.

Перад пачаткам паказу ў галоўнай зале палаца з’явіўся Прэзідэнт Беларусі. Аляксандр Лукашэнка па традыцыі прывітаў дзяцей са сцэны галоўнай залы нашай дзяржавы, Палаца Рэспублікі.

«Мы праводзім нашу ёлку ўжо больш за чвэрць стагоддзя. І нават самыя маленькія гледачы першых навагодніх спектакляў ужо самі сталі бацькамі. А хтосьці, можа, прывёў сюды свайго малога. Гэтая цудоўная традыцыя жыве. Дабрачынная акцыя „Нашы дзеці“ звязвае ўжо два пакаленні беларусаў. Беларусаў, якія растуць і сталеюць на добрых і прыгожых гісторыях, расказаных на гэтай сцэне нашымі любімымі артыстамі», — сказаў Аляксандр Лукашэнка.

Ён адзначыў, што для яго быць тут — таксама свайго роду падарунак, бо гэта магчымасць на імгненне пераключыцца ад палітычных спраў і разам з дзецьмі акунуцца ў свет дзяцінства, у якім ёсць казка, мары і цуды.

«І я шчаслівы, што за гады правядзення дабрачыннага праекта „Нашы дзеці“ кожны малы беларус не на словах, а на справе ведае, што ён бясконца дарагі і патрэбны сваёй роднай краіне», — падкрэсліў Прэзідэнт.

Ён, карыстаючыся магчымасцю, падзякаваў усім, хто робіць дзяцінства малых шчаслівым і бесклапотным. Сярод іх, па словах кіраўніка краіны, настаўнікі і выхавацелі, якія дапамагаюць асвоіць веды, урачы, якія клапоцяцца аб здароўі, будаўнікі, якія ўзводзяць школы, дзіцячыя садкі, палацы спорту, пляцоўкі і паркі для адпачынку. Аляксандр Лукашэнка сказаў дзякуй усім, хто вырабляе для дзяцей прыгожую вопратку, цацкі, любімыя прысмакі, карысныя прадукты, гатуе для іх сняданкі і абеды ў школах і дзіцячых садках. Падзякаваў

Аляксандр Лукашэнка міліцыянерам і вайскоўцам, якія берагуць мір на нашай зямлі.

Словы падзякі ад кіраўніка краіны і арганізатарам навагодніх дзіцячых свят, якія імкнуцца ўвасобіць у жыццё ўсе дзіцячыя пераднавагоднія чаканні і мары. «У гэтыя пераднавагоднія дні няма ў краіне ніводнага дзіцяці, якое б не было акружана нашым клопатам і ўвагай. Дарагія нашы дзеці! Заўсёды ведайце і памятайце: усё, што мы робім напярэдадні Новага года, і ў звычайныя працоўныя дні, — робім з любоўю і верай у вас», — акцэнтаваў Аляксандр Лукашэнка.

Ён пажадаў маленькім беларусам выдатнага настрою, моцнага здароўя і радасці ад святочнага спектакля і перадаў слова галоўнаму чараўніку свята — Дзеду Марозу.

У канцы падзеі дзяцей чакалі падарункі ад кіраўніка краіны. У адказ маленькія беларусы прэзентавалі Аляксандру Лукашэнку пано з роспісам па шкле «Студзень» і цацку — тыгра «Сімвал года».

Марыя ДАДАЛКА

Фота БелТА