Рунец: Удасканаленне Асноўнага Закона — гарантыя будучыні любой дзяржавы

Старшыня Пастаяннай камісіі Савета Рэспублікі па эканоміцы, бюджэце і фінансах, член Канстытуцыйнай камісіі:

— Канстытуцыя любой краіны — не догма і нейкі архаічны дакумент. З развіццём дзяржавы і грамадства Асноўны Закон краіны павінен трансфармавацца і відазмяняцца, зыходзячы з патрэбаў насельніцтва, сучасных рэалій жыцця, выклікаў і пагроз, якія ўзнікаюць перад дзяржавай. Перакананая, што ўдасканаленне Асноўнага Закона — гарантыя будучыні любой дзяржавы.

Апублікаваны праект абноўленай Канстытуцыі Рэспублікі Беларусь як раз і накіраваны на замацаванне асноватворных аспектаў развіцця сучаснага беларускага грамадства, захаванне і замацаванне пераемнасці гістарычнага вопыту, удасканаленне механізмаў дзяржаўнага кіравання, аптымізацыю яго функцый.

Хачу звярнуць увагу на навацыі: новы інстытут — Усебеларускі народны сход, з’яўленне якога стане яшчэ адным інструментам на шляху ўмацавання народаўладдзя ў краіне; аднасесійны перыяд працы абедзвюх палат парламентаў; адзіны дзень галасавання за народных выбраннікаў усіх узроўняў; іх пяцігадовы выбарны перыяд і многае іншае.

Акрамя таго, у цэнтры ўвагі застаецца галоўнае адрозненне палітычнага курсу краіны — яго сацыяльная арыентаванасць, замацаванне на канстытуцыйным узроўні асноўных прыярытэтаў дзяржавы, такіх як падтрымка сем’яў з дзецьмі, сірот, інвалідаў і забеспячэнне роўных магчымасцяў апошнім у рэалізацыі іх правоў і свабод.

Дарэчы, многія прапановы, якія знайшлі адлюстраванне ў праекце канстытуцыі, былі ініцыяваныя членамі Савета Рэспублікі. Разам з тым патрабуецца яшчэ сур’ёзная дзейнасць па дапрацоўцы канчатковага варыянту Асноўнага Закона, які будзе вынесены на ўсенародны рэферэндум у сярэдзіне лютага. Паўдзельнічаць у гэтым працэсе можа кожны грамадзянін нашай краіны, хто выкажа свае прапановы па ўдасканаленні галоўнага дакумента краіны. Ад нас жа, парламентарыяў, спатрэбіцца наступнае заканадаўчае напаўненне па прыняцці новых і карэкціроўцы значнай колькасці дзеючых нарматыўных актаў — стварэнню прававых механізмаў ўкаранення канстытуцыйных навацый.

Вольга АНУФРЫЕВА