Выстава дызайнерскіх навагодніх красунь з гэтых і іншых нечаканых матэрыялаў адкрылася ў Карэліцкім краязнаўчым музеі. Аўтары больш як 60 арыгінальных дрэў — арганізацыі і прадпрыемствы раёна, а таксама творчыя жыхары. Экспанаты блішчаць агеньчыкамі, а некаторыя нават граюць музыку...
Да выставы, якая будзе працаваць да самых Каляд — 7 студзеня, арганізатары рыхтаваліся цэлы год, і вынік сябе цалкам апраўдаў. Аўтары работ праявілі сваё бачанне ўпрыгожаных ёлак напоўніцу. Здаецца, у ход ішло ўсё, што траплялася на вока: шышкі, ніці, папера, макароны, дэталі ад гадзіннікаў, ракушкі, засушаныя кветкі, вата, дошкі, цацкі.
— Жыхары раёна ахвотна падтрымалі ідэю правесці такі выставу. Сярод устаноў адукацыі, прадпрыемстваў і арганізацый арганізавалі цэлы конкурс, — не хавае захаплення ад атрымаўшагася Дзмітрый АРЦЮХ, дырэктар Карэліцкага краязнаўчага музею. — І кожная ёлка дорыць гледачам свой настрой.
Адна ёлка тут падобная на капялюшык у боціках, другая — на вожыка, трэцяя — на торт са мноствам крэмавых кветак, чацвёртая — на дамок з акенцам і дзвярыма... Спыніць фантазію наведвальнікам выставы гэтак ж цяжка, як і аўтарам незвычайных ёлак, якія стварылі сапраўды дзівосныя і прыгожыя рэчы.
Бадай што самае арыгінальнае навагодняе дрэва зрабілі на Карэліцкім ільнозаводзе. Майстры вырабілі з льнянога валакна 140 пампонаў, кожны з якіх прышылі да каркаса і звязалі паміж сабой. Гэтая ёлка, дарэчы, стала пераможцам творчага конкурсу. Супрацоўнікі Цэнтра сацыяльнага абслугоўвання насельніцтва стварылі «Бабкіну ўлётную ёлку», якая атрымалася падобнай на добрай Бабы Ягі. А ёлка з макарон аўтарства гаспадаркі «Малюшычы» свеціцца і плавае ў акварыуме. Школьнікі мірскай школы стварылі з металічных дэталяў стыльную тэхнаёлку, а вучні мірскай дзіцячай школы мастацтваў — нешта накшталт шасціяруснага торту.
Мясцовыя ўпэўнены, што цягам усіх канікулаў выстава будзе найлепшым месцам для крэатыўных святочных сэлфі.
Ірына СІДАРОК
Фота Іны ЛЕЙКА
А разам з імі навучанне, сацпакет і нават жыллё.
Беларусь — адзін з сусветных лідараў у галіне здабычы і глыбокай перапрацоўкі торфу.
«Мы зацікаўлены, каб да нас прыязджалі».