Вы тут

Чым здзівілі навучэнцы сельскагаспадарчага ліцэя на гастранамічным конкурсе


Прызнацца, назвы некаторых страў нават не даводзілася чуць. Іншыя эксперыментавалі з несумяшчальнымі, здавалася б, інгрэдыентамі. Каб прадставіць на нядаўнім конкурсе Міжнароднага хлебнага салона свае вырабы, педагогі і будучыя повары «гулялі» з прадуктамі не адзін дзясятак разоў. У выніку — высокая ацэнка журы і амаль ніякіх заўваг. Вядома ж, прыйшлося распытаць канкурсантаў аб тых дзівосных стравах. Мяркую, што яны ўпрыгожаць любы святочны стол, а гатуюцца даволі проста. Галоўная тэма — фінгер-фуды, альбо мініяцюрная ежа.


Ганна Шумель.

Не першы раз бярэ ўдзел у гастранамічных конкурсах навучэнка Бераставіцкага дзяржаўнага сельскагаспадарчага прафесійнага ліцэя Ганна Шумель. Дзяўчына — будучы повар-кандытар. Аказалася, яна невыпадкова абрала такую прафесію. Яе маці таксама калісьці скончыла гэты самы ліцэй. Па словах Ганны, стравы мамы ёй заўсёды здаваліся смачнейшымі за іншыя. Мабыць таму, што гатуюцца, што называецца, «па навуцы», з усімі патрэбнымі прапорцыямі.

Паступова Ганна і сама прызвычаілася да кухоннай справы. Асабліва падчас свят. Традыцыйна ў сям'і робяць на святочны стол салаты, запякаюць мясныя вырабы, абавязкова пякуць слоены торт. Не абыходзіцца і без далікатэсных страў. Але перавагу ўсё ж аддаюць больш звыклым і простым прадуктам, якія ёсць у шырокім доступе. Калі іх камбінаваць, можа атрымацца вельмі смачная ежа.

Нядаўна прадстаўнікі Бераставіцкага ліцэя ўзялі ўдзел у Міжнародным хлебным салоне, які праходзіў ў лістападзе падчас выстаўкі-кірмашу «Прадэкспа-2021» у Мінску. Были прадстаўлены чатыры даволі складаныя стравы. Вось назва адной з іх: «фрыскеболар запечаны з сырам і зяленівам у хрусткім кошыку з выцяжнога цеста «філо». На самой справе гэта не так складана, як здаецца. З выцяжнога цеста выразаюцца квадрацікі, на іх кладзецца маса з рыбы, пасыпаецца сырам і выпякаецца.

Арыенцірам канкурсанты абралі прынцып здаровай ежы. Тым часам, зусім без мяса не абышлося. Напрыклад, прапанавалі ролы са свініны ў журавінавым соусе альбо бульбяныя кракеты з тартарам з птушкі. Гатавалі на конкурс і бурачны мус.

Прызнацца, мус больш здаваўся стравай дэсертнай. Але з гародніны? Аказалася, што нічога складанага тут няма. Трэба запячы буракі, ачысціць, працерці, прыгатаваць жэлацін і змяшаць з буракамі. Дадаць спецыі. Атрымаецца халодная закуска-жэле.

— Я люблю шукаць нейкія новыя ідэі, — прызнаецца дзяўчына. — Гастранамічныя конкурсы якраз і скіраваны на тое, каб задаць новы штуршок, даведацца аб тэндэнцыях. Цяпепр, напрыклад, робіцца акцэнт на міні-ежу, так званыя фінгер-фуды. Разам з тым ідзе адаптацыя экзатычных элементаў пад нашу традыцыйную ежу.

Ганна змагла ацаніць попыт сярод наведвальнікаў, калі працавала поварам у адным з рэстаранаў Гродна. Кажа, што сёння карыстаюцца папулярнасцю крэветкі — як запечаныя ў цесце, так і ў салатах. Таксама па-ранейшаму ў топе заказаў шашлык і дэсерт.

Галета Ганна, як і ўся яе група, а гэта амаль 30 повараў-кандытараў з 4 разрадам, запоўняць вакансіі даволі запатрабаванай спецыяльнасці на рынку працы. Нямала сярод будучых повараў і хлопцаў. Яны складаюць трэцюю частку групы.

Як расказала майстар працоўнага навучання Наталля Прэдко, літаральна праз месяц у навучэнцаў пачынаецца пераддыпломная практыка. Праходзіць яе будуць на аб'ектах грамадскага харчавання, пераважна ў Гродне. Некаторыя ўжо атрымалі папярэдняе размеркаванне ў кандытарскі цэх Гродзенскага хлебакамбіната, у дзіцячыя садкі, вытворчыя сталовыя. Без работы ніхто не застанецца, сцвярджае Наталля Прэдко. Усе будуць працаўладкаваныя, бо такіх спецыялістаў не хапае.

— Многія прыйшлі з вялікім жаданнем вучыцца, яны абралі для сябе яшчэ ў школе гэту прафесію. Магчыма, не ўсе ў ёй застануцца, бо справа складаная — разам з навыкамі патрабуе яшчэ і хуткасці. Але большасць скіраваная на тое, каб атрымаць спецыяльнасць і працаваць у далейшым, — адзначыла Наталля Прэдко.

У ліцэі распрацавана свая праграма, разлічаная на тры гады. У сваю чаргу, працэс навучання пастаянна ўдасканальваецца. З'яўляюцца новыя тэхналогіі, новае абсталяванне, мяняецца і тэндэнцыя страў. Расце попыт на складаныя, якія патрабуюць глыбокіх ведаў. Удасканальваць майстэрства якраз і дапамагаюць такія гастранамічныя конкурсы, як WorldSkіlls ці Міжнародны хлебны салон.

— Цяпер сумяшчаюцца прадукты, якія мы раней лічылі несумяшчальнымі. Цяпер усе сумяшчальнае. Мы ідзём па шляху сусветнай кухні, але са сваімі нацыянальнымі традыцыямі. Іх абавязкова трэба захаваць. Бо попыт і на беларускія дранікі, і на бабку, і на мачанку з блінамі застанецца. Гэта брэнд нашай краіны. Нездарма некаторыя традыцыйныя стравы ўвайшлі у спіс матэрыяльна-культурнай спадчыны, — заўважае Наталля Прэдко.

У Беларусі пачаў развівацца гастранамічны турызм. Нават ёсць задума стварыць кулінарную карту Беларусі, дзе будуць адзначаны месцы з традыцыйнымі нацыянальнымі стравамі. Пазней з'явіцца і мабільны дадатак да электроннай інтэрактыўнай карты. Магчыма, на гэтай карце будуць і адрасы, дзе працуюць выпускнікі Бераставіцкага ліцэя. Ва ўсяім разе, пра гэта мараць яго майстры і педагогі.

Маргарыта УШКЕВІЧ

Фота дадзена героямі артыкула

Загаловак у газеце: Фінгер-фуды для журы і не толькі

Выбар рэдакцыі

Адукацыя

Як рыхтуе інжынераў заўтрашняга дня галоўны тэхнічны ўніверсітэт краіны

Як рыхтуе інжынераў заўтрашняга дня галоўны тэхнічны ўніверсітэт краіны

У Беларусі сёння няма ніводнага прадпрыемства, дзе б ні працавалі выпускнікі БНТУ.

Эканоміка

Эксперты: Беларускі рубель будзе мацнець, а эканоміка — расці

Эксперты: Беларускі рубель будзе мацнець, а эканоміка — расці

Выконваючы праграму па імпартазамяшчэнні, зараз можна зарабіць сапраўды вялікія грошы.

Грамадства

У памяці народнай. У Баранавічах адкрылі мемарыял Героям Беларусі Андрэю Нічыпорчыку і Мікіце Куканенку

У памяці народнай. У Баранавічах адкрылі мемарыял Героям Беларусі Андрэю Нічыпорчыку і Мікіце Куканенку

У Баранавічах адкрылі мемарыял Героям Беларусі Андрэю Нічыпорчыку і Мікіце Куканенку.

Грамадства

Гаджэт для фельчара. Як працуюць ФАП і амбулаторыя ў самым аддаленым сельсавеце Пружанскага раёна

Гаджэт для фельчара. Як працуюць ФАП і амбулаторыя ў самым аддаленым сельсавеце Пружанскага раёна

Паведаміла Людміла Аляксееўна, якая загадвае фельчарска-акушэрскім пунктам і з'яўляецца фельчарам, акушэркай, медсястрой у адной асобе.