Вы тут

Гульцы хакейнай каманды Прэзідэнта і дружына «Вілейскія шчупакі» правялі таварыскі матч


Праводзіць калядныя святы можна не толькі за сталом, а, напрыклад, на хакейным матчы. Менавіта такім чынам зрабіў Прэзідэнцкі спартыўны клуб у рамках акцыі «Калядная традыцыя». Гульцы хакейнай каманды Прэзідэнта разам з прадстаўнікамі клуба завіталі ў госці да выхаванцаў Вілейскай спецыяльнай агульнаадукацыйнай школы-інтэрната. Сустрэча прайшла на лёдзе маладзечанскага спартыўна-забаўляльнага цэнтра.


Гульцы хакейнай каманды Прэзідэнта і дружына «Вілейскія шчупакі», сабраная з вучняў школы-інтэрната, правялі таварыскі матч. Нягледзячы на сяброўскую сустрэчу, барацьба падчас матча была сапраўдная, спартыўная. «Шчупакі» ўжо ў першым перыядзе вырваліся наперад — 5:3. У другой палове матча прафесіяналы змаглі скараціць адставанне. Але «Вілейскія шчупакі» пазіцый не здалі і давялі гульню да сваёй перамогі з вынікам 8:7.

«Гэта ў нас толькі першы матч. Можа, і ў наступным годзе прыедуць, а мы патрэніруемся, станем мацнейшымі і будзем гуляць лепш. Галоўнае — перамагчы, але і ўдзельнічаць таксама добра», — падзяліўся нападаючы «Вілейскіх шчупакоў» Глеб Варывода.

Гэты матч стаў бадай ці не першым для дарослых прафесійных хакеістаў, дзе галоўнымі былі не лічбы на табло, а эмоцыі і ўражанні сапернікаў. «Было выдатна! І важна для дзяцей. Яны атрымалі вопыт і мноства яскравых эмоцый. Ці крыўдна прайграваць? Гэта спорт. Абедзве каманды імкнуліся дабіцца лепшага выніку, але склалася так, як склалася. Спадзяёмся, што мы яшчэ адыграемся, калі традыцыя працягнецца і ў наступным годзе!» — адзначыў Максім Шыманскі.

Пасля добрай гульні належыць добра адпачыць, вырашылі ў Вілейскай школе-інтэрнаце. Адпачынак атрымаўся сапраўды святочны: з казачным прадстаўленнем, карагодамі (у тым ліку і з удзелам дарослых хакеістаў), чаем і смачнымі пачастункамі.

«Калядная традыцыя» — адзін з кранальных праектаў Прэзідэнцкага спартыўнага клуба. Сёлета ён адзначае юбілей — дзесяць гадоў. Вілейская школа-інтэрнат была абрана невыпадкова. Па-першае, дзеці тут займаюцца хакеем, і яны марылі выйсці на лёд і згуляць з выдатнымі хакеістамі. Па-другое, паважаюць і іншыя віды спорту: сплаўляюцца на байдарках, катаюцца на веласіпедах, — падкрэсліў старшыня цэнтральнага савета рэспубліканскага дзяржаўна-грамадскага аб’яднання «Прэзідэнцкі спартыўны клуб» Дзмітрый Лукашэнка.

Па добрай традыцыі госці прыехалі не з пустымі рукамі. Паколькі ў школе-інтэрнаце спорт у пашане, то і падарункі адпаведныя. Хакеісты «Вілейскіх шчупакоў», якія ўсе былі прызнаны найлепшымі гульцамі матча, атрымалі клюшкі. Таксама каманда Прэзідэнта прывезла выхаванцам школы 30 новенькіх горных веласіпедаў. Цяпер паходы стануць больш захапляльнымі і зручнымі. Выхаванцы атрымалі мноства прыемных сюрпрызаў — канструктары Lego, настольныя гульні, фітнес-бранзалеты, навушнікі і іншае. А Прэзідэнцкі спартыўны клуб пералічыў школе 30 тысяч беларускіх рублёў.

Дырэктар Вілейскай школы-інтэрната Уладзімір Барысаў расказаў журналістам, што сродкі будуць накіраваны на фізкультурна-аздараўленчую дзейнасць: «Вялікую ўвагу ўдзяляем пазаўрочнай дзейнасці: паколькі ў нас шмат хлопчыкаў, асабліва папулярныя фізкультурна-аздараўленчы і турыстычны напрамкі. У мінулым годзе, напрыклад, наша хакейная каманда заняла першае месца ў абласных спаборніцтвах „Залатая шайба“ і чацвёртае — на рэспубліканскім узроўні. Акрамя таго, ходзім у пешыя і велапаходы, сплаўляемся на байдарках, таму падарункі, якія дзецям уручылі госці, стануць вялікай падмогай для далейшых заняткаў. Задумак хапае. У нас на тэрыторыі ёсць спартыўныя трэнажоры і гульнявыя пляцоўкі, але іх не бывае шмат. Калі набудзем не асобныя элементы, а цэлую гульнявую пляцоўку, гэта будзе вельмі карысна для дзяцей, для карэкцыйнай работы. І, вядома, хлопцы будуць адчуваць радасць, праводзячы там свой вольны час».

Сёння ў Вілейскай спецыялізаванай школе-інтэрнаце вучацца 127 дзяцей з асаблівасцямі псіхафізічнага развіцця, якія маюць парушэнні маўлення і цяжкасці ў навучанні. З іх 26 дзяцей-сірот і дзяцей, якія засталіся без папячыцельства бацькоў. Яны маюць патрэбу ў спецыяльнай адукацыі і спецыяльнай карэкцыйнай дапамозе. І, канешне, у пазітыўных эмоцыях і цікавых сустрэчах.

Валерыя СЦЯЦКО

Фота Аліны МАЗАВЕЦ

Г. Маладзечна, Вілейка

Выбар рэдакцыі

Грамадства

Жыццё Юліі Пярцовай: Шчыры аповед пра сям’ю, работу і пераадоленні нягод

Жыццё Юліі Пярцовай: Шчыры аповед пра сям’ю, работу і пераадоленні нягод

У прамым эфіры тэлеканала «Беларусь-1» Юлія расказвае аб падзеях у Беларусі.

Калейдаскоп

Як добра вы памятаеце ўсе Канстытуцыі Беларусі? Тэст

Як добра вы памятаеце ўсе Канстытуцыі Беларусі? Тэст

За адно стагоддзе Беларусь жыла па пяці розных Асноўных Законах.