Вы тут

Зімовая абрэзка дрэў: тэрміны, асаблівасці і правілы


Зімой жыццёвыя працэсы дрэў запавольваюцца, і расліны ўступаюць у перыяд найбольшага спакою. Многія садоўнікі выкарыстоўваюць гэты час для абрэзкі. Так значна зніжаецца рызыка траўміраваць дрэва і нанесці яму шкоду.


Фота: pixabay.com

Перавагі і недахопы

Зімовая абрэзка дазваляе сфармаваць здаровую крону, якая добра прадзімаецца, а таксама ліквідаваць ачагі хвароб і хованкі шкоднікаў.

Густая лістота не перашкаджае працэсу, галінкі добра праглядаюцца. Так лягчэй заўважыць і выдаліць праблемную частку.

Пры зімовай абрэзцы змяншаецца і верагоднасць адставання кары. А яшчэ пры невялікім «мінусе» драўніну лягчэй пілаваць, ды і зрэз атрымліваецца раўнейшы. Акрамя таго, зімой запавольваецца развіццё патагенных мікраарганізмаў, а гэта значыць, што і рызыка заражэння здаровага дрэва значна памяншаецца. Да таго ж абрэзаць можна не баючыся, што вось-вось пачнецца рух соку.

Але ёсць у зімовай абрэзкі дрэў і недахопы:

  • Надвор'е. У холад працаваць некамфортна. Калі снег ляжыць і на галінках, то гэта можа перашкаджаць агляду. Ды і хутчэй гусцее фарба, і больш складана становіцца замазваць спілы і зрэзы;
  • Не ўсе дрэвы і кусты можна абразаць зімой. Абразанне цеплалюбівых культур, напрыклад, чарэшні і абрыкоса, лепш адкласці да вясны. Таксама не варта абразаць дрэвы і кусты, якія цвітуць вясной, — фарзіцыю, бэз, азалію, рададэндраны;
  • Пры тэмпературы ніжэйшай за -5 °С абразаць дрэвы і кусты нельга — драўніна становіцца ломкая і галіны занадта лёгка пашкодзіць.

Аптымальныя тэрміны

Лічыцца, што з канца студзеня і да пачатку сакавіка можна праводзіць зімовую абрэзку саду. Галоўнае — паспець управіцца да пачатку руху соку.

Важная ўмова — захаванне тэмпературнага рэжыму (не ніжэй як -5°). Для работы выбіраюць ясны сухі дзень.

У марозную зіму абрэзка можа справакаваць з'яўленне ствалавых язваў, таму ў такім сезоне работы пераносяць на канец зімы.

Асаблівасці

Узімку праводзяць абрэзку пладовых дрэў — яблыні, грушы, вішні, слівы, а таксама кустоў — барбарысу, парэчак, агрэсту.

У халодны перыяд робяць абрэзку, якая фармуе крону дрэва, рэгулюе (зразаючы частку кроны, штучна «нармуюць» ураджай і нагрузку на дрэва), амалоджвае (для замяшчэння шкілетных галін маладзейшымі парасткамі) і пазбаўляе дрэва ад дэфармаваных галін (санітарная).

Пачынаюць абрэзку з больш спелых, пладаносных раслін, бо пладовыя пупышкі ў іх абуджаюцца раней, чым ліставыя.

Маладыя дрэвы ў перыяд фарміравання кроны і аслабленыя дрэвы лепш абразаць пазней, у канцы зімы ці ранняй вясной, за 3-4 тыдні да пачатку вегетацыі.

Спачатку варта абразаць дрэвы семечкавых парод, затым надыходзіць чарга костачкавых. Гэта звязана з тэрмінамі абуджэння раслін.

Правілы абрэзкі

Неабходна карыстацца толькі чыстым і вострым секатарам ці нажоўкай.

Перад абрэзкай уважліва аглядаюць дрэва, каб намеціць меркаваную схему абрэзкі.

У першую чаргу пазбаўляюцца ад сухіх і хворых галін. Выдаляюць параснік, які з`яўляецца каля ніза ствала.

Зразаюць парасткі, якія растуць унутр кроны. Але не больш за 1/4 ад іх агульнай колькасці.

Пакарочваюць леташнія галінкі на траціну, робячы зрэз над пупышкай. Гэта падтрымае добрую форму дрэва і будзе стымуляваць развіццё новых пладовых галінак.

Выдаляюць галінкі, якія перакрыжоўваюцца і труцца.

Калі неабходна зразаць некалькі буйных галінак, не рэжуць усё адразу, рабіць гэта трэба на працягу двух-трох гадоў, каб мінімізаваць стрэс для расліны.

Аглядаюць галінкі на наяўнасць пашкоджанняў ці пацямненняў; калі заўважаюць нарасты, адразу ж выдаляюць іх.

Пры абразанні кустоў выдаляюць сухія і старыя галінкі, гэта палепшыць паступленне святла і паветра ў летні перыяд. Не зразайце ўсе парасткі пад корань, іх колькасць скарачаюць паступова. Для пачатку выдаляюць  1/4 старых парасткаў, а астатнія — на працягу наступных гадоў.

І хоць зімой бактэрыі і вірусы яшчэ неактыўныя, а да наступлення цяпла зрэзы павінны падсохнуць, лепш усё ж не рызыкаваць і апрацаваць раны спецыяльнай пастай, якая не гусцее пры нізкіх тэмпературах.

Ірына ТАМКОВІЧ

Выбар рэдакцыі

Грамадства

Жыццё Юліі Пярцовай: Шчыры аповед пра сям’ю, работу і пераадоленні нягод

Жыццё Юліі Пярцовай: Шчыры аповед пра сям’ю, работу і пераадоленні нягод

У прамым эфіры тэлеканала «Беларусь-1» Юлія расказвае аб падзеях у Беларусі.

Калейдаскоп

Як добра вы памятаеце ўсе Канстытуцыі Беларусі? Тэст

Як добра вы памятаеце ўсе Канстытуцыі Беларусі? Тэст

За адно стагоддзе Беларусь жыла па пяці розных Асноўных Законах.