Алімпійскія гульні ў Пекіне пачнуцца толькі праз тыдзень, але ўжо паспелі ўвайсці ў гісторыю. Кітайская алімпіяда — ужо самая экалагічная, арганізатары стараюцца звесці да мінімуму вугляродны след ад Гульняў. Гэта і самыя тэхналагічныя Гульні: на алімпійскіх аб'ектах будуць працаваць робаты. Акрамя таго, галоўныя старты чатырохгоддзя вылучаюцца строгімі эпідэмічнымі абмежаваннямі. У Пекіне алімпійцы будуць спаборнічаць не толькі з сапернікамі, але і з каранавірусам. Шэраг супрацькаранавірусных патрабаванняў спартсменам трэба выканаць яшчэ да прыезду ў алімпійскую сталіцу.
Першае патрабаванне арганізацыйнага камітэта зімовых Алімпійскіх гульняў у Пекіне — абавязковая вакцынацыя любым прэпаратам, які дазволены ораганамі аховы здароўя у краіне знаходжання. Як расказвала дырэктар РНПЦ спорту Ірына Малёваная, усе члены беларускай дэлегацыі прышчэпленыя ад каранавіруснай інфекцыі поўным курсам вакцын, пераважна расійскай і кітайскай вытворчасці. Для тых, хто адмовіцца рабіць прышчэпку, прадугледжаны строгія меры: такія члены дэлегацый павінны прылятаць у асобны аэрапорт і праводзіць 21-дзённы каранцін. Ці ўвоуле не прыязджаць у Пекін. Славенскі біятланіст Клемен Баўэр не выступіць на Гульнях у сувязі з тым, што ён адмовіўся вакцынавацца ад каранавіруса.
Здача тэста на каранавірус падчас падарожжаў ужо робіцца такой жа звычайнай справай, як і пакупка білетаў. Зразумела, што без яе не абыдзецца і падчас збораў у Пекін. Па выніках ПЛР-тэсціравання ў пасольствах Кітая ў краіне знаходжання ўдзельнікам Гульняў неабходна атрымаць Green Health, дакумент, без якога трапіць у краіну немагчыма. Здаваць тэст на каранавірус прыйдзецца не толькі людзям, але і багажу. У выпадку выяўлення віруса будуць прымацца адпаведныя меры. З падобнай праблемай ужо сутыкнулася Швейцарская дэлегацыя — іх не пусцілі ў Кітай, паколькі на чамаданах выявілі прысутнасць каранавіруса.
Кожны, хто збіраецца ў алімпійскі Пекін, павінен устанавіць на тэлефон мабільныя дадаткі, у якіх за 14 дзён да ўезду ў Кітай неабходна запоўніць апытанне аб стане здароўя. Туды ж загружацюцца вынікі ПЛР-тэсціравання і сертыфікат аб вакцынацыі, уносіцца інфармацыя аб зносінах, перамяшчэннях, месцазнаходжанні ўжо непасрэдна ў алімпійскай сталіцы.
Акрамя таго, за месяц да ўезду ў Кітай кожны павінен максімальна абмежаваць сацыяльныя кантакты, каб панізіць рызыку заражэння. Калі за гэты месяц чалавек паспеў перахварэць на каравірус, яму неабходны спецыяльны дазвол для ўезду ў Кітай. Умовы яго атрымання для кожнага індывідуальныя. Разглядаецца, наколькі цяжка праходзіла хвароба, які цітр антыцел, пасля чаго аргкамітэт прымае рашэнне, пускаць чалавека ў краіну ці не.
Масачны рэжым у Пекіне, зразумела, ніхто не адмяняў. Цяпер маска — абавязковы атрыбут адзення. Але звыклых масак у Пекіне не будзе, замест іх трэба насіць рэспіратары, прычым без клапанаў. Дыхаць у іх цяжка, асабліва на халодным паветры. Здымаць рэспіратары можна падчас ежы, сну і тэста на каранавірус. Як і на Алімпійскіх гульнях у Токіа, кожны дзень члены дэлегацый будуць здаваць тэст на каранавірус. Але калі ў Токіа для даследавання на заражэнне каранавірусам збіралі сліну, у Пекіне будуць праводзіць мазок слізістай. Прычым рабіць тое будуць у парадку жывой чаргі. Рашэнне дваякае. Ірына Малёваная назвала такі метад траўматычным. А збор спартсменаў у адной чарзе павышае верагоднасць заражэння ад патэнцыяльна хворага чалавека. Ды і стаяць у чарзе у абмежаваным памяшканні перад спаборніцтвамі — не найлепшы спосаб настроіцца на выступленне.
Для папярэджвання распаўсюджвання каранавіруснай інфекцыі на алімпійскіх аб'ектах у Пекіне будуць задзейнічаны 30 робатаў. Сярод іх функцый і дызенфекцыя спартыўных арэн: на адну арэну па два робаты. Адзін робат можа стэрылізаваць 36 квадратных метраў ў хвіліну. А другі будзе забяспечваць людзям сродак для дэзынфекцыі рук і нагадваць пра неабходнасць рэспіратараў. У дадатак да робатаў на арэне «Унексон» устаноўлены лічбавыя кантрольна-прапускныя пункты. Пасля праверкі тэмпературы наведвальніка і сканіравання яго QR-кода кантрольна-прапускны пункт адпраўляе запісы аб стане здароўя, паездках і вакцынацыі на спецыяльны тэрмінал. Гэта неабходна для таго, каб прыняць меры ў выпадку патэнцыяльнай ўспышкі каранавіруса.
Арганізацыйны камітэт Алімпіскіх гульняў прыняў рашэнне не распаўсюджваць білеты для балельшчыкаў у адкрытым продажы. «Беручы пад увагу, што сітуацыя ў частцы прафілактыкі і кантролю пандэміі COVІD-19 застаецца складанай, у мэтах абароны здароўя і бяспекі ўдзельнікаў і гледачоў Алімпіяды было прынята рашэнне змяніць першапачатковы план адкрытага продажу білетаў на размеркаванне білетаў сярод пэўных груп гледачоў», — сказана ў афіцыйнай заяве.
Некаторыя абмежаванні застаюцца з Алімпійскіх гульняў у Токіа. У Пекіне ўсе ўдзельнікі Гульняў будуць перасоўвацца на асобным транспарце, месцы ў сталовай раздзеленыя перагародкамі, усюды будуць расстаўлены антысептыкі.
У Пекін ужо прыязджюць першыя члены дэлегацый. Як паведамляе ТАСС, у панядзелак, 24 студзеня, у КНР прыбылі 246 чалавек, з якіх 23 — спартсмены і афіцыйныя асобы, 223 — «прадстаўнікі іншых зацікаўленых бакоў». Па выніках ПЛР-тэсціравання кітайскія медыкі выявілі 12 новых выпадкаў заражэння. Акрамя таго, яшчэ тры выпадкі інфіцыравання выяўлены сярод тых, хто раней прыбыў на Алімпійскія гульні.
Алімпійскія гульні ў Пекіне лёгкімі не будуць. Праз тыя ж супрацькаранавірусныя абмежаванні ў Пекіне не праводзіліся тэставыя спаборніцтвы, невядома, у якіх умовах прыйдзецца выступаць. З гэтай жа прычыны скарочаны медыцынскі штаб кожнай дэлегацыі. За здароўе беларускай каманды будуць адказваць пяць спецыялістаў на чале з Ірынай Малёванай. Яна, дарэчы, ужо прыляцела ў Пекін. Беларускія медыкі прывезлі на Гульні сваё абсталяванне, каб можна было працаваць самастойна і лішні раз не звяртацца ў алімпійскую паліклініку. У медыцынскім багажы — 243 адзінкі лекавых рэчываў, 80 найменняў вырабаў медыцынскага прызначэння і 12 пазіцый медыцынскага абсталявання — біяхімічныя аналізатары, фізіятэрапеўтычнае абсталяванне.
З такім падыходам за сваё здароўе беларускім алімпійцам перажываць не варта. Аб ім паклапоціцца медыцынскі штаб, які будзе рупліва адсочваць самаадчуванне спарстменаў. Іх задача цяпер — даказаць, што ўсё не дарма.
Валерыя СЦЯЦКО
Амаль тысяча дзвесце чалавек збяруцца, каб вырашаць найважнейшыя пытанні развіцця краіны.
Расказаў першы намеснік старшыні Дзяржаўнага камітэта па навуцы і тэхналогіях Рэспублікі Беларусь Дзяніс Каржыцкі.
Як вакцыны выратоўваюць жыцці і чаго можа каштаваць іх ігнараванне?
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
