У час перадачы «Па сутнасці» на тэлеканале СТБ намеснік загадчыка аддзела прававой, аналітычнай і метадычнай работы апарата Цэнтрвыбаркама Беларусі Іван Толкач растлумачыў, чым правядзенне рэферэндуму адрозніваецца ад правядзення выбараў Прэзідэнта. «Перш за ўсё адсутнічае блок кандыдатаў і ўсё, што звязана з агітацыяй за кандыдатаў. Застаецца агітацыя толькі ў частцы «за» рашэнне, вынесенае на рэферэндум, або «супраць», — адзначыў ён.
«Калі праводзіць паралелі з выбарамі, то на рэферэндуме, каб прыняць змяненні і дапаўненні ў Канстытуцыю, якія вынесены, трэба абавязкова выканаць дзве ўмовы. Першая — каб у рэферэндуме ўзяло ўдзел больш за палову грамадзян, уключаных у спісы. У гэтым выпадку рэферэндум адбудзецца. Другое — прагаласаваць «за» павінна больш за палову зноў жа ад унесеных у спісы. Калі на прэзідэнцкіх выбарах — проста ад тых, хто ўзяў удзел у галасаванні, то тут — ад унесеных у спісы», — сказаў Іван Толкач.
На рэферэндуме можна будзе прагаласаваць датэрмінова. «На рэферэндуме, як і на выбарах, прадугледжваецца датэрміновае галасаванне. Час такі ж — з 10.00 да 14.00 і з 16.00 да 19.00 з аўторка да суботы і ў нядзелю — асноўны дзень галасавання. Тут нічога не мяняецца», — сказаў Іван Толкач.
Ён растлумачыў, што выбарчае заканадаўства прадугледжвае галасаванне на ўчастку як па месцы рэгістрацыі, так і па месцы пражывання. Аднак у другім выпадку павінен быць дакумент, што пацвярджае, дзе чалавек фактычна пражывае. Напрыклад, студэнт, які прапісаны ў Віцебску, а жыве ў Мінску, можа прыйсці на найбліжэйшы ўчастак і прад'явіць дагавор арэнды кватэры.
«Пры гэтым ніякіх каруселяў тут немагчыма, часам спекулююць на гэтым. Камісія па рэферэндуме, калі бачыць, што ў спісе чалавека няма, звяжацца з камісіяй па месцы яго рэгістрацыі і там яго выключаць», — адзначыў Іван Толкач.
Гаворачы аб тым, колькі часу спатрэбіцца на апрацоўку ўсіх галасоў, намеснік загадчыка аддзела адзначыў, што папярэднія вынікі звычайна гатовыя да 2-3 гадзін ночы. «Паколькі могуць быць праблемы недзе з лагістыкай, недзе магчымыя нейкія замінкі на ўчастках, ужо на раніцу панядзелка, 28 лютага, будуць больш удакладненыя звесткі, а канчатковыя падводзяцца недзе ў пятніцу», — сказаў ён.
«Нам вельмі хочацца, каб яўка была высокай. І мы чакаем гэтую яўку. І больш за тое, як беражлівыя людзі, мы павінны разумець, што на рэферэндум выдзяляюцца вялізныя дзяржаўныя сродкі. Больш за Br20 млн на гэты рэферэндум выдзяляецца з бюджэту. Праводзіць мерапрыемства за такую суму, якое не дасць канкрэтнага выніку, на якое людзі проста не прыйдуць, было б сама меней няправільна», — сказаў Іван Толкач.
Амаль тысяча дзвесце чалавек сабраліся, каб вырашаць найважнейшыя пытанні развіцця краіны.
Расказаў першы намеснік старшыні Дзяржаўнага камітэта па навуцы і тэхналогіях Рэспублікі Беларусь Дзяніс Каржыцкі.
Як вакцыны выратоўваюць жыцці і чаго можа каштаваць іх ігнараванне?
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.